Dhilebiwe ni Lukaji
22 Yaddamelaga Mathanga a Pawu Dhohikanna Emela yithaniwa paskwa. 2 Anddimuwa aanamakutha ni anamaleba wambela osayela mudhidhi wofwanenelela wihina empe Yesu, mbwenye yowoova nlogo. 3 Vano Saddana omulabihedha Judasi Iskariyoti mmodha wanamahara yaale kumi nabiili, 4 oliye odhowa owoga ni anddimuwa aanamakutha ni anamasogolela amutempulu wihina awaddele makalelo ompeleka Yesu mmadani mwewa. 5 Aliwa ohagalala niithu awogiliye ni orumedha* onvaha korowa dha parata. 6 Nuwindo oliye orumedha, vano obajha osayela mudhidhi wofwanelela wihina ampeleke mmadani mwewa, mbwenye ahili vaari vamuthithi waathu.
7 Vano ofiya labo noobajha na Mathanga a Pawu Dhohikanna Emela, labo napelekiwa mukutho wa paskwa; 8 nuwindo Yesu omuruma Peduru ni Juwawu egihina: “Dhowani mwegeredhe yoojha ya labo na paskwa wihina nijhe.” 9 Aliwa omukoha yegihina: “Munafuna wihina negeredhe waani?” 10 Oliye wawakula egihina: “Nvuruwane: Mwaavolowaga musidadi,* munere ogumana ni mulobwana dhaala agathukule muno wa manjhe. Mmuhare nyumba anafuniye ovolowa. 11 Mmwaddele mwanamuralaya mwegihina: ‘Namahudhiha anokoha egi: “Sala yaaleddo wihina gimujhevo paskwa ni anamahara aaga siivi?’” 12 Oliye aneere wuwonihani sala enlubale eli odhulu yowegeredhiwene. Mmwegeredhe wengo.” 13 Aliwa nudhowa ofwanya dhaatedhene ninga Yesu mwawogeliye, wawegeredha mathanga a paskwa.
14 Nufiya mudhidhiya, oliye okarati vameza vamodha naarumiwi aye. 15 Vano Yesu wawaddela egihina: “Goojheha vanlubale omujha paskwa ola vamodha ni nyu gihinabajhe woona goyi, 16 miyo ginowuwaddelani gegihina: Kagidha gihogolowela waajha mathanga ala ofiyedha dhithu dhaatedhene wakwanela Mumweneni mwa Mulugu.” 17 Vano, oliye othukula kopo ya vinyu, olobela ni owoga egihina: “Kadda muthu ang’we amala anvahedhe mukwaye, 18 ginowuwaddelani ebaribari: Okuma peeno odhowa osogolo, kagidha ging’wa yowima ya nvidera wahinafiye Omwene wa Mulugu.”
19 Vano othukula pawu, olobela, numala oliye ogwaddanya ni wagawela, egihina: “Ela enatapulela mwiili waaga, onapelekiwe mwaha wa nyu. Mudidele werana ndala mugubuwelaga miyo.” 20 Vano aliwa nuumala ojha, oliye werana emodhave ni kopo ya vinyu, eraga: “Kopo ela, enatapulela nipangano nixa wodhela nikame naaga, nnafuna okuthuliwa mwaha wa nyu.
21 “Mbwenye munone wihina ole anagigulihe ali vamodha ni miyo vameza vevala. 22 Ebaribari wihina Mwaana Muthu anodhowa ninga dholebela dhinawogiwa, mbwenye ginomukubanyedha vanlubale ole anamugulihe!” 23 Vano, aliwa obajha okohana vikaleliwa wodhela ole aamugulihe.
24 Nuwindo, aliwa wambela okangana vikaleliwa wihina emunone baani munlubaleya waaliwa. 25 Mbwenye Yesu owoga naliwa egihina: “Anamathonga eelabo enathonga nlogo mowiwanana ni efunelo yewa, teto ale enna owedha enoniwe ninga athu enawerela opama athu amodha. 26 Nyu kamukale ndo. Mbwenye ole anafuna okala munlubale vaari veenyu, akale mung’onoya teto ole anaholela, akale ninga ole anaalaba akwaye. 27 Vano munlubale baani: Ole akiratile* vameza obe anaalaba akwaye? Kahi ole akiratile vameza? Mbwenye miyo gili vaari veenyu ninga ole anulabani.
28 “Mbwenye, nyu kamuginyanyanle naarive gehiwaga; 29 bumwahaya ginowerana nipangano noomwene ni nyu, ninga Ababa yeriliwana nipangano ni miyo, 30 wihina mujhe ni mung’we vameza vaaga, Mumweneni mwaaga, ni mukarati vampaddoni wi mwathonge mahimo 12 aamwaana Ezarayeli.
31 “Simawu, Simawu, ogivuruwane: Saddana anunlela wihina aatene nyu nvethiwe ninga tirigu. 32 Mbwenye miyo ginowulobelelesa wihina nroromelo nawo nihiridhe, teto wahogolowa walibihe addibilo.” 33 Vano oliye waakula egihina: “Nabwiya miyo ginorumedha ofugeliwa mukambura obe opiwa vamodha ni nyu.” 34 Mbwenye Yesu omwaakula egihina: “Ginowuwaddela ebaribari Peduru, emahiyu yeela mutubi ahinunle onere ogikoodda dila tharu.”
