Karta Noobajha Naakudda Tesalonisense

2 Mwebaribarene addibila, nyu muhunona wihina olenddo weehu nadhilihu wuwaredhelani kawaali weebewene. 2 Ohiya eyo, nyu muhunona wihina naarive nigoonile goyi ni naheeddihiwe pama oFilipu, iyo nahimaga murima nnikavihero na Mulugu ehu wihina nulaleyeni muthenga dhapama dha Mulugu, naarive nthabwaga widdiwa. 3 Dhithu ndha nnukongomedhihuni seebaribari, teto kannuwaadelani ni efunelo yabure wihina nuuleketheni, 4 woona wi Mulugu ohunisakula wihina nilaleye muthenga dhapama, kannawoga ni nyu wihina naahagalase athu mbwenye nnawoga wihina nimuhagalase Mulugu anapendda murima dhehu.

5 Mwebaribarene, nyu muhunona wi iyo kannaawogege madhu owuutamalelani wula yahili yeyo, newene kannisinjhedhege wula niganna nrima; Mulugu namoona! 6 Newene kanivedile othithimihiwa naathu, naari, newene nthithimiho nenyu obe naathu amodha, naarive niganna oneti oyo, ninga arumiwi a Kiristu, iyo kanuunyemeliheni mutholo wonisamaalela. 7 Mbwenye iyo naali athu ookweya vaari veenyu, ninga mayi anawamwiha ni anaasamalela pamadhene anaaye. 8 Mowindo, mwaha odhivela wa vati vamurima ninnihuna ni nyu, efunelo yehu kiyaali wulaleyani baahi muthenga dhapama dha Mulugu, mbwenye nihivelela egumi yehu wihina nukavihereni, mwaha wi nnowudhivelani vanlubale.

9 Addibila, mwebaribarene nyu munowubuwela wilibihedha weehu ni mabasa ooviheya naapanrihu. Iyo noolaba mutana ni mahiyu wihina nihunyemeliheni mutholo wonisamalela, nlaleyaga muthenga dhapama dha Mulugu. 10 Nyu vamodha ni Mulugu, muli anamoona wodhela mweeddelo wehu wororomeleya, wowogowa teto kananna muladdu ni nyu munna nroromelo. 11 Nyu muhunona wihina iyo nowukongomedhani, nowutodolani ni noomulaga kadda muthu wa nyu, mowindala ninga baabi anaweriyena anaaye, 12 wihina mudidele weedda mwamakalelo enamuhagalasa Mulugu, anuwiithanelani Omwene waye ni nthithimiho.

13 Bumwahaya nigamutamalelaga Mulugu malabo aamatene, mwaha wi mugawakele madhu a Mulugu mwawiwalinyu ni iyo, kamwarumedhile ninga madhu aathu, mbwenye mwaarumedhile ninga madhu a Mulugu, enukaviherani nyu munna nroromelo. 14 Mwaha nyu addibila munohara yotajhiha ya mulogo dha Mulugu dhooJudeya dhili mwimodhani ni Kiristu Yesu, mwaha nyu muhonihiwa goyi ni awaninyu, goyi emodhave aliwa enonihiwiwa ni maJudewu akwiwa, 15 efiyedhile ompa Nabwiya Yesu ni anamavuhulela ni eniharahara nihiyoya. Ohiya eyo, aliwa kinamuhagalasa Mulugu ni enovanyiha efunelo yaathu aatene, 16 woona wihina enoxixa onikooddiha walaleya athu a malogo mamodha wihina evuluwe. Nimakalelo yayo enna odhaalihedha mpimo wa dhoothega dhewa. Mbwenye owali wa Mulugu ohanle vang’ono wihina wakitele.

17 Addibila, athu nuumala onimwalaniha ni nyu mudhidhi mung’onove, kananda ogumana mbwenye kanuuddiwaleni, nihikanna munukwela wowuwonani kove ni kove, teto nahiilibihedha vanlubale wihina eyo yereye. 18 Bumwahaya nofuna odha wuwaredhelani; hee, miyo Pawulo gihixixa, ohiya dila modha baahi mbwenye dila biili, naarive dhigaali ndo Saddana obara dila yehu. 19 Mudhidhi anahogolowe Nabwiya Yesu, ejhehedhelo yehu enakale eevi? Ohagalala wehu ni kara yehu vamentoni vaye? Kahi nyu? 20 Mwebaribarene nthithimiho ni ohagalala wehu di nyu.