Dhowera Dhaarumiwi
24 Nuuvira malabo matanu, namakutha munlubale Ananiya, anamaholela vamodha ni muliba wakulela muladdu* dhaathu ithaniwa Tertulu, aliwa odhowa omusumela Pawulo, wa musadoro. 2 Tertulu nuwithaniwa, oliye okala oobajha omwinkedha egihina:
“Ninna ojhavo murenddele mwaha weenyu, teto mwaha wothonga pama, nlogo nnowedda pama; 3 bumwahaya nnowutamalelani vanlubale mwaha mudhidhi wamutene ni mburo dhaatedhene iyo nnowona eyo yereyaga, Oothithimihiwa Felikisi. 4 Mbwenye wihina nahithabwe wujhelani mudhidhi, wodhela opama weenyu nnaloba munivuruwane mowaguva. 5 Moonelo wehu, mulobwana ola mulili wowopiha, mwaha onowatuja maJudewu aatene ni athu avelaboni yavati ohawiwelela anamathonga teto oliye namaholela a nikuuru naNazirewu. 6 Ohiya eyo, oliye ohunyemula tempulu; mwaha wa yeyo iyo omwihidda. 7* —— 8 Mwamukoha, munere woona wihina dhithu niwogilihu kannomwinkedha.”
9 Nuwindo, maJudewu walibihedha madhu ale awogiliye wihina ebaribari. 10 Vano musadoro nunvaha ofuru wowoga, Pawulo wakula egihina:
“Gihinona wihina muli namatoriha a nlogo nna muwari mwa yaka dhowinjhivadhene, mbwenye ginowoga ni ebaribari gihovaga ethu wihina giibarele. 11 Ninga munonilinyu, okuma labo gidhowilimi oJeruzale wihina gamukokorele Mulugu ofiyedha peeno, kinavire malabo 12. 12 Aliwa kigifwanyile gikanganaga ni muthu mutempulu, newene gatujelaga athu mmasinagoga obe mburo mmodhene wa sidadi* yeela wihina yahawiwelelege anamathonga. 13 Newene aliwaya kinna ebaribari wodhela dhithu ndha enaginkedhiwa vamentoni veenyu. 14 Mbwenye miyo ginorumedha wihina: Mweeddelo waaga onowiwanana ni webedha aliwa enithaniwa nikuuru nixa, yeyo ginaparimi mabasa ootaleleya a Mulugu a makolo aaga ni giroromelaga dhithu dhaatedhene dhilebiwe Mmalamuloni ni anamavuhulela. 15 Miyo gihikanna ejhehedhelo emodhave aliwa enniwana, wihina Mulugu aneere wavenyiha muukwani athu owogowa* ni athu ohogowa.* 16 Mwaha wa yeyo, malabo aamatene ginowilibihedha wihina gikanne mubuwelo wapama vamentoni va Mulugu ni vaathu aatene. 17 Nuuvira yaka dhowinjhivadhene, miyo ohogolowela oJeruzale wihina gidhowena dhovelela dha nlogo naaga ni gapeleke mukutho. 18 Wula geddihaga muselu ndha, aliwa ogifwanya mutempulu ngamanle witxeniha mowiwanana ni nlamulo, mbwenye kuwalivo muthithi waathu newene kagitatamule okangana. Ohiya eyo, yahikalavo maJudewu a elabo yoAziya 19 yafwanelela odha vamentoni veenyu wihina evahe onamoona akala mwebaribarene gihikanna muladdu naaliwa. 20 Obe alobwana yaala eli vala ewoge ethu baani yowopiha gerilimina, mudhidhi yagithukuleliwa muSinediriyu. 21 Ehili madhu yaale gawogilimi ngaali vaari vewa gegi: ‘Peeno miyo ginatoriheliwa mwaha ovenyihiwa wanookwa.’”
22 Vano, woona wihina Felikisi ahinona pamadhene wodhela Dila ya Nabwiya, oliye ohiya muladdu ole ni owoga egihina: “Ginamujheha Liziya namasogolela aanyakoddo akita vano ginere wuwaddelani ethu munafuninyu weera.” 23 Oliye omuruma munlubale aanyakoddo wihina anaamutapule, mbwenye anvahe mwana ofuru ni awoge ni nlogo naye wihina envahege dhithu ahoowelegiye.
24 Nuuvira mwana malabo, Felikisi odha ni mwariye Drusila aali muJudiya; oliye oruma wihina adhiwena Pawulo wi awogemo enavolowelavo ddi omuroromela Kiristu Yesu. 25 Mbwenye Pawulo nubajha owoga wodhela wogowa, wivanya ni otoriha winaadhe osogolo, Felikisi wambela woova ni owoga egihina: “Vano podi ovenyavo vamentoni vaaga, mbwenye guhowelaga ginowuwithaniha dila biili.” 26 Mudhidhi mmodhave, ubuwela wihina Pawulo eere onvaha korowa. Mwaha wa yeyo akalesa omwithanihave wi athapanye nuliye. 27 Vano nuuvira yaka biili, Porsiyu Festu omuhaba* omwene Felikisi; teto woona wihina efunelo yaye yaali wahagalasa maJudewu, oliye onfugela Pawulo mukambura.*