35 Oliye wakoha anamaharaye egihina: “Gurumilimini muhinna thumba na korowa, thumba na yoojha newene muhinna sapatho, ehikala ethu yuhalelani?” Aliwa omwakula yegihina: “Naari!” 36 Mbwenye oliye owoga naliwa egihina: “Vano, ole anna thumba na korowa athukule, anna thumba na yoojha athukule, teto ole ahinna supadda, aagulihe malaya aye wihina agulena. 37 Vano, ginowuwaddelani ebaribari enohoweleya wakwanela yovuhulela enawoga yegihina: ‘Oliye ohutaganyihedhiwa naathu ehinawiwelela malamulo.’ Hee, madhu ala ginaawogimi enna wakwanela mwigumini mwaga.” 38 Aliwa owoga nuliye yegihina: “Nabwiya nihikanna masupadda menli.” Oliye wawakula egihina: “Ehakwana.”
39 Nuumala, oliye odhowa mwango Woolivera ninga eresiye, vano anamaharaye omuhara. 40 Nufiya omwangoni Woolivera, oliye owoga naliwa egihina: “Mudidele olobela wihina muhimorele muwehiwani.” 41 Oliye osusavo vang’ono, odhowa ninga vaamorele nibwe muthu avoka, okokora ni obajha olobela, 42 egihina: “Babani, kamwerena, dhenyeya susihani kopo ela vamentoni vaaga. Kayereye efunelo yaaga mbwenye yereye efunelo yenyu.” 43 Nuwindo, odha mungero odhulu omulibiha. 44 Mbwenye oliye okala oothuwathuwene, ni olobelave ni kopolo dhaatedhene, vano nikurumela naye okala ninga nikame namorela vati. 45 Nuumala olobela odhowa waali anamaharaye, wafwanya egonaga, egaali oogomeene mwaha yahithabwa wukuuwa. 46 Oliye wawaddela egihina: “Munagonela ddi? Kavenyani mulobelege, wihina muhimorele muwehiwani.”
47 Mudhidhi yoole awogagave, ofiya muthithi waathu osogoleliwaga ni Judasi mmodha a neekumi nabiili, omwaddamela Yesu wi anvahe beju. 48 Mbwenye Yesu omukoha egihina: “Judasi, onamuguliha Mwaana Muthu ni beju?” 49 Vano, athu yaali vevale, nuwona ndhe dhapadduwa omukoha yegihina: “Nabwiya, munafuna naakakathe ni masupadda?” 50 Muthu mmodha othukula supadda naye, ogwadda nibaru na moono woojha na mudhaari anamakutha munlubale. 51 Mbwenye Yesu owoga egihina: “Kahi ndo!” Ohidda nibaru na mudhaari ole onvulumusa. 52 Vano, Yesu wakoha anddimuwa aanamakutha, anamasogolela amutempulu ni anamaholela yadhowile omwihidda egihina: “Mudheele ogimaga ni masupadda ni mmiri dhenyudhene ninga gere okala mbava? 53 Malabo aamatene gakala vamodha ni nyu mutempulu, newene kamugimagile. Mbwenye ola bumudhidhi weenyu ni mudhidhi wonamathonga wa yiihi yinlubale.”
54 Vano, aliwa ommaga omuthukulela vaade vanamakutha munlubale. Mbwenye Peduru amuhara wolapelawene. 55 Athu nuhiddiha mootho vaade vanamakutha wihina yothege, Peduru okarati vamodha naliwa woothaga. 56 Vano, mudhaari amwanamuhiyana numoona oothaga mootho, omusugwa pamadhene ni owoga egihina: “Nuulaya aali vamodha nuliye.” 57 Mbwenye, oliye omukoodda egihina: “Muhiyanawe kagimunonne muthu yoyo.” 58 Nuuvira mudhidhi mung’onove, muthu mmodhaya omoona ni owoga nuliye egihina: “Ni weya oli mmodha wanamaharaye.” Vano Peduru omwakula egihina: “Mulobwana, kahiyo miyo.” 59 Vano, nuuvira wora modha, mulobwana mmodhaya odidela owoga nuliye egihina: “Mwebaribarene mulobwana ola, aali vamodha nuliye, mwaha nuulaya mugalilewu!” 60 Mbwenye, Peduru owoga egihina: “Mulobwana, kaginonelamo onawogiwe.” Mudhidhi yoole awogagave, mutubi wunla. 61 Nuwindo, Yesu omusugwa pamadhene Peduru, vano oliye wawubuwela madhu awogile Nabwiya egihina: “Peeno, mutubi ahinunle we onere ogikoodda dila tharu.” 62 Vano oliye ovenyavo ni wunla vanlubale.
63 Alobwana ale yampanre Yesu, obajha omuteya wula emuukuthaga; 64 vano numala omukuneela wintoni, aliwa wambela owoga yegihina: “Akala we oli namavuhulela, kamuwoge uvadile?” 65 Ni yomuruwana vanlubale.
66 Vigasile, anamaholela a anlogo, anddimuwa aanamakutha vamodha ni anamaleba otugumana, vano aliwa omuthukulela oSinediriyu ni owoga yegihina: 67 “Akala we oli Kiristu, kanaddele.” Mbwenye Yesu wawakula egihina: “Naarive gahuwaddeleni wihina dimiyene, newene kamwaarumedhe. 68 Ohiya eyo, gahukoheni ethu, nyu kamwande ogaakula. 69 Mbwenye obajha peeno odhowa osogolo nyu munere omoona Mwaana Muthu agakarante moono woojha wa kopolo wa Mulugu.” 70 Mwaha wa yeyo athu aatene omukoha yegihina: “Eyo, enatapulela wihina we oli mwaana a Mulugu?” Yesu wawakula egihina: “Nyu dinawoga wi dimiyene.” 71 Aliwa owoga yegihina: “Mwahaya bwaddi nigaahowela anamoona? Iyo nannya nihimwiwa awogaga ni mulomo waye.”