Karta Nanatharu na Juwawu

1 Mulobwana owuluvala, Gayu, ginudhivelimi ni murimaga waamutene.

2 Ddibilaga ginudhivelimi, ginowulobelela wihina dhithudha dhuweddelege pama ni okanne egumi yapama ninga yeyo onniwena ovanene. 3 Miyo gihagalala vanlubale addibila nufiya ni nugaddela wihina ohupareela pamadhene ebaribari, ni onna weeddave mwibaribarini. 4 Teto giiwaga wihina anaaga enna weeddave mwibaribarini, eyo enogihagalasa vanlubale.

5 Ddibilaga ginudhivelimi, we oli oororomeleya ni mabasa onapareliwe addibila naarive ohanonne. 6 Aliwa ehivaha onamoona wa odhivela onniwena vamentoni va mulogo waatene. Kawerena, warume mulenddoni mwewa mwamakalelo apama a Mulugu. 7 Bumwahaya aliwa ehimaruwa ni ndina na Mulugu wihina elaleye, yahijhehedhaga wakela ethu ni nlogo. 8 Mwaha wa yeyo nihiyoya nnofwanelela wawakela addibila ninga yayo wihina naariganele waapara mabasa ala amwibaribarini.

9 Gihilebela muselu mmodhaya mmulogoni, mbwenye Diyotrefi, anadhiveliwa okarati mburo wobajha akala naaliwa, kanarumedha muselu onakuma wa iyo ni nriho. 10 Bumwahaya gadha wengo, ginere wuwaddelani dhithu aneriyena ni dhowoota anavuwihiye wodhela iyo. Woona wi kanadhiveliwa, kanafuna wawakela addibila ni nriho, onoxixa wakooddiha ni wawigara addibila mmulogoni enafuna wawakela.

11 Ddibilaga ginudhivelimi, kutajhihege mweeddelo wabure, mbwenye oharege mweeddelo wapama. Mwaha muthu yoole anerana dhithu dhapama anadhela wa Mulugu. Mbwenye ole anerana dhithu dhabure kamunonne Mulugu. 12 Athu aatene enowoga opama wa Demetiriyu vamodha ni ebaribariya. Mwebaribarene, nihiyoya nnovaha onamoona wodhela oliye, teto nyu muhunona wihina onamoona nnavahihu bwebaribari.

13 Miyo gihikanna dhithu dhowinjhiva ginafunimi wulebela, mbwenye kaginafuna oleba ni muthethe* vamodha ni tinta. 14 Woona wi vohilegela, nnere ogumana wihina niwoge vamodha kove ni kove.

Murenddele okale ni we.

Akwawo enowaaruma malojhelo. Teto malojhelo aagaya, onvahedhege kadda muthu.