Ovuhulela wa Juwawu
19 Nuuvira dhithu ndha, miyo wiwa ethu yakala ninga ndhu na muthithi waathu nikumaga odhulu negihina: “Munvuwihe Yehova!* Ovulusiwa, nthithimiho ni kopolo mwinya di Mulugu ehu, 2 mwaha makalelo aye ootoriha beebaribari ni bowogowa. Mwaha oliye ohumutoriha namararuwa munlubale yoyo anonga elabo yavati ni mararuwo* aye, teto oliye ohumuhogolosela kunyawunya mwaha wa nikame naadhari aye.” 3 Aliwa ohogolowela owoga dila yanabiili yegihina: “Munvuwihe Yehova! Mwiisi wa namararuwa ole apahiwe onerege othuwelave ni mukalakala.”
4 Anamaholela ale 24 ni angero ale annayi, okokora ni omwebedha Mulugu akiratile vampaddoni vaye voomwene, yegihina: “Amem! Munvuwihe Yehova!”
5 Ohiya eyo, okuma ndhu vampaddoni vomwene negihina: “Munvuwihe Mulugu ehu, nyu aatene muli adhaari aye munamoova, ang’ono ni anlubale.”
6 Nuwindo, miyo wiwa ethu yakala ninga ndhu na muthithi waathu, oruma wa manjhe owinjhiva ni oruma wa dari, negihina: “Munvuwihe Yehova,* mwaha Yehova Mulugu ehu Akopolo Dhaatedhene, ohambela othonga! 7 Kabeni nihagalale nuuhagalala wowinjhiva, nimuthithimihe, mwaha ehifiya matelo a Mwana Nimbila, teto mwariyeya ohumala wiwegeredha. 8 Hee, Oliye ohaddeliwa wihina aware dhowara dha linyu oojajala, oojerimela ni oweela, mwaha dhowara dha linyu oojajala anatapulela mabasa owogowa yaapanre athu oweela.”
9 Vano mungero ole ogaaddela egihina: “Kaleba: Oohagalala baathu yaale yithaneliwe vamathangani a matelo a Mwana Nimbila.” Oliye ogaddelave egihina: “Ala bimadhu eebaribari a Mulugu.” 10 Nuwindo, miyo okokora vamentoni vaye wihina gimwebedhe. Mbwenye oliye ogaddela egihina: “Pole-pole! Kuwerena ndo! Miyo gili mudhaari mukwawo ni aaddibilo enna mabasa oovaha Onamoona wa Yesu. Omukokorele Mulugu! Mwaha efunelo ya dhovuhulela fuvaha onamoona wa Yesu.”
11 Miyo woona odhulu wigafuguwe vano okumelela kavalo ootxena. Ole aamugwenle kavaloya anithaniwa Oororomeleya ni Eebaribari, oliye onatoriha ni anawana koddo ni wogowa. 12 Mento aye yakala ninga nlumi na mootho, teto vamuru vaye vahikala kara dhomwene dhowinjhiva. Oliye ohukanna ndina nlebiwe, nihinoniwe ni muthu mmodha, mbwenye anonne yeka, 13 ni ahaawara malaya yaddonddeliwe nikame; oliye onowithaniwa Madhu a Mulugu. 14 Ohiya eyo, anyakoddo oodhulu yomuhara ni akavalo ootxena, aliwa yawanre dhowara dha linyu oojajala, dhootxena ni dhoweela. 15 Owanoni waye winokuma supadda noolapa ni nowirwa wihina aapena athu a malogo. Oliye anerege wakukula ni muddooddo wa mujhila. Ohiya eyo, oliye ononyingalela mburo munakamuliwa uva a onyanyuwa ni owali wa Mulugu Akopolo Dhaatedhene. 16 Malaya aawanriye vatakwiniva* vahilebiwa ndina nowi: Mwene amamwene ni Nabwiya aanabwiya.
17 Teto gahimoona mungero mmodhaya agimenle vanduwani, oliye okuwa ni ndhu nootaama ithanaga balame dhavava odhulu egihina: “Kadhaani mutugumane wuno, wihina mwaajhe mathanga manlubale a Mulugu, 18 mudhe mutakune muruthu dha mamwene, dha anamasogolela aanyakoddo, dhaathu akopolo, dha akavalo naaleya yaagwenle, muruthu dhaathu aatene, alobwana, athu ootapuwa, adhaari, ang’ono ni anlubale.”
19 Vano miyo omoona mwanenyama owoopiha ni mamwene a veelaboni yavati vamodha ni anyakoddo ewa egatugumane wihina ewane koddo ni ole akiratile vakavaloni, vamodha naanyakoddo aye. 20 Mwanenyama owoopiha ofwanyiwa vamodha ni namavuhulela owoota, yoyo eeresana dhintelelo osogolo waye aalekethiyena ale yakenle yintelelo ya mwanenyama owoopiha ni yakokorela ekwamuthu yaye. Egaali amentweene, aabilene ovokedhiwa vanthiyani na mootho nnapaha ni enxofere. 21 Mbwenye athu owinjhiva yapiwe ni supaadda noolapa nakuma owanoni wa ole aakaratile vakavaloni. Teto balame dhaatedhene orubala muruthu* dhewa.