Dhowera Dhaarumiwi
28 Vano nuumala ovuluwa, iyo woona wihina eliga naalihu yithaniwa Malta. 2 Athu yakala eliga yeele onaakela pama. Woona wihina oorubwa muzongwe ni wothabwa oridha, aliwa ohiddiha mootho. 3 Pawulo odhowa oreba kwini ogaasana mootho, vano mwaha wopaha okumavo evili omuluma nlada. 4 Athu a murudda yoole nuwoona nowa ele yowopiha egamuwadelele nlada, obajha owoga vikaleliwa yegihina: “Mwebaribareene mulobwana ola mpanga, naarive agandile wivulusa muniya bumwahaya Wogowa* kawimuhinye wihina akalewo.” 5 Mowindala, oliye otata nowa ele omorela vamoothoni teto newene kayamwerele ethu yabure. 6 Mbwenye aliwa yajhehedha wihina eere odhiba obe eere okwa mowaguva. Nujheha mudhidhi wowinjhivene ni nuwona wihina kiyampadduwele ethu yowopiha, vano osaddula mubuwelo wewa obajha owoga wihina oliye aali mulugu.
7 Murudda yoole wowaddamela, dhahikalawo mundda dha mulobwana a eliga yeele ithaniwa Pubiliyu; oliye onaakela pama vaade vaye iyo omalavo malabo mararu. 8 Vano ababe Pubiliyu okala aredda, yanna nipanddawe ni yera ovaluwa. Nuwindo Pawulo odhowa wawona walobelela watapulela nlada ni wavulumusa. 9 Eyo nupadduwa, aredda amodha a eliga yeele obajha omusayela wihina aavulumuse. 10 Ohiya eyo, aliwa onthithimiha ni nvaho dhowinjhiva, teto nifunaga wihina nagwele mwanddeya, onivaha dhithu nahowelihu.
11 Nuuvira mweri miraru, iyo omaruwa ni mwanddeya dhaala wanna osogolowa fotu ya “Amwaana Zewuji.” Mwanddeyaya wakuma wAlexandiriya, mudhidhi ole wooriidha yamanle egaali veeligani vevale. 12 Iyo wimela oSirakuza nuwindo omala malabo mararu nigaali wewule. 13 Nuukuma wewule iyo omaga olenddo odhowa oRejiyu. Nuuvira labo nimodha, iyo ofwanyiwa nipevo nakuma omadhelo nduwa, vano labo nooharela iyo ofiya oPuteewuli. 14 Wewule, iyo wafwanya addibila yaniwaddile wihina nikale naaliwa malabo matanu na menli. Nuwindo iyo odhowa oRoma. 15 Addibila ooRoma nuwiwa wihina neera odha, aliwa odhowa onijhehaga merkado wo Aapiyu, amodha odhowa okala nyumba tharu dhaaleddo wihina egumane ni iyo. Pawulo nuwawoona, omutamalela Mulugu ni olibiheya vanlubale. 16 Vano nuufiya oRoma, wenyiwa wihina Pawulo akalege vaade yeka, wula mutoropa amusugweraga.
17 Nuuvira malabo mararu, oliye wawithana alobwana athima amaJudewu. Aliwa nutugumana wawaddela egihina: “Alobwana ni nyu addibila, naarive miyo gihenrena ethu yabure wodhela nlogo nna obe wodhela walupa malamulo a makolo ehu, gihimagiwa oJeruzale opelekiwa mmadani mwakudda Roma. 18 Aliwa nuumala ogikoha, othoma wihina egitapule, mwaha kiyagifwannyena muladdu wafwanelela miyo opiwa. 19 Mbwenye woona wihina maJudewu yokodda wi gitapuliwe, miyo oloba wi gathongiwe mmadani mwa Sezare, kahiyo wi geere winkedha nlogo naaga. 20 Bumwahaya gidhe gilobege wihina guwoneni ni guwaddeleni wi gimagiwe ni makurenti ala mwaha ejhehedhelo yamwaana Ezarayeli.” 21 Aliwa omwaddela yegihina: “Iyo kanawakenle makarta oJudeya ewogaga wodhela muselu wawo, teto newene kawo addibila edhiile wongo enaaddela ethu yabure weriliwena. 22 Mbwenye iyo wubuwela wihina yeere okala yapama nnone mubuwelo wawo, mwaha ebaribari nnonilihu wodhela nikuru nno, sowihina dhipaddi dhaatedhene nnakala owogiwave obure.”
23 Nuwindo, labo nimodha aliwa wiwanana, athu owinjhivene odhowa omoona Pawulo vaade vakaliye. Vano, okuma mambesi ofiyedha mahiyu, oliye watapulelamo wodhela wavaha onamoona wowakwana wa Omwene wa Mulugu, asayelaga wadahinya murima wodhela Yesu mowiwanana ni Malamulo a Moyizeji ni Aanamavuhulela. 24 Athu amodha warumedha madhu awogiye; mbwenye amodhaya kiyafunne onvuruwana. 25 Nuwindo, woona wihina yovanyihana vikaleliwa, kadda muthu othukula dilaaye odhowaga, vano Pawulo owoga ethu emodha egihina:
“Muzimu wotxena ohuwoga ni makolo enyu, wodhela namavuhulela Izayiya wegi: 26 ‘Odhowe wawoge ni nlogo nno wegihina: “Mwebaribarene nyu munerege wiwa, mbwenye kamunonelegemo; munerege osugwa, mbwenye kamunonege. 27 Mwaha nlogo nna nihummiha murima wewa, aliwa ehafuga mabaru ewa ni mento ewa, wihina mento ewa ehonege newene mabaru ewa ehiwege, teto wihina murima dhewa dhahonelegemo ethu, vano aliwa ethwaruwe wi gaavulumuse.’” 28 Mowindala, munone wihina ovulusiwa ni Mulugu bwaathu aatene, teto aliwa mwebaribarene enere onvuruwana.” 29* ——
30 Nuwindo, oliye omala yaka biili, agaalive nyumba yeele abolihiye* ni owawakela pama athu aatene yadhowa omoona, 31 alaleyaga Omwene wa Mulugu ni ahudhihaga wodhela Yesu Kiristu nuuliba murima, ahinna makathamiho.