Aalebeliye Akudda 1 Korintiyu
2 Mowindo addibila, mudhidhi yoole gaalimi vamodha ni nyu kaguwaddeleni yoviteya yootaleleya ya Mulugu ni madhu oorusa wawonelamo obe ni thotho dhotikiniha. 2 Bumwahaya, mudhidhi yoole ngaali ni nyu, kagafunne othuwathuwela dhithu dhimodha, ehili othuwathuwa wodhela Yesu Kiristu, yoyo apiwe vantxikwani. 3 Mudhidhi ngaali ni nyu gaali ookwerebeyene, gowoova ni googurumela vanlubale. 4 Teto dhithu gilaleyimi ni madhu aaga kiyaali madhu ooleketha newene athotho, mbwenye yaali yowoniha ya muzimu ni kopolo, 5 wihina nroromelo neenyu nihidhelege mwaha wa thotho dhaathu, mbwenye nidhelege mwaha wa kopolo dha Mulugu.
6 Nnawoga wodhela thotho enna athu owithwelavo,* ohiya thotho dheelabo newene thotho dhaanamathonga eelabo ela* enaagujhuliwe vohilegela. 7 Mbwenye, nnawoga wodhela thotho dha Mulugu dhikoyiwe ni dhoviteya dhootaleleya, Mulugu owogiliye kale elabo ela yabure ehinathi okalawo wihina nithithimihiwe. 8 Kaawo namathonga eelabo ela* anonne thotho ela, mwaha yahanone, kiyafiyedhe ompa* Nabwiya ehu oothithimiheya. 9 Mbwenye, ninga dholebela dhinawogiwa dhegihina: “Ninto kanoonile teto nibaru kaniiwile, newene athu kiyubuwele mmurimani mwewa dhithu ndha Mulugu awegeredheliye athu yaale enamudhivela.” 10 Mwaha Mulugu anaaddenle iyo wodhela muzimu* waye, woona wi muzimu onosanyiha dhithu dhaatedhene, ni dhithudha dhooddiha dha Mulugu.
11 Baani ananda onona dhithu anubuwela muthu mmodha, ohuli murima* wa muthu yoyo? Nimakalelo mamodhave kawo muthu anonne dhithu anubuwela Mulugu, ohuli muzimu wa Mulugu. 12 Teto iyo kanaakenle muzimu weelabo, mbwenye muzimu onadhela wa Mulugu, wihina nnone dhithu nivahiwihu ni Mulugu mwamahala. 13 Mwa dhithu dhendha iyo nnowoga ohiya ni madhu nihudhihiwihu ni thotho dhaathu, mbwenye ni madhu nihudhihiwihu ni muzimu, natapulelaga dhithu dhomuzimuni ni madhu oomuzimuni.
14 Muthu oomwiilini kanarumedha* dhithu dhomuzimuni dha Mulugu, mwaha oliye anoona ninga dhithu dhootaduwa; bumwahaya oliye kananda onona mwaha dhinapenddiwa nnikavihero na muzimu wotxena. 15 Mbwenye muthu aneeddihiwa ni muzimu wa Mulugu, onopendda dhithu dhaatedhene teto kawo muthu anamutoriha oliye. 16 “Baani afiyedhile onona mubuwelo wa Yehova* wihina amuhudhihe?” Mbwenye iyo ninna mubuwelo wa Kiristu.