Ovuhulela wa Juwawu
20 Miyo omoona mungero akitaga odhulu aganna xavi ya muliddi wooddiha ni agaparele kurenti ninlubale. 2 Oliye ohidda nowa enlubale, nowa eraajhi ali Ddiyabo Saddana, nuwindo oliye ommaga muwari mwa yaka txikwi.* 3 Ni onvokedha mmuliddini mooddiha, ofugawo ni omarelawo omulagowa wihina aselele waaleketha athu amalogo, ofiyedha ovira yaka txikwi. Amala aneere okumihiwa mwana mudhidhi vang’ono.
4 Nuwindo miyo woona mpaddo dhoomwene mbwenye ale yakiratele mpaddo ndha yahivahiwa owedha wotoriha. Hee, gahoona dhigumi* dhaathu yapiwe mwaha ovaha onamoona wodhela Yesu ni owoga wodhela Mulugu. Teto miyo wawoona ale yahamukokorele mwanenyama owoopiha ni ekwamuthu yaye ni yahakenle yintelelo vakoveni ni mmadani. Aliwa yahihogolowela okalawo ni enere othonga vamodha ni Kiristu muwari mwa yaka txikwi. 5 (Athu amodha yakwile kiyahogolowele okalawo ofiyedha ovira yaka txikwi.) Wula fuvenyihiwa wanookwa woobajha. 6 Oohagalala ni oweela di muthu yoole anaakale epaddi ya nikuuru noobajha ovenyihiwa muukwani; mwaha okwa wanabiili athu yaala kunaafwanye, mbwenye enaakale anamakutha a Mulugu ni a Kiristu teto eneere othonga vamodha nuliye* muwari mwa yaka txikwi.
7 Vano yaka txikwi ndha dhamala, Saddana aneere okumihiwa mukambura, 8 oliye aneere okuma wihina aalekethe athu amalogo aatene enakale dhipaddi nayi dheelabo yavati, ali Gogi ni Magogi wihina etugumanele owana koddo. Winjhivawa enakala ninga mutxesa wa muniya. 9 Aliwa omwadheyela elabo yaatene yavati ni wapeela musasa waathu oweela ni luwani anadhivela Mulugu. Mbwenye okuma mootho odhulu wapaha athu ayo. 10 Vano Saddana aalekethesa athu yawo, ovokedhiwa vanthiyani na mootho ni na enxofere, wengo waali mwanenyama owoopiha vamodha nnamavuhulela owoota. Aliwa enerege wonihiwa goyi mutana ni mahiyu ni mukalakala.
11 Nuwindo miyo woona mpaddo womwene munlubale ni wotxena Nuleya aakiratilevo. 12 Gahawoona anookwa, anlubale ni ang’ono, egimenle osogolo wa mpaddo womwene nuwindo ofuguliwa rolu. Anookwa otorihiwa ni dhithu dhalebiwe muroluni mowiwanana ni dhowera dhewa. 13 Niya wapeleka athu yakwelemo, okwa ni mahame* wapeleka anookwa yaali mwemmo; kadda marafula otorihiwa mowiwanana ni dhowera dhaye. 14 Okwa ni mahame* ovokedhiwa vanthiyani na mootho. Nthiya na mootho nnatapulela okwa wanabiili. 15 Ohiya eyo, muthu yoole ahanna ndina mulivuruni neegumi ovokedhiwa vanthiyani na mootho.