Dhowera Dhaarumiwi
13 Wantiyokiya yahikalawo anamavuhulela ni anamahudhiha ammulogoni amurudda yoole, mandinaya baala: Barnabe; Simiyawu, aalemeliwe ni ndina na Nijeri; Lusiyu ooSireni; Manaye, aahudhihiwe ni Erodi, musadoro amurudda ni Sawulo. 2 Wula emulabelaga Yehova* ni ethugaga, muzimu wotxena wawaddela wegihina: “Munvenyihevo Barnabe ni Sawulo wihina edhowe yapare mabasa gawithanelimi.” 3 Vano, aliwa numala othuga ni olobela, aliwa watapulela nlada ni wahiya odhowaga.
4 Nuwindo, alobwana ale yarumiwe ni muzimu wotxena, aliwa odhowa oSelewusiya numala wabuwela oXipere. 5 Nuufiya oSalamina, wambela walaleya madhu a Mulugu musinagoga mwaJudewu. Juwawu aali vamodha naaliwa aakaviheraga.
6 Nuumala weedda eliga yaatene ofiyedha oPafu, aliwa onfwanya muJudewu dhaala ithaniwa Barjezuji, aali mukwiri ni namavuhulela owoota. 7 Oliye amulaba musadoro* athotho ithaniwa Serjiyu Pawulo. Oliye omwithana Barnabe ni Sawulo, mwaha oofuna wawiwa madhu a Mulugu. 8 Mbwenye Elima, mukwiri ole (ala makalelo ootapulela ndina naye), wambela waharahara, ni efunelo yomutujela musadoro wihina ahiroromelege dhithu dhawogiwa. 9 Nuwindo Sawulo, ithaniwa Pawulo, odhaaleliwa muzimu wotxena ni omusugwa pamadhene mulobwana ole 10 owoga egihina: “Mulobwana we odhaaleliwe obure ni dhithu dhaatedhene dhonyakavala, mwaana a Ddiyabo, mwiddani a dhithu dhaatedhene dhowogowa, onaaselele alini okoromaniha dila dhowogowa dha Yehova?* 11 Ovuruwane nlada na Yehova* nili niwe, we kunoonege onere ovira mudhidhi wowinjhivene ohoonaga waara wa nduwa.” Vohilegela ofwanyiwa funga ni yiihi, oliye wambela wapeela vimodhave amusayelaga muthu wihina amuhiddele nlada amweddihege. 12 Musadoro nuwona dhithu dhaapadduwe, osaddula murimaye, mwaha ahidhiveliwa dhohudhiha dha Yehova.*
13 Pawulo nakwaye amodha athananiyena wabuwela oPafu ni oddemulela oPerji, elabo yoPanfiliya. Mbwenye Juwawu wahiya, ohogolowela oJeruzale. 14 Nuwindo, aliwa ohogolowela olenddo wewa, aliwa okuma oPerji ofiya wAntiyokiya, elabo yoPisidiya. Labo na Sabadu ovolowa musinagoga aliwa okarati. 15 Nuumala wileriwa Malamulo ni dholebela Dhaanamavuhulela, anamaholela amusinagoga wawaddela yegihina: “Addibila, mwakanna madhu mamodha oolibihana nlogo, podi wawoga.” 16 Nuwindo, Pawulo ovenya, owoga ni mada egihina:
“Nyu athu oWizarayeli ni nyu amodhaya munamoova Mulugu, nvuruwane! 17 Mulugu a nlogo nna ni oWizarayeli, ohasakula makolwihu; oliye ohuthithimiha nlogo naye mudhidhi ekalaga Wijipitu ninga anyawedda ni wavenyihawo ni moono waye wakopolo. 18 Teto, oliye ohumala yaka 40, aavilelagana mudhidhi egaali mwiddeddereni. 19 Vano numala watolosa malogo 7 elabo yoKana, oliye wavahedha elaboya okala yewa. 20 Dhaatedhene ndo dhereye muwari mwa yaka 450.
“Nuwindo wathoma anamathonga ofiyedha mudhidhi wa Samuweli, namavuhulela. 21 Vano aliwa omuloba mwene, Mulugu wavaha Sawuli mwaana Kiji, oliye aali a nihimo na Benjami teto ahimala yaka 40 aathongaga. 22 Numala omwaaka omwene, omusakula Davidi wihina akale mwene, ole omuwogiliye, egihina: ‘Gihinfwanya Davidi mwaana Jese, anahagalasa murima waaga; duliyene anerena efunelo yaaga.’ 23 Wodhela mpaganyo waye ni odhuulu* wa mulobwana yoole, Mulugu ohumudhana Wizarayeli namavulusa, ali Yesu. 24 Oliye ahinafiye, Juwawu olaleya nlogo naatene noWizarayeli obaddiziwa watapulela othwaruwa. 25 Mbwenye, Juwawu amalaga wapara mabasaye, owoga egihina: ‘Nyu munihina miyo gili aani? Miyo kagili oliye. Mwebaribarene, anadha mundduli mwaaga, ohugikwaranya miyo, newene kaginafwanelela otapula sandaliya dhaye.’
