Aalebeliye Akudda Eberewu

5 Mwaha namakutha aatene asakuliwe vaari vaathu anathomiwa wihina aakaviherege athu yayo ni dhithu dhiniwanana ni makalelo oomulabela Mulugu, wihina avelelege nvaho ni mukutho wodhela dhoothega dhewa. 2 Oliye onowanda wavilelana athu yahinna enonelo ni enaviriganiha, woona wihina nuuliyeya onohowela owanana dhokwerebeyiha dhaye, 3 mwaha wa yeyo onookuthela mukutho dhoothega dhaye mowindala ninga anaakutheliye athu amodha.

4 Muthu kaniithoma yeka okala namakutha munlubale, mbwenye Mulugu baahi dinamuthoma, mowindala ninga aamuthomiliye Abarawu. 5 Nimakalelo mamodhave, Kiristu kiithithimihile yeka iikosaga ninga namakutha munlubale, mbwenye aathithimihiwe ni Mulugu aamwaddele egihina: “We oli mwanaga; peeno miyo gili ababo.” 6 Ni onowogave epaddi emodhaya ya yolebela egihina: “We oli namakutha amukalakala ninga mwakalele Melekizedeki.”

7 Mudhidhi agaali elabo yavati, Kiristu ahilobela nuubebedha ni ndhu nootaama wula amorihaga mutori, amulobaga Ole aanna owedha woomobola muukwani, teto oliye ahakuliwa mwaha ekalelo yaye yoomoova Mulugu. 8 Naarive agaali mwaana, ohusuza okala owiwelela wodhela goyi ooniliye. 9 Nuumala wakwaneliha dhithu dhaatedhene, ovahiwa mutholo wowavulusa nimukalakala athu aatene yaale enamwiwelela, 10 mwaha woothomiwa ni Mulugu wihina akale namakutha munlubale ninga Melekizedeki.

11 Noofuna owoga dhithu dhowinjhiva wodhela oliye, mbwenye dhinonirusa wutapulelamoni, mwaha nyu kamunaaguva wonelamo dhithudha. 12 Mwebaribarene ofiyedha mudhidhi yoola nyu mweere okala anamasuziha, mbwenye munohowelave wihina muthu uhudhiheni okumana omambelelo dhithu dhoobajha dha madhu ootaleleya a Mulugu, vano muuhogolowela waamwa mukaka ohiya ojhaga yoojha yovaadda. 13 Mwaha muthu yoole anadidela waamwa mukaka kaanonne madhu owoogowa mwaha nivanove mwaana. 14 Dhoojha dhoovaadda dhinajhiwa naathu owithwelavo omuzimuni enna elemelelo yoxagiha mubuwelo wewa wihina yandege ohiyaniha ethu yapama ni yabure.