Dhilebiwe ni Matewuji
11 Nuumala wavaha dhoxagiha anamaharaye 12, Yesu odhowa sidadi dhimodha wihina aahudhihe* ni aalaleye athu.
2 Mbwenye Juwawu agaali mukadeya wiwa wodhela mabasa aapara Kiristu ni waruma anamahara aye 3 wihina yamukohe yegihina: “Nabwiya di Nyu ajhehiwa obe nimujhehege muthu mmodhaya?” 4 Yesu wawakula egihina: “Mudhowe mwamwaddele Juwawu dhithu muniwinyu ni munooninyu: 5 Athu oohoona enna woona, athu ooragala enna weedda, aliba maranya enna ovulumusiwa, athu oohiwa enna wiwa, anookwa enna ovenyihiwa muukwani teto athu oohaawa enna olaleyiwa muthenga dhapama. 6 Oohagalala di muthuyo yoole ahigifwannyena ethu yokwakwathusa.”
7 Edhowaga, Yesu wambela owoga ni muthithi ole waathu wodhela Juwawu egi: “Mwaagele woona ddi? Woona bango enaddeguma nnipevo? 8 Kito mwaagele woona ddi? Mwaagele omoona mulobwana awanre malaya athima? Ale enaawara malaya athima enakala nyumba dhamamwene. 9 Kito mwebaribarene mwaagele woona ddi? Omoona namavuhulela? Hee, miyo ginowuwaddelani oliye ohumukwaranya namavuhulela. 10 Ola diyole dholebela dhinamuwogiwa dhegihina: ‘Kasugwani! Ginere omuruma muthu osogolo weenyu,* wihina uwegeredheleni dila!’ 11 Ginowuwaddelani ebaribari: Mwa athu aatene yaale ebaliwe ni muhiyana kanabaliwege muthu munlubale omukwaranya Juwawu Namabaddiza, mbwenye ole ali mung’ono Mumweneni wodhulu, dimunlubaleya omukwaranya oliye. 12 Wambela malabo a Juwawu Namabaddiza ofiyedha peeno, athu enna wilibihedhave oveda Omwene wodhulu, mbwenye ale ehinaselela oveda binafwanya. 13 Wambela mudhidhi Juwawu akumeleliye, Anamavuhulela ni Malamulo aamatene yahiwoga dhithu dhaapadduwe osogolo. 14 Akala munoofuna orumedha obe naari, oliye di ‘Eliyaji ajhehiwa.’ 15 Ole anna mabaru owiwa avuruwane.
16 “Nlogo nna ginaliganihe nnaani? Ginaliganihe naahima ekaratile vamerkadu yawithanaga akwiwa yegihina: 17 ‘Iyo nihooba palaza, mbwenye nyu kamwiinile, iyo nihuwibelani jhibo dhowukula mbwenye nyu kamuukuwile.’ 18 Nimakalelo mamodhave, Juwawu adhile ahijhaga newene ahing’waga, mbwenye athu enawoga yegihina: ‘Oliye ohukanna demoniyu.’ 19 Mwana Muthu adhile ajhaga ni ang’waga, mbwenye athu enawoga yegihina: ‘Kamusugweni! Mujhani, namang’wa vinyu, akwaye banamakukusa musoko ni anamathega.’ Thotho enooneya mowiwanana ni dhowera dhewa.”*
20 Nuwindo oliye wambela osumulula sidadi dhendhe mwapanriye mabasaye owinjhiva, mwaha kadhathwarunwe; 21 “Ginowuweddela thagaraga Korazi! Ginowuweddela thagaraga Betizayida! Mwaha matikiniho manlubale yereye elabwinyu, yahereye kale oTiru ni oSidoni, aliwa yeere othwaruwa yaware masakwi ni yidholihe nddora. 22 Mbwenye miyo ginowuwaddelani ebaribari: Labo Nootoriha makathamiho enafuna wufwanyani enere wakwaranya makathamiho enafuna okanna Tiru ni Sidoni. 23 Ni nyunwa akudda Kafarnawu munubuwela wihina nthithimiho nenyu thithabwile okala ninlubale ofiyedha odhulu? Bumwahaya munere ovuheeliwa mmahame.* Mwaha matikiniho manlubale yereye elabo yenyu, yahereye sidadi yoSodoma, yeere okalawove ofiyedha peeno. 24 Mbwenye miyo ginowuwaddelani ebaribari: Labo Nootoriha makathamiho enafuna wufwanyani, enere wakwaranya makathamiho yaafwannye sidadi yoSodoma.”
25 Nuwindo Yesu owoga egihina: “Babani miyo ginowuthithimihani vaari vaathu aatene, Nabwiya oodhulu ni eelabo yavati, mwaha muhakuwa dhithu ndha athu eenonelo ni athotho, mbwenye muhawaddela ahima. 26 Hee Babani, mwaha nfunne wihina dhithudha dhereye ndala. 27 Ababa ehigivaha dhithu dhaatedhene. Kawo muthu amunonne pamadhene Mwaana, ehili Ababa, teto kawo muthu aanonne pamadhene Ababa ahili Mwaana naale mwaana anafuniye wawaddela. 28 Mudhe wa miyo aatene nyu mpinyaminyeye ni mabasa ni munyemeliwe, miyo ginere wuvahani kopolo. 29 Muthukule mutholo waga ni muhudhere* ni miyo, mwaha wi gili oopwaseya teto murima waga bowiyeviha, mwindo murima dhenyu* dhinere otodoleya. 30 Mwaha mutholo waga bovevuwa* teto kunanyemela.”