Dhowera Dhaarumiwi
17 Nuwindo, aliwa weedda olenddo ovira wAnfipoli ni wApoloniya, vano ofiya oTesalonika wengo waali sinagoga dhaala ya maJudewu. 2 Ninga elemelelo yaye, Pawulo ovolowa wihina awoge naaliwa, omala a Sabadu araru ependdaga vamodha, alabihedhaga dholebela: 3 owatapulela ni owawonelihamo, mowiwana nindhe dhalebiwe wihina yohoweleya Kiristu woona goyi ni avenyihiwe muukwani. Oliye owoga egihina: “Ola di Kiristu, ola di Yesu, ginulaleyimini.” 4 Mwaha wa yeyo, athu amodha osaddula murima dhewa ni okanna nroromelo vano aliwa witaganyihedha ni Pawulo vamodha ni Silaji, teto muthithi waathu yaali aGerego yamwebedha Mulugu ni ahiyana owinjhiva yathabwa othithimihiwa, werana emodhave.
5 Mbwenye maJudewu okanna ajhe, watugumana alobwana abure yahanna mabasa yakaratesa vamerkadu, opandda nikuru newa obajha onyagula musidadi. Aliwa okupula nyumba ya Jazawu envedaga Pawulo ni Silaji, wihina emukumihedhe ode wa muthithi ole. 6 Woona wihina kiyafwannye, aliwa omwihidda Jazawu ni addibila amodha waadhowana wanamathonga a sidadi yeele, ekuwaga yegihina: “Alobwana ale enaninyonyesa elabwihu, ala nihahidda, 7 teto Jazawu dawakenle vaade vaye. Alobwana yaala aatene kinafuna wawiwelela malamulo a Sezare, enihina ohukalawo mwene mmodhaya anithaniwa Yesu.” 8 Nuwiwa dhithu ndha, muthithi ole waathu ni anamathonga a sidadi yeele okala oothuwathuwene. 9 Vano, numala wakela korowa yamuthomeliwa Jazawu ni athu amodha wihina etapuliwe, aliwa wahiya odhowaga.
10 Vati nuuriba, addibila omuruma Pawulo ni Silaji wihina edhowe oBereya. Aliwa nuufiya ovolowa musinagoga ya maJudewu. 11 Abereyano yahikanna murima wapama ohiyana ni akudda Tesalonika, yahaawakela madhu a Mulugu ni efunelo yaatene, yopwasedha wileri Dholebela malabo matene, wihina yoone akala dhithu yahudhihiwiwa dhaali dhebaribari. 12 Mowindo, owinjhiva wa aliwa ni ahiyana amodha owinjhiva yathabwa othithimihiwa yaali aGerego ni alobwana amodhaya, okanna nroromelo. 13 Mbwenye maJudewu yakala oTesalonika nuwiwa wihina Pawulo eera walaleya madhu a Mulugu oBereya, aliwa odhowawo wihina yaalige ni etatamule okangana. 14 Nuwindo, addibila omuruma Pawulo wihina adhowe sere-sere ya niya, mbwenye Silaji ni Timotiyu ohala wewule. 15 Vano athu yanvelela Pawulo, aliwa omuthukula onfiyana wAtena nuwindo aliwa ohogolowa, mbwenye yahivahedhiwa dhoholela wihina yamwaddele Silaji ni Timotiyu wi edhowe yagumane ni Pawulo mowaguva.
16 Wula yajhehaga wAtena, Pawulo otakaleliwa vanlubale nuwona wihina sidadi ele yaali dhikwamuthuve. 17 Vano wambela wahudhiha MaJudewu ni athu amodha yamulabela Mulugu musinagoga wihina yonelemo Dholebela; oliye owerana ndo kadda labo naaleya aagumaniyena vamerkadu. 18 Mbwenye mafilozofu amodha, aEpikurewu ni aEstoyiku, wambela okangana ni Pawulo, amodha yawoga yegihina: “Taduwa oyo anafuna awoge ddi?” Mbwenye amodha yawoga yegi: “Anakala ninga analaleya dhithu dha amulugu eelabo dhimodha.” Yawoga ndo mwaha oliye oolaleya muthenga dhapama wodhela Yesu ni ovenyihiwa muukwani. 19 Nuwindo, aliwa omwihidda omuthukulela otiribunale yinlubale yoAtena* ni omukoha yegihina: “Kanaddele, makalelo ala oohudhiha enadhela wuuvi? 20 Mwaha dhithu onawogiwe iyo kannonelamo, vano nnafuna nnone dhithu ndho dhinatapuleliwa.” 21 Mwebaribarene, athu aatene wAtena ni anyawedda yakala* wewule yoona wihina kiyanna mabasa owapara, yadhiveliwesa othapanyedha ni ovuruwana muselu dhixa. 22 Vano Pawulo wimela vaari vatiribunale yoAtena ni owoga egihina:
“Nyu akudda Atena ginowoona wihina mwa dhithu dhaatedhene munothabwa ovaha thima gereja wahiya athu amodhaya. 23 Motajhiha, giviraga gihoona pamadhene mburo dhotaleleya, teto gihinfwanya altare agalebiwe ayi: ‘Altare a Mulugu Oohunoneya.’ Hee, yoyo munamwebedhinyu wula mwahimunonne, diyoyo ginulaleyimini. 24 Mulugu apadduse elabo ni dhaatedhene dhilimo, Oliye ninga Nabwiya oodhulu ni elabo yavati, kanakala tempulu dhomagiwa ni mada aathu, 25 newene kanaahowela mada aathu wihina emukavihere, ekalaga ninga akala ethu enamuhalela, mwaha oliye onowavaha athu aatene egumi, muuya wovumana ni dhithu dhaatedhene. 26 Wodhela opaddusiwa wa mulobwana mmodha, okumelela athu a malogo aamatene wihina ekalege elabo yaatene yavati, oliye othoma mudhidhi ni wasakulela mburo wofwanelela wafunegiwa okalawo, 27 oliye oherana ndala wihina athu enfiyedhe Mulugu ni emusayelege ofiyedha onfwanya, woona wi kali wolapela wa kadda muthu wa iyo. 28 Mowindo, mwaha wa oliye nihikanna egumi, nnowiddiginya ni nnokalawo, ninga ewogile anamaleba amodha enyu, yegihina: ‘Nihiyoya nili anaaye.’*
29 “Woona wihina nili ahima* a Mulugu, kanubuwelege wi Mulugu oyo analigana ni woru, parata, mabwe obe ethu muthu ubuweliye ofiyedha osema. 30 Ebaribari wihina Mulugu kapwathile mudhidhi waatene ovirile athu ehimunonne, mbwenye vano oliye anna wawaddela athu aatene enakala mburo dhaatedhene wihina ethwaruwe. 31 Mwaha oliye ohusakula nlabo anadhiye atorihe elabo yaatene yavati ni wogowa, wodhela muthu amuthomiliye. Teto oliye oharoromeliha athu aatene wodhela onvenyiha muukwani.”
32 Nuumwiwa awogaga wodhela ovenyihiwa wanookwa, amodha wambela omuteya, mbwenye amodha yawoga yegihina: “Iyo nnere ohogolowela wuvuruwana dila biili.” 33 Nuwindo, Pawulo ovenyavo mburo yoole, 34 mbwenye amodha witaganyihedha nuliye vano okala makiristawu. Wa athu yaala, ahikalavo Diyoniziyu, aali namatoriha atiribunale yoAreyopagu ni muhiyana dhaala ithaniwa Damariz ni athu amodhaya.