Karta na Judasi
1 Miyo Judasi, mudhaari a Yesu Kiristu, ddibile Tiyago, ginaalebela ale yithaniwe ni Mulugu, Baabi naale anaadhiveliye wihina yakale vamodha ni Yesu Kiristu:
2 Mulugu uwenjhedhedheni thagaraga, murenddele ni odhivela.
3 Addibilaga, naari ngilibihedhe wihina gulebeleni ovulusiwa nnajhehedhihu vamodha, gihoona wi sapama wulebelani wihina gukongomedheni owaniha koddo ya nroromelo nenno nvahiwinyu dila modha ni mukalakala. 4 Mwahaya bowi vaari veenyu ehivolowavo alobwana ewogiwe kale ni Dholebela wihina etorihiwe, alobwana ayo babure, enowerana dhithu dhamanyazo* yinkedhaga opama wohinifwanelela wa Mulugu, vadhuluva enowoneya wihina anamaleketha vamentoni va mwinnya ni Nabwiya ehu, Yesu Kiristu.
5 Naarive muganonne dhithu dhaatedhene ndha, ginafuna guwubusedheni wihina Yehova* ahoobola nlogo naye elabo yoWijipitu, mbwenye watolosa ale yahanna nroromelo. 6 Teto angero ehiyile mutholo wewa yavahiwiwa ni Mulugu odhulu, ni mburo wewa wokala, Mulugu ohamaga ni makurenti amukalakala, wavokedha oyiihini ejhehedhaga labo ninlubale wihina etorihiwe. 7 Nimakalelo mamodhave, Sodoma ni Gomora ni sidadi dhaddameliwa dhahavolowela mararuwo* oonyakavala aliwa wambela ohara dhofuna dhabure dhomwiilini; mwaha wa yeyo aliwa otorihiwa ni mootho wa mukalakala, dhopadduwa ndha dhilebiwe wihina dhinixagihe.
8 Naarive dhigari ndo, athu ayo enodhiveliwa dhoroha, etakalihaga mwiili wewa, enopwaza onamathonga ni enowaruwana ale enathonga. 9 Mbwenye Migeli mungero munddimuwa, nubajha okangana ni Ddiyabo mwaha mwiili wa Moyizeji, kamutorihe ni madhu abure, mbwenye oliye wera: “Yehova* usinyuse.” 10 Mbwenye athu ayo, enovanyiha dhithu dhaatedhene yahinoneliwamo pama. Mbwenye dhithu dhaatedhene enoneliwamo vang’ono, enonelamo ninga anenyama ehinna thotho teto yeraga othabwa winonga.
11 Sathagaraga, mwaha alobwana ayo enahara dila emodhave ya Kayini, ehimorela murako mmodhave wa Balawu wofuna oliviwa, naaliwaya enere otolosiwa mwaha makalelo ewa oowoga bowithukula ninga Kora! 12 Alobwana ayo mabwe yipitile vati va manjhe, mwajhaga mathanga eenamudhi enovolowa vaari veenyu, aliwa egaali anamakukula enijhiha yahovaga, murabo dhohukanna manjhe, dhinathikiwa bure-bure nnipevo; mudhidhi wovaha dhowima, muthanko ndho kadhiimile,* mwaha dhahimala okwa ni dhihidduliwa musisidha; 13 alobwana ayo enakala ninga nipevo na kopolo na muniya, nnavokedha ode nipweru na manyazo ewa, enakala ninga thendderi dhihinna mburo vokala, Mulugu anafuniye wavokedha oyiihini enlubale ni mukalakala.
14 Mulobwana anetanu nabiili mmudhi Aadawu, ithaniwa Enoki, ohuvuhulela ethu emodhave wodhela alobwana ayo egihina: “Kasugwani! Yehova* ohudha vamodha ni matxikwi ni matxikwi* aangero aye oweela 15 wihina aatorihe aatene ni aawoge muladdu athu aatene abure mwaha wa dhowera dhewa dhabure yeriliwana ni mwaha wa dhithu dhaatedhene dhonyakavala athu ala abure emuwogeliwa.”
16 Alobwana ayo enowunliha dhammurimani, ni kinahagalala ni dhithu enniwana, enerana dhofuna dhewa, yawogaga enowithukula, ni enowathethela athu amodha, evedaga dhofuna dhewa.
17 Mbwenye nyu addibilaga, kamuddiwale muthenga* owogiwe kale naarumiwi a Nabwiya ehu Yesu Kiristu, 18 yuwaddelesani yegi: “Malabo ookuthula enere okalawo athu oonyemula, enasayelege werana dhofuna dhewa dhabure.” 19 Biyala enadhana ohiwanana mmulogoni, alobwana ayo enakala ninga anenyama* ni kiyithwile epaddi yomuzimuni. 20 Mbwenye nyu addibilaga, muwaraalihe nroromelo nenyu noweela, mulobelege ni muzimu wotxena, 21 wihina Mulugu adhowegeve udhivelagani, wula mujhehaga thagaraga dha Nabwiya Yesu Kiristu, anuvaheni egumi yohimala. 22 Teto, muhuselele waweddela thagaraga ale enanganyedha, 23 mwavuluse, ni mwawapule vamoothoni. Athu amodha, mwaweddelege thagaraga, mbwenye mwawovege, ni mwiddege dhoowara dhewa dhitakale ni dhowera dhewa dhabure.
24 Vano Mulugu anna kopolo dhowubarelani wihina muhukwakwathuwe ni anukavihereni wimela txithi muhinna mahonya vamentoni vaye vowara, nuuhagalala winlubale, 25 Mulugu mmodha baahi, Namoobola ehu, avahiwe nthithimiho, waara, kopolo ni onamathonga wa malabo aamatene, obajha peeno ni mukalakala wodhela Yesu Kiristu Nabwiya ehu. Amem.