Dhowera Dhaarumiwi
20 Okangana wule nuvuguwa, Pawulo oruma wihina yithaniwe anamahara, vano numala walibiha oliye wapaganya, omaruwa odhowaga oMasedoniya. 2 Oliye weedda murudda dhaatedhene dha sidadi yeele aalibihaga anamahara ni madhu owinjhiva, nuwindo oliye ofiya oGeresiya. 3 Omala mweri miraru agaali wewule, mbwenye woona wihina maJudewu yahimpanganela wihina empe mudhidhi afunaga wabuwela waSiriya, oliye ohogolowela oMasedoniya. 4 Aveleliwaga ni Sopater mwaana Piru ooBereya; Aristarku ni Segundu yaali ooTesalonika, Gayu ooDerbi; Timotiyu aali oAziya, Tikiku ni Trofimu. 5 Alobwana ala osogola onijhehaga oTorowadi. 6 Iyo wabuwa oFilipu, nuuvira malabo a Pawu dhohikanna Emela, vano nuumala malabo matanu iyo ogumana oTorowadi, wengo namanlihuwo malabo matanu nameeli.
7 Labo noobajha na sumana, nugumanela wihina nijhe vamodha, Pawulo obajha owoga naathu yaale yaali vamodha ni iyo, woona wihina labo noharela eere omaruwa; wenjhedhedha mwaha ole awogiye ofiyedha vaari va mahiyu, 8 mbwenye sala yodhulu natugumanihuwo, yahikalawo malampada owinjhiva. 9 Muzombwe dhaala ithaniwa Ewutiku, akiratile vajanelani sala yanatharu yodhulu obajha ogona mwaha wa kove dhanfwanye, oliye omora wengo wula Pawulo awogaga mwaha waye wavathaddo. Vano aliwa nuunvenyiha enfwanye agakwile. 10 Mbwenye Pawulo okita, omuworomela ni omukubarela egihina: “Kamukubanye vano oliye ohuvenya.”* 11 Pawulo ohogolowela vasala vaaliye, nuwindo oliye ogwadda pawu otakuna. Oliye omala mudhidhi wowinjhivene awogagave, ofiyedha vati osa, vano oliye omaruwa odhowaga. 12 Vano aliwa omuthukula muzombwe ole agaali apamene teto aliwaya egaali ootodoleyene.
13 Iyo osogola, ofiya waali mwanddeya vano iyo wabuwela oAsoji, wengo nafunihu omwakelela Pawulo aakitaga, mwaha oliye anaddele ndo woona wihina afuna adhowewo ni moddo. 14 Vano oliye nunifwanya oAsoji, iyo omwaakela mburo vinimela mwanddeya, numala iyo odhowa oMitileni. 15 Iyo okuma wewule vano labo noharela iyo odhowa oKiyu. Labo nimodha omaga olenddo mowaguva iyo odhowa oSamuji, labo noharela iyo ofiya oMiletu. 16 Pawulo ahithoma wihina ahimele oEfezu, oovaga ojha mudhidhi wowinjhivene elabo yoAziya, woona wihina aaguvela oJeruzale teto dhandeya afiye labo na Mathanga a Pentekoste.
17 Mowindo, oliye agaali oMiletu wawithaniha anamaholela mulogo oEfezu. 18 Aliwa nuufiya, oliye wawaddela egihina: “Nyu muhoona pamadhene mweeddelo waaga ngaali ni nyu, obajha labo gifiyilimi elabo yenyu yoAziya: 19 gihimulabela Nabwiya ninga mudhaari ni wiyeviha watewene ni mutori, goonaga goyi mwaha dila dhowinjhivadhene maJudewu ogipanganela wihina egipe; 20 mudhidhi mmodhave, kaginahiyege wuwaddelani dhithu dhukavihereni,* newene wuhudhihani vaari vaathu aatene, nyumba ni nyumba. 21 Mbwenye miyo gihavaha onamoona wowakwana maJudewu ni aGerego wihina ethwaruwe ni emuhogolowele Mulugu ni ekanne nroromelo na Nabwiya ehu Yesu Kiristu. 22 Vano nnikavihero* na muzimu wotxena, ginadhowa oJeruzale naarive gihinonne ethu enaagipadduwele wengo, 23 mbwenye ethu ginonnimi sowihina, kadda sidadi, muzimu wotxena onogaddela dila dhowinjhivadhene wihina ginere omagiwa ni woona goyi. 24 Mwaha wa yeyo, kaginathabwa ovaha thima egumaaga;* mbwenye yathimaya fuumariha othamaga waaga ofiyedha omakuthulo ni wamariha mabasa oolaleya Nabwiya Yesu agithomeliye: wili ovaha onamoona wowakwana wa muthenga dhapama wodhela opama wohinifwanelela wa Mulugu.
25 “Vano, gihinona wihina kavo mmodha wa nyu gimulaleyimi wodhela Omwene, anoone kove yaaga dila biili. 26 Vano, nyu peeno muli anamoona wihina kaginna nibili vamentoni vaathu aatene, 27 mwaha gihulaleyani wodhela efunelo yaatene ya Mulugu. 28 Mwisugwerege mwaannya vamodha ni mambila* maatene, mwaha muzimu wotxena buuthommeni* wihina mwaholelege ni mukukulege mulogo wa Mulugu, agunliye nnikame na Mwanaye. 29 Gihinona wihina miyo gadhowa, vaari veenyu vinere ovolowavo mwiijhi dhowopiha, dhihinaweddihege mambila nuudhivela, 30 Vaari veenyu, vinere okumelela athu enaaviriganihege ebaribari wihina yalekethe anamahudhera wi yaharege aliwa.
31 “Mowindala, mukale mento teto kamuddiwale wihina muwari mwa yaka tharu mahiyu ni mutana, kagihile wukongomedhani kadda muthu wa nyu ni mutoridha. 32 Vano miyo ginuhiyani mmadani mwa Mulugu ni madhu aye enna opama wohinifwanelela yubareleni, madhu enafuna wulibihani ni enuvaheni mburo vaari vaathu aatene oweela. 33 Kaginakalelege nrima parata, woru, newene dhowara dha muthu. 34 Nyu muhunona wihina madaaga alena yowakwaneliha dhithu dhaatedhene dhagihalela ni dhaathu amodha. 35 Mwadhatedhene, gihuwonihani wihina mwalabaga ndala nuuviheya, kamuddiwalege wakavihera athu enahowela nikavihero ni mwawubuwelege madhu a Nabwiya Yesu, enawoga yegihina: ‘Ovaha winothabwa ohagalasa opitha ovahiwa.’”
36 Nuumala wawoga madhu ala oliye okokora vamodha naaliwa, olobela. 37 Aatene wambela wunla vanlubale; nuwindo, omukubarela Pawulo ni ombejari nuudhivela, 38 mwaha yahukuuwa vanlubale thabwa-thabwa mwaha wa madhu aawogiliye egi, kinadha ehogolowela woona kove yaye. Nuwindo, aliwa onvelela wihina agwele mwanddeya.