Aamulebeliye Timotiyu
1 Miyo Pawulo, murumiwi a Kiristu Yesu, girumiwe ni Mulugu nvulusi eehu vamodha ni Kiristu Yesu, ejhehedhelo yehu, 2 ginulebela weene mwanaga Timotiyu* avati va murima ni amunroromeloni:
Opama wohinifwanelela, thagaraga ni murenddele wa Mulugu Baabi ni wa Kiristu Yesu, Nabwiya ehu, okale niwe.
3 Mowindala ninga gukongomedhimi wihina ohale oEfezu miyo gidhowaga oMasedoniya, ginowerana emodhave wihina wawaddele athu amodhaya wi ehihudhihege dhohudhiha dhinahiyana ni dhehu, 4 newene yahivuruwanege thalako dhowoota esayelaga onona dhamakolo a kale. Mwaha dhithu ndha kadhinna mpurelo, mbwenye dhinatatamula okangana ohiya odhihaga dhithu dhapama dhinadhela wa Mulugu dhinalibiha nroromelo nehu. 5 Mwebaribarene, efunelo ya dhoolaga ndha fudhivela onadha mwaha okanna murima woweela ni okanna mubuwelo wapama ni nroromelo nahinna ogwalagwambi. 6 Athu amodha ehihiya werana dhithu ndha ofiyedha olekethiwa, vano wambela okanganela dhithu dhahinna mabasa. 7 Enofuna okala anamahudhiha a nlamulo wula ehonelagamo dhithu dhinawogiwa, newene dhithu dhinawadeleliwa.
8 Mwebaribarene, nihinona wihina Nlamulo thapama, nalabihedhiwa mwamakalelo apama, 9 nihidduwalaga wihina malamulo kiyadhele athu owogowa, mbwenye yaadhele athu enaalupa malamulo, athu oohiwelela, athu abure ni anamatheega, athu oohuroromeleya ni anamanyemula, ale enaapa abaabiwa obe amayiwa, anamapa, 10 wa ale enawerana mararuwo,* alobwana enagonihana alobwanave, enawiya athu, aliba woota, athu enalibelela ebeweene, ni athu aatene yaale enaviriganiha dhohudhiha dheebaribari, 11 dhinadhela wa Mulugu oohagalala mowiwanana ni muthenga dhapama dhothithimiheya, githikeliwimi.
12 Ginomutamalela Kiristu Yesu Nabwiya ehu, agivahile kopolo ni agoonile okala oororomeleya, agithomelaga mutholo wokala murumiwi, 13 naarive kale miyo ngaali muliba onyemula, namaharahara ni ngaali muthu abure. Mbwenye, giheddeliwa thagaraga mwaha kaganona dhithu geresimina teto kaganna nroromelo. 14 Mbwenye Nabwiya ehu ogooniha opama waye wohinifwanelela oli winlubale, vano miyo wakela nroromelo ni odhivela wa Kiristu Yesu. 15 Madhu ala boororomeleya ni enofwanelela orumedhiwa ni murima waatene: Kiristu Yesu adhiile elabo ela yavati wihina awobole athu ootheega. Wa athu yayo, miyo gili oobajhaya. 16 Mbwenye giheddeliwa thagaraga wihina wodhela miyo athabwile otheega, Kiristu Yesu onihe ovilela waye waatewene, agilabihedhaga miyo ninga yotajhiha waathu yaale enaamuroromele wihina yakele egumi yohimala.
17 Vano Mwene amukalakala, ahinakwa ni oohoneya, Mulugu mmodha baahi, athithimihiwege ni arihiwege nimukalakala. Amem.
18 Mwanaga Timotiyu, ginowuvahedhela dhoxagiha ndha, dhiniwanana ni dhovuhulela dhiwogiwe wodhela we, ninga dhinawoga dhovuhulela ndha, odhowegeve owanihaga koddo yapama, 19 oganna nroromelo ni mubuwelo wohunyemela, yoyo athu amodha esukumiliwa, efiyedha oyelela nroromelo neewa. 20 Amodha waathu yayo di Eminewu ni Alixandere, gaapelekilimi mmadani mwa Saddana wihina ehudhihiwe* ohuruwana dhithu dhootaleleya.