Dhilibiwe ni Marku
5 Nuwindo ofiya kobela emodha ya niya murudda waaJerazenu. 2 Yesu nuukita mmwanddeyani, mulobwana dhaala oonihiwa goyi naademoniyu okuma omahame* odhowa ogumana ni Yesu. 3 Mulobwana oyo akala omahame, ofiyedha mudhidhi yoole kaavo muthu andile ommaga newene ni kurenti. 4 Malabo owinjhivene oliye oomagiwa ni makurenti moddo ni moonodha; mbwenye oliye owaapadha makurenti aamatene ni kaavo muthu anna kopolo dhomugonjhiha. 5 Malabo aamatene, mutana ni mahiyu, oliye ookuwa omahame,* mmwangoni, ni owiigwadda* ni mabwe. 6 Mbwenye numoona Yesu wolapelawene oliye omuthamagela ni okokora vamentoni vaye. 7 Nuwindo okuwa ni ndhu nootaama egihina: “We Yesu Mwaana a Mulugu Oodhuludhulu, onafuna ddi ni miyo? Kalibela vamentoni va Mulugu akala kunagonihe goyi.” 8 Mwaha Yesu ahiwoga ni muzimu ole wabure egihina: “Kakumamo mmwiilini mwa mulobwana oyo, muzimu wabure!”* 9 Mbwenye Yesu omukoha egihina: “Ndina naawo oli aani?” Oliye waakula egihina: “Ginithaniwa Lejiyawu, mwaha nihinjhivana.” 10 Ni omuloba Yesu wihina ahigarele murudda yoole muzimu ndhe dhabure.
11 Mbwenye nahikalawo nikuru na guluwe najha omwangoni. 12 Nuwindo muzimu ndhe dhabure wambela ombebedha Yesu dhegihina: “Onigarele wule wili nikuru naguluwe, wihina navolowe mmwiilini mwewa.” 13 Vano Yesu orumedha. Nuwindo muzimu ndhe dhabure okumamo ni ovolowa mmwiilini mwa guluwe; vano nikuru nne naguluwe nowakwana 2000, othamaga, odhowa omorela muniya ni oddaddela mwemmo. 14 Vano aliba yajhiha guluwe ndhe othawa, ovolowa musidadi, wawaddela amodha, vano athu yiwale odhowa woona ele yapadduwe. 15 Nuwindo, omwaddamela Yesu ni omoona mulobwana ole oonihiwa goyi naademoniyu, ni aanna alejiyawu agakaratile, agawanre pamadhene, aneba ale egaamanle; mwaha wa yeyo aliwa wambela woova. 16 Nuwindo, aatene yaale yoonilege dhithu dhaapadduwe, wawaddela dhampadduwele mulobwana ole oonihiwa goyi naademoniyu ni dhithu dhereye ni guluwe. 17 Mwaha wa yeyo aliwa omuloba Yesu wihina avenyewo murudda yoole.
18 Vano oliye agwelaga mmwanddeyani, mulobwana ole oonihiwa goyi naademoniyu omuloba wihina amuharege. 19 Yesu kaarumedhe, mbwenye omwaddela egihina: “Kadhowaga vaade vaawo wagumane namudhawo, wafiya wawaddele dhaatedhene Yehova* uwereliye ni thagaraga uweddeliye.” 20 Mulobwana ole odhowaga ni wambela olaleya murudda woDekapoli* dhaatedhene Yesu aamwereliye ni aatene yootikina.
21 Yesu nuumala wabuwela kobela emodha, valigiye otugumana muthithi munlubale waathu mbwenye oliye odhowa okala sere-sere ya niya. 22 Ofiya namaholela dhaala amusinagoga ithaniwa Jayiro, numoona Yesu okokora vamentoni vaye. 23 Oliye omuloba dila dhowinjhivadhene egihina: “Mwanaga mwana muhiyana muredda vanlubale.* Kamwerena, ndoweni mwamutapulele nlada nenyu wihina avulumuwe.” 24 Nuwindo, Yesu odhowa nuliye, teto muthithi munlubale waathu womuhara ni wompinyaminya.
25 Ahikalavo muhiyana dhaala aamanle yaka 12 oonaga goyi mwaha wogonamo ahikumagamo.* 26 Oliye ahoona goyi enlubale* mmadani mwaamediku owinjhiva ni ahinonga korowa dhaye dhaatedhene aanniyena mbwenye kaavulumuwe, ohiya eyo eera othabwa. 27 Nuwiwa wodhela Yesu oliye omwaddamela odduli vaari va muthithi yoole ni ohidda yowara yaye, 28 mwaha oliye owubuwela mmurimani mwaaye egihina: “Ginohidda yowarave ele baahi ginere ovulumuwa.” 29 Vohilegela nikame nne omaala, kuhukumaga, ni woona mmwiilini mwaaye wihina oredda ole wamooniha goyi wahimala.
30 Mudhidhi yoole, Yesu woona wihina dhahikumamo kopolo mmwiilini mwaaye, nuwindo oliye orugunuwa vaari va muthithi ole waathu ni wakoha egihina: “Baani ahiddile dhowara dhaaga?” 31 Anamahara aye omwakula yegihina: “Muthithi ni muthithi ola waathu onupinyaminyani munokoha mwegi ‘baani ahiddile dhowara dhaaga?’” 32 Mbwenye Yesu oosugwa muthithi ole waathu wihina amoone baani ahiddile dhowara dhaye. 33 Muhiyana ole mwaha wowoova wambela ogurumela nunona ethu eeriliyena, nuwindo omwaddamela okokora vamentoni vaye, ni owoga ebaribari. 34 Yesu owoga nuliye egihina: “Mwanaga nroromelo naawo nihuvulumusa. Kadhowa nimurenddele, oredda wuwoniha goyi ohumala.”
35 Ahinamale owoga, ofiya alobwana dhaala yakala vaade va namaholela amusinagoga ni owoga yegihina: “Mwanawo ohukwa! Mwahaya bwaddi ogamunyonya Namahudhiha?”* 36 Mbwenye Yesu nuwawiwa madhu yaawogiwa oliye omwaddela namaholela a musinagoga ole egihina: “Kuwoove, mbwenye okanne nroromelo.” 37 Mbwenye keenyile wihina athu amodha emuhare ahili Peduru, Tiyago ni Juwawu ddibile Tiyago.
38 Nufiya vaade va namaholela amusinagoga oliye wiiwa kutho, athu yunlaga ni yikubanyedhaga vanlubale. 39 Nuuvolowa oliye owoga egihina: “Mununlela ddi ni mwikubanyedhaga? Namwali ola kakwile mbwenye anoogona.” 40 Mwaha wa yeyo aliwa wambela omuteya mwamakalelo oonyemula. Mbwenye nuwaruma aatene wihina ekume oliye waathukula ababe ni amaye a namwali ole ni amodha yaali nuliye, nuwindo odhowa vaali namwali ole. 41 Vano opareela nlada na namwali ole ni owoga egihina: “Thalitha kumi,” enatapulela: “Namwali anawoga di miyo: Kavenya!” 42 Vohilegela, namwali ole ovenya ni wambela weedda. (Oliye aanna yaka 12.) Mwaha wa yeyo aliwa kiyandile ovita ohagalala yanniwana. 43 Mbwenye oliye wakongomedha dila dhowinjhivadhene* wihina ehimwaddele muthu, ni waruma wihina envahe yoojha.