Alebeliye Akudda Romanu

7 Addibila, (ginawagana ale yanonne malamulo) kamunonne wihina Nlamulo nnamuthonga muthu mudhidhi yoole aliye mento? 2 Motajhiha, muhiyana ateliwe ohumageya ni nlamulo na mamune mudhidhi mamune aliye mento, mbwenye mamuneya akwa, oliye ohutapuwa wodhela nlamulo nne na mamune. 3 Bumwahaya akala oliye onooteliwa ni mulobwana mmodha wula mamuneya agaali mento, ohukuma mba. Mbwenye mamune akwa, oliye ohutapuwa wodhela nlamulo na mamune, bumwahaya kineriwege ohukuma mba akala onooteliwa ni mulobwana mmodhaya.

4 Mowindala ni nyuwa addibilaga muhukwa mwaha wa Nlamulo, wodhela mwiili wa Kiristu, wihina mukale a ole avenyihiwe muukwani, wihina nivahe dhowima wa Mulugu. 5 Mudhidhi iyo nakalihuwo mowiwanana ni efunelo ya mwiili, Nlamulo nahoniha wihina munigwa dhabure dha mmwiilini* dhihinthukulela otheega teto otheega winonthukulela okwa. 6 Mbwenye peeno nihooboliwa Munlamuloni, mwaha nihikwa wodhela ele yanibarela, wihina nikale adhaari ni ekalelo exa, wodhela muzimu, ohiya mwamakalelo a kale, wodhela nlamulo nlebiwe.

7 Kivano nnaawoge ddi? Nerege Nlamulo yoothega? Newene! Ebaribariya sowi, nahere nahikala Nlamulo kaganone yoothega. Motajhiha, kaganone wihina gihikanna nrima, Nlamulo nahere nihiwoga negi: “Kukalele nrima.” 8 Mbwenye yoothega opatha ofuru wavahile malamulo ni ogitatamulela makalelo maatene a nrima, mwaha nahere nahikala nlamulo yoothega kayakalewo. 9 Bumwahaya, nlamulo nahinakalewo miyo gaali mugumi. Mbwenye nlamulo nuufiya, yoothega ele ohogolowa vano miyo okwa. 10 Teto malamulo gaaroromelimi wihina yeere ogivulusa ogithukulela omakwelo. 11 Vano yoothega epathaga ofuru yola ovahile malamulo, ogileketha, mwaha wa yeyo ogipa. 12 Mowindala, Nlamulove yekiwa thoweela, teto malamuloya boweela, bowogowa ni bapama.

13 Ni makalelo yaala, nerege ethu yapama, sigithukulele okwa? Mwebaribarene naari! Mbwenye yoothega serilena ndo wihina yooniwe ninga yoothega, egitatamulelaga okwa wodhela ele eli yapama, wihina wodhela malamulo yoothega ethabwe wenjhedhedheya obure enniwana. 14 Nihinona wi Malamulo boomuzimuni, mbwenye miyo gili oomwiilini, gigulihiwe ninga mudhaari a yoothega. 15 Miyo kaginonne enagithukulela werana ndo. Mwaha ele ginafunimi kaginanda werana, mbwenye ginerana ele giniiddimi. 16 Mowindo, akala ginowerana ele gihinafunimi, ginorumedha wihina Nlamulo thapama. 17 Mbwenye anerana kahi miyo, si yoothega evolowile mmwiilini mwaaga. 18 Mwaha gihinona wi wa miyo obe mmwiilini mwaaga, kaamo ethu yapama; gihikanna efunelo yowerana ethu yapama, mbwenye kaginanda. 19 Opama ginafunimi kaginanda werana mbwenye ginerana obure gihinafunimi. 20 Akala miyo ginerana ethu gihinafunimi, kahiyo miyo anerana mbwenye si yoothega eli mmwiilini mwaaga.

21 Mowindala, ginowoona nlamulo nna mmwiilini mwaaga: nni gafunaga werana ethu yapama, ogidhela ethu yabure. 22 Mwigumini mwaaga, miyo ginowadhivela vanlubale malamulo a Mulugu, 23 mbwenye ginowoona mmwiilini* mwaaga nlamulo nimodha niwanaga ni nlamulo na mubuwelo waaga nigithukulelaga okala mudhaari a nlamulo na yoothega eli mmwiilini* mwaaga. 24 Gili muthu ohifwanelela! Mmwiilini mwaaga mwihikala yoothega enagitotela okwa. Baani anaagivuluse? 25 Ginomutamalela Mulugu wodhela Yesu Kiristu Nabwiya ehu! Mowindala ni mubuwelo waaga, miyo gili mudhaari a nlamulo na Mulugu, mbwenye ni mwiili waaga gili mudhaari a nlamulo na yoothega.