Aamulebeliye Timotiyu

4 Mbwenye madhu oveetheliwa ni muzimu wotxena enoowoga pamadhene wihina osogolo were ofiya mudhidhi, athu amodha ehiye weedda munroromeloni, mwaha wavuruwana madhu oveetheliwa ni muzimu wooleketha, wula yeraga olekethiwa ni dhohudhiha dha ademoniyu, 2 yaharaga athu oogwalagwambi enawoga madhu owoota ni enna mubuwelo onakala ninga ofeeliwe ni mugogo wowoosa. 3 Athu ayo, enowakoddiha matelo ni enowawaddihedha athu otadha dhoojha Mulugu apaddusiliye wihina ale enna nroromelo ni yahinanganyedha ebaribari ejhege wula emutamalelaga. 4 Bumwahaya, dhithu dhaatedhene apaddusile Mulugu dhapamave, teto akala ehakeliwa nuutamalela kikalewo ethu yotadha, 5 mwaha dhihitxenihiwa wodhela madhu a Mulugu ni nlobelo.

6 Wawaddela dhoolaga ndha addibila, we onere okala murumiwi apama a Kiristu Yesu, anajhihiwa ni madhu a nroromelo ni makalelo apama ohudhiha onaahariwe mororomeleya. 7 Mbwenye orabele thalako dhowoota dhinamunyemula Mulugu ninga ndhe dhinawogiwa ni ahiyana anakalaba. Ohiya eyo, yoluba yawo ekale wixagiha wihina omulabelege Mulugu. 8 Wixagiha muthu aneriyena wihina awalihe mwiili waye, wihikanna mpurelo vang’ono. Mbwenye omulabela Mulugu winomukavihera muthu mwa dhithu dhaatedhene, mwaha oliye onowawakela mareeliho ovanene ni aneere wawakela osogolo. 9 Madhu ala boororomeleya ni enofwanelela warumedha ni murima waatene. 10 Bumwahaya nnolaba nuuviheya ni nnowilibihedha, mwaha ejhehedhelo yehu enadhela wa Mulugu ookalawo, ali Namoobola aathu aatene, thabwa-thabwa waale eli oororomeleya.

11 Odidele wahudhiha ni walamula wihina yeregena dhithu ndha. 12 Kuwenye muthu wulamusa* mwaha wokala muzombwe. Ohiya eyo, okale yotajhiha yapama yaale enna nroromelo wodhela makalelo awo oowoga, mweeddelo wawo, odhivela wawo, nroromelo nawo ni ohukanne nihonya. 13 Ofiyedha mudhidhi yoyo ginafunimi odha, wilibihedhegeve wileri vaari vaanamwinjhi, walibiha ni wahudhiha. 14 Kulamuse gari onniwena, ovahiwiwe wodhela yovuhulela mudhidhi anamaholela mulogo yutapuleliwa nlada. 15 Openddege dhithu ndha ni opwasedhege pamadhene, wihina wunnuwelavo wawo epaddi yomuzimuni woniwege ni athu aatene. 16 Okale pasope ni mweeddelo wawo ni makalelo awo oohudhiha. Odidele werana dhithu ndha, mwaha weragana ndo, onere ovulusa egumawo vamodha naleya enuvuruwana.