Dhilebiwe ni Juwawu
20 Labo noobajha na sumana, Mariya Madalena ofiya omahame* mambeseene, mbwenye vaali vihinase, vano oliye woona wihina nibwe naafugiwena omahame wule nahisusihiwawo. 2 Nuwindo, othamaga odhowa ogumana ni Simawu Peduru ni namahara mmodha, yoole Yesu athabwesiye omudhivela ni wawaddela egihina: “Ehinvenyihamo Nabwiya mmahame teto kannonne empwehiliwawo.”
3 Vano, Peduru ni namahara mmodhaya othamagela omahame. 4 Aabilene othamagelawo, mbwenye namahara ole omuhiya Peduru mundduli okala oobajha ofiya omahame. 5 Nuturumelamo, oliye woona dhowara dha linyu dhigahiwe vevale mbwenye kavolowilemo. 6 Vano, Simawu Peduru ahanle mundduli nuufiya, ovolowa mmahame mune woona dhowara dha linyu ndhe dhigahiwe vevale. 7 Teto, guwo yapwehiwe omusoloni waye ni guwo dhimodha kadhaalivo, mbwenye dhere ovidigeleliwa opwehiwa mburo mmodhene. 8 Vano, namahara ole aali oobajha ofiya omahame nuuvolowa, woona ni okanna ebaribari. 9 Mwaha aliwa yaali yahinathi woonelamo Dholebela dhawoga wihina oliye eere ovenyihiwa muukwani. 10 Nuwindo, anamahara ale ohogolowela vaade.
11 Mbwenye, Mariya ohala vamahame vale unlaga. Mudhidhi yoole unlagave oworoma ni oturumela mmahame mune 12 wawoona angero abiili egawanre guwo dhotxena, egakiratile mburo vapwehiwe muruthu wa Yesu, mmodha omusoloni mmodhaya omoddoni. 13 Angero ale omukoha yegihina: “Muhiyana we onunlela ddi?” Oliye wakula egihina: “Yeere omuthukulamo Nabwiyaga, teto kaginonne wimpwehiliwa.” 14 Numala wawoga madhu ala, oliye orugunuwa omoona Yesu agimenle vevale, mbwenye koonelamo wihina aali Yesu. 15 Yesu omukoha egihina: “Muhiyana we onunlela ddi? Ki onamusayela aani?” Ubuwelaga wihina aali muliba omurepela jardi, oliye omwakula egihina: “Nabwiya, akala di nyu amuthukunle, kagaaddeleni mburo mumpwehilinyuwo wihina gamuthukule.” 16 Yesu owoga egihina: “Mariya!” Oliye orugunuwa omusugwa vano owoga ni Ebarayiku egihina: “Raboni!” (enatapulela: “Namahudhiha”) 17 Yesu omwaddela egihina: “Kugipare, mwaha kaginadhowe wa Ababa. Mbwenye odhowe wawaddele addibilaga were: ‘Miyo ginadhowa wa Ababa, ni wa Baabi enyu, wa Mulugu aaga ni Mulugu enyu.’” 18 Mariya Madalena wawaddela muthenga ole anamaharaye egihina: “Miyo gihimoona Nabwiya!” Ni wawaddela dhithu Yesu amwaddenliye.
19 Vati vahimalaga oriba, naali labo noobajha na sumana teto nyumba mwaligi anamahara aye musiwodha dhahimala ofugiwa mwaha wawoova maJudewu. Yesu okumelela vaari vewa ni owoga egihina: “Murenddele okale ni nyu.” 20 Numala wawoga madhu ala, oliye wawoniha madaye ni mbararunimwa. Vano anamaharaye ohagalala mwaha womoona Nabwiya. 21 Yesu owogave dila biili egihina: “Murenddele okale ni nyu. Mowindala ninga Ababa egirumiliwa ni miyoya ginowurumani.” 22 Numala wawoga madhu ala, oliye wavudhelela muya waye ni owoga egihina: “Mwakele muzimu wotxena. 23 Nyu mwaalevelela athu dhoothega dhewa, aliwa enere oleveleliwa; mbwenye mwahilevelela dhoothega dhewa, aliwa kinaleveleliwe.”
24 Mbwenye Tome, mmodha wa anamahara ale 12 aalemeliwena ni ndina na mwanapata, Yesu nuudha oliye kaalivo. 25 Nuwindo, anamahara amodha omwaddela yegihina: “Iyo nihimoona Nabwiya!” Mbwenye oliye wawakula egihina: “Miyo gihawoona mabamba ammadani mwaaye mwakomeliwiye peregu, teto gihahidda mabambaya mwakomeliwiye ni gihoona bararudha, miyo kaginarumedha.”
26 Nuuvira malabo matanu natharu, anamaharaye otugumana mburo mmodhave yaaliwa, Tome aali vamodha naliwa. Naarive musiwodha dhigaali dhofugiwadhene, Yesu okumelela vaari vewa ni owoga egihina: “Murenddele okale ni nyu.” 27 Nuwindo, Yesu omuloba Tome egihina: “Kapweha vala embuno yawo ni kaasugwe mada aaga; katapula nlada nawo ohidde bararu yaaga. Ohiye wanganyedha* vano orumedhe.” 28 Tome omwakula egihina: “Nabwiyaga, Mulugwaga!” 29 Yesu omukoha egihina: “We orumedhele mwaha ogooniliwe? Oohagalala baathu yaale ehigoonile, mbwenye naarive dhigalive ndo ehirumedha.”
30 Mwebaribarene, Yesu ahawerana matikiniho owinjhiva vamentoni vanamaharaye, mbwenye mamodha kilebiwe rolu yeela. 31 Mbwenye ala elebeliwe wihina murumedhe wi Yesu di Kiristu, Mwaana a Mulugu, ni mwaha woorumedha mukanne egumi, wodhela ndina naye.