Dhilebiwe ni Matewuji
17 Nuuvira malabo matanu nammodha, Yesu omuthukula Peduru, Tiyago ni ddibileya Juwawu, waadhowana mwango dhaala wootaama. 2 Vano Yesu osadduliwa vamentoni vewa, kove yaye wambela ojerimela ninga nduwa; dhowara dhaye ojerimelaga* ninga waara wa lampada. 3 Nuwindo, okumelela Moyizeji ni Eliyaji ethapanyaga nuliye. 4 Vano Peduru owoga ni Yesu egihina: “Nabwiya, yeere owomela nahakalege vevala, mwafunaga miyo podi wamaga addammwa araru mmodha eenyu mmodha a Moyizeji ni mmodha a Eliyaji.” 5 Ahinamale owoga murabo wowara wakunela, vohilegela aliwa wiwa ndhu nakuma mmuraboni negihina: “Ola di Mwanaga ginamudhivelimi ni ginamurumedhimi. Munvuruwanege.” 6 Anamahara ale nuwiwa ndhu nne aliwa okokora, oworomela vati ni ofwanyiwa woova winlubale. 7 Yesu wawaddamela ni wadahinya egihina: “Kavenyani. Kamoove.” 8 Aliwa nuwavenyiha mento kimonile muthu mmodhaya ahili Yesu. 9 Ekitaga omwangoni, Yesu wakongomedha egihina: “Yowoona ela kammwaddele muthu mmodha, ofiyedha Mwaana Muthu ovenyihiwa muukwani.”
10 Nuwindo anamaharaye omukoha yegihina: “Mwahaya bwaddi anamaleba egawoga wihina Eliyaji dinambele odha?” 11 Yesu wawakula egihina: “Mwebaribarene Eliyaji anodha wihina avenyihedhe dhithu dhaatedhene. 12 Mowindala ginowuwaddelani wihina Eliyaji ohudha, aliwa kiyandile omunona mbwenye aliwa omwerela dhithu yafuniwa. Nimakalelo mamodhave Mwaana Muthu aneere wonihiwa goyi mmadani mwewa.” 13 Vano anamaharaye wonelamo wihina oliye amwagana Juwawu Namabaddiza.
14 Aliwa nufiya vaali muthithi waathu, mulobwana dhaala omwaddamela ni okokora vamentoni vaye egihina: 15 “Nabwiyani mweddeleni thagaraga mwanaga mwanamulobwana, mwaha oliye muredda, anna ejhilejhile. Malabo owinjhivene anomorela vamoothoni ni mmanjheni. 16 Miyo gahimudhana wihina anamahara enyu envulumuse, mbwenye aliwa kiyandile onvulumusa.” 17 Yesu wakula egihina: “Nyu nlogo nohukanna nroromelo ni nabure, ginaakale ni nyu ofiyedha alini? Ginuvilelenani ofiyedha alini? Kamudhenani vala.” 18 Yesu numusumulula demoniyu ole oliye omwihiya, okuma mudhidhi yoole odhowa osogolo muzombwe ole ovulumuwa. 19 Voharela anamaharaye omwaddamela oliye agaalivo yeka, aliwa omukoha yegihina: “Mwahaya bwaddi nidhe nihandege omwigara?” 20 Oliye wawakula egihina: “Mwaha wooyeva nroromelo. Ginowuwaddelani ebaribari, mwakanna nroromelo noyevela ninga thanga ya mostarda, munere owoga ni mwango ola mwegihina: ‘Katamela vale,’ mwangoya onere otamavo, newene kaavo ethu enurusegeni.” 21* ——
22 Egatugumane oGalileya Yesu fawogiliye egihina: “Mwaana Muthu aneere opelekiwa mmadani mwaathu, 23 ni aneere opiwa, vano labo nanatharu avenyihiwe muukwani.” Aliwa nuwawiwa madhu yaala wukuuwa vanlubale.
24 Aliwa nufiya oKafarnawu, anamakukusa musoko a korowa biili dha darakima omwaddamela Peduru ni omukoha yegihina: “Namahudhiha enyu kanaliva korowa biili dha darakima* dha musoko?” 25 Peduru wakula egihina: “Hee, oliye anoliva.” Oliye nuuvolowa mba, Yesu okala oobajha omukoha Peduru: “Ononamo aavi Simawu, korowa dhovelela obe musoko dhinakela mamwene eelabo ela yavati dhinakuma wuuvi? Waaniwa obe wanyawedda?” 26 Oliye omwakula egihina: “Dhinakuma wanyawedda,” Yesu owoga egihina: “Mwebaribarene, ahima kinahowela oliva musoko. 27 Mbwenye wihina nahakwakwathuse, kadhowa wameze muniya, oba yobajha onameziwe, ofugule mulomo onere ofwanyamo korowa modha ya parata.* Windo othukule korowaya walive musoko waga ni wawo.”