Aalebeliye Akudda Eberewu

6 Mowindala, woona wihina nihimala onona dhohudhiha dhoobajha wodhela Kiristu, nidhowegeve nunnuwelagavo epaddi yoomuzimuni, kanihogolowele dhohudhiha dhoobajha nihudherihu, ninga othwaruwa wodhela dhithu dhihinna mabasa ni omuroromela Mulugu, 2 dhohudhiha wodhela obaddiziwa, otapuleliwa mada, ovenyihiwa waanookwa ni otorihiwa wamukalakala. 3 Teto nnikavihero na Mulugu nnere withwelavo epaddi yoomuzimuni.

4 Wodhela athu yaale emanle waddeliwa ebaribari ni elawihile nvaho woodhulu, yakenle muzimu wotxena 5 ni ehudhihiwe madhu apama a Mulugu ni kopolo dha dhithu dhinafuna wereya osogolo,* 6 mbwenye esukuma, kinandeya muthu wakavihera dila biili wihina ethwaruwe; mwaha aliwa ehimukomela dila biili Mwaana a Mulugu vantxikwani efiyedha omunyemula vaari vaathu. 7 Thaya enawakela mareeliho enakuma wa Mulugu yamala wang’wa manjhe a muzongwe ananyethiha dila dhowinjhivadhene, vano wambela omeliha dhithu dhinaakavihera ale elimile. 8 Mbwenye akala enoomeliha mwinga ni makupu ohukanna mabasa, enookoddiwa ni ehanle vang’ono wihina yulumeliwe; vano omakuthulowa epahiwe.

9 Mowindala addibila, naarive niwogaga ni makalelo yaala, kannanganyedha wihina nyu munna werana dhithu dhapama dhendho dhinuthukulelani ovulusiwa. 10 Mulugu dororomeleya, kadha aaddiwala mabasa enyu ni odhivela mutonyihedhinyu ndina naye, mwaha walabela oweela ni odhowagave mwaalabelaga. 11 Mbwenye nnafuna wi kadda muthu wa nyu, akanne oviheya wimodhave wihina ahanganyedhege ejhehedhelo ela ofiyedha omakuthulo, 12 wihina munaakale amangonya, mbwenye mwatajhihege ale mwaha wa nroromelo ni ovilela enaakela mpaganyo.

13 Mwaha Mulugu nuumpaganya Abaraawu, woona wihina kaaliwo muthu mmodha munlubale oofwanelela omulibelela, oliye wilibelela mwinya, 14 egihina: “Mweebaribarene ginere wureeliha ni ginere winjhiviha odhuulu wawo.” 15 Nuwindo, Abaraawu nuumala wooniha ovilela oliye wakela mpaganyo ola. 16 Mwaha athu enalibelela ndina na muthu munlubale wakwaranya aliwa, mbwenye olibela wewa fuumakuthulo wa muselu enakanganeliwa wi yoonihe wihina ele enawogiwa ebaribari. 17 Nimakalelo mamodhave, Mulugu afuna onihe pamadhene odhuulu wakele mpaganyo wihina efunelo yaye kiyasadduwe, bumwahaya adhe alibelege, 18 wodhela dhithu ndha biili Mulugu eriliyena dhahinasadduwa dhinowooniha wi Mulugu kadha ootaga. Dhithu ndho dhinonilibiha iyo nthawele okunguni, wihina nipareele pamadhene ejhehedhelo nivahiwihu. 19 Ejhehedhelo ela ninnihuna eli ninga nangura* eegumi yehu, teto enonikavihera okala ooliba nihovaga ethu, ejhehedhelo eyo enovolowa muwari ni odduli wa kurtina, 20 wengo Yesu avolowiyewo wihina anikavihere ni anifugulele dila: Oliye okala namakutha munlubale amukalakala ninga Melekizedeki.