Aalebeliye Akudda Eberewu
12 Vano, woona wihina nihaapeliwa ni murabo munlubale wa anamoona, kabeni nirule dhithu dhaatedhene dhinaninyemela ni yoothega enanikwakwathusa nindo nthamage nuuvilela dila ntonyihedhiwihu, 2 nimusugwaga pamadhene Namasogolela Munlubale ni Mwinnya Nanviha a nroromelo nehu Yesu Kiristu. Mwaha ohagalala aakenliye, oliye ahivilelana okwa vantxikwani na goyi,* ahipwathile manyazo vano okarati moono woojha vampaddoni va Mulugu. 3 Mowindo, mmutajhihe ole agonjhihile dhowoga dhohikala pama dhaathu oothega yerana dhithu ninga mwafuneliwa wula yitorihaga annya, wihina munaagome newene munaseelele.
4 Koddo munawaniinyu wodhela yoothega ela, nyu kamunavilele, ofiyedha okuthula nikame neenyu. 5 Gerege muhuddiwala nikongomedho mwakenlinyu ninga baabi anawaddela anaaye egihina: “Mwanaga kulamuse yolaga enadhela wa Yehova* newene kuwukuwe wasumululiwaga nuliye.” 6 Mwaha Yehova* anaalaga ale anaadhiveliye ni anamuwaxula* ole anamooniye wihina di mwanaye.
7 Woona wi makalelo oolagiwa, mukale oovilela. Mulugu anuweddihani ninga anaaye. Mwaana baani ahinalagiwa ni ababe? 8 Mbwenye akala nyu kamunalagiwa ni Mulugu ninga enalagiwa ahima amodha, kamuli anaaye eebaribari muli ahima owafwanya. 9 Ohiya eyo, abaabihu yoonilaga teto nowaariha pamadhene. Iyo kanafwanelela omwiwelela Baabi eegumi yehu yoomuzimuni wihina nikalegewo? 10 Mwaha ababihu enibanle epaddi yomwiilini malabo mamodha yoonilaga mowiwanana niile yooniwa wihina sapama, mbwenye Baabihu oomuzimuni ananlaga wihina anikavihere teto nikale oweela ninga oliye. 11 Mwebaribarene kawo muthu anahagalala mudhidhi aalagiwaga mwaha winopiha mbani, mbwenye osogolowa dhoolaga ndha dhinowavaha dhowima dhamurenddele, dhapama ale enarumedha wihina exagihiwe.
12 Mowindala mwaalibihe mada enyu yahinna kopolo ni makuta enagurumela, 13 ni mudidele woogolela dila munavira manyalo enyu wihina muliba ooragala anaathabwe, ohiya wereya ndo avulumuwe. 14 Musayelege okanna murenddele naathu aatene ni okala oweela, mwaha muthu yoole ahinakale oweela kanande omoona Nabwiya. 15 Pole-pole wihina ahikalewo muthu anayelele wakela opama wohinifwanelela wa Mulugu teto anaakale musisi wa muthanko onapa ni onaatatamula makathamiho wanongaga athu owinjhiva, 16 pole-pole wihina vaari veenyu ahikalevo muthu anawerana mararuwo* newene muthu ahinavaha thima dhithu dhootaleleya ninga Ezawu aagulihe oneeti anniyena wookala mwaana oomusuza wodhela wakakaniha ni muziwo mmodha baahi wa yoojha. 17 Teto nyu muhunona wihina mudhidhi nuuvira, afunaga wawakela mareeliho oliye ahikooddiwa; mwaha naarive agaxixile owadda wula unlaga wi ababe esaddule yothoma ele, oliye kandile.
18 Nyu kamwaddamele mwango munandinyu ohidda ni mada ni moona ohiddaga ninga mootho newene ogaakuneeliwe ni murabo dhooriba, yiihi yowi yiihiwe, nnipevo ninlubale, 19 oruma wa palaza ni ndhu niwogaga. Athu aatene nuwiwa ndhu nne niwogaga oloba wihina nihiwoge dila biili. 20 Athu ale yowoova vanlubale nlamulo nawoga negihina: “Naarive akala mwanenyama adahinya mwango yoola onofwanelela opiwa ni mabwe.” 21 Ohiya eyo, yoopadduwa ele yaali yowoopiha vanlubale ofiyedha Moyizeji owoga egihina: “Gili woovave ni ginoogurumela.” 22 Mbwenye nyu muhaddamela mwango Siyawu ni luwani ya Mulugu ookalawo, Jeruzale oodhulu wengo wili matxikwi ni matxikwi aangero 23 etugumane nikuuru ninlubale. Wengo wili nikuuru naahima owaasuza yayo elebiwe mandina ewa odhulu wili Mulugu ali namatoriha aathu aatene ni wili athu owoogowa enna egumi yowiwanana ni kopolo dha muzimu wotxena yayo enakaviheriwa wihina ekale oologomana 24 ni Yesu ali namandaniha a nipangano nixa ni anikame naawunyeliwe, nnawoga pama okwaranya nikame na Abeli.
25 Pole-pole, kamukoodde onvuruwana ole anawoga. Mwaha kale, athu yaakoddile wavuruwana madhu a Mulugu kiyaavuluwile, ki weera iyo, neerege nnere ovuluwa naahinvuruwana ole anawoga agaali odhulu! 26 Mudhidhi yoole ndhu naye nahigurumeliha elabo yavati, mbwenye ovanene oliye ohupaganya: “Ginere ogurumeliha dila yanabiili elabo yavati ni elabo yodhulu.” 27 Madhu owi “dila yanabiili” enatapulela ovenyihiwavo wa dhithu dhinafuna ogurumelihiwa, dhithu dhisasanyiwe wihina dhihalevo dhithu dhihinaagurumelihiwe. 28 Mowindala, woona wi nnere wakela Omwene ohunagurumelihiwe, nidhowegeve nakelaga opama wohinifwanelela yoyo onanikavihera omparela Mulugu mabasa ootaleleya mwamakalelo anarumeedhiye nuwoova vamodha ni nthithimiho. 29 Mwaha Mulugu ehu, ali ninga mootho onanoonga.