26 “Nyu addibila, ni odhuulu wa Abaraawu ni nyuwa munamoova Mulugu, muthenga ola wovulusa aaddeliwe di iyo. 27 Mwaha athu enakala oJeruzale ni anamaholela ewa kiyandile omunona nvulusi ola, mbwenye, aliwa nuwambela owoga ninga anamatoriha, ehawakwaneliha madhu Anamavuhulela enileriwa ni ndhu nootama aSabadu aatene. 28 Naarive ehinfwanyena muladdu wamuthukulele opiwa, aliwa omuwadda Pilatu wihina arume opiwa. 29 Numala, wakwanela dhithu dhaatedhene dhalebiwe wodhela Yesu, aliwa omukitiha vantxikwani vale odhowa onvita mmahame.* 30 Mbwenye Mulugu onvenyiha muukwani, 31 teto, malabo owinjhivene, oliye ahigumana naale yaakumile vamodha nuliye oGalileya edhowaga oJeruzale. Vano aliwa enna ovaha onamoona nlogo wodhela oliye.
32 “Mowindo, iyo ninna wulaleyani muthenga dhapama wodhela mpaganyo waddeliwe makolwihu. 33 Mulugu ohakwanihedha pamadhene vamentoni veehu ni vaaninyu, anvenyihaga Yesu muukwani, mowindala ninga anawoga Salmu anabiili egihina: ‘We oli mwanaga, peeno miyo gili ababo.’ 34 Teto mwaha Mulugu onvenyiha muukwani wihina mwiili waye ohudhe ovudda, Oliye owoga egihina: ‘Miyo ginere omoniha madhu oororomeleya a odhivela wahinamala, gimpaganyimi Davidi.’ 35 Bumwahaya, yolebela emodha ya Salmu egawoga yegihina: ‘Kamunamwenye wihina oororomeleya eenyu afiyedhe ovudda.’ 36 Davidi ohumparela mabasa Mulugu,* mudhidhi waye, oliye okwa odhowa ovuheeliwa ni makolwaye nuwindo oliye ovudda. 37 Mbwenye ole avenyihiwe ni Mulugu kafiyedhe ovudda.
38 “Bumwahaya, addibila, munone wihina mwaha wa mulobwana yoyo, dhinna olaleyiwa wi dhoothega dhenyu dhihileveleliwa, 39 teto, wodhela oliye, muthu yoole anaroromela anoniwa ninga muthu ahinna nibili na dhithu dhaatedhene afuniye wooniwa wihina ohukanna nibili wodhela nlamulo na Moyizeji. 40 Pole-pole, wihina enaadhe yupadduweleni ethu emodhave ewogile Anamavuhulela: 41 ‘Kasugwani, anamanyemula nyu, mutikine mbwenye munere orimela, mwaha ginna waapara mabasa malabo enyu, mabasa mwahinadhinyu mwarumedha naarive mwaddeliwe dhaatedhene.’”
42 Ekumaga musinagoga, athu wambela waloba wihina ehogolowele owoga muselu dhimodhave Sabadu ooharela. 43 Mutugumano yanniwana musinagoga numala, maJudewu ni athu amodha yaarumedhe okala maJudewu ni yamwebedha Mulugu omuhara Pawulo ni Barnabe, vano ewogaga naaliwa, wakongomedha odidela okannave opama wohinifwanelela wa Mulugu.
44 Sabadu ooharela, athu owinjhiva a sidadi yeele otugumana wihina yaavuruwane madhu a Yehova.* 45 Majudewu nuwona muthithi ole waathu, obajha okanna nrima vano wambela ovanya ni onyemula dhithu awoga Pawulo. 46 Vano Pawulo ni Barnabe nuuliba murima wawaddela yegihina: “Yohoweleya nyu okala oobajha waddeliwa madhu a Mulugu. Mbwenye woona wi muhakoodda ni muhiitoriha wihina kamunafwanelela wakela egumi yohimala, vano iyo nnere wahogolowela athu amalogo. 47 Mwaha Yehova* ohuniruma egihina: ‘Miyo guhusakula wi okale waara wa malogo, wihina olaleye muthenga woovulusa ofiyedha wigomele elabo.’”
48 Athu amalogo yiwaliwa muthenga ola, yahihagalala, obajha wathithimiha madhu a Yehova,* vano aatene yaale yanna efunelo yapama yegumi yohimala, wambela ororomela. 49 Ohiya eyo, madhu a Yehova* yeera ovuwihiwa murudda yoole waatene. 50 Mbwenye maJudewu watuja ahiyana oothithimiheya ni yamoova Mulugu, ni alobwana amodha athima a sidadi yeele; wambela omuharahara Pawulo ni Barnabe ofiyedha wawigara murudda wewa. 51 Vano aliwa otata nthubi na manyalo ewa, wihina okale onamoona waathu yaale, nuwindo aliwa odhowa wIkoniyu. 52 Teto anamahara yodhowave eganna murenddele ni muzimu wotxena.