Dhilebiwe ni Matewuji
13 Labo nenne, Yesu okuma nyumba yeele odhowa okirati sere-sere ya niya. 2 Vano woona wihina muthithi waathu wamurijhile wahithabwa winjhiva, oliye odhowa ogwela mmwanddeyani okarati mommo, wula muthithi ole ogimenle sere-sere ya niya. 3 Vano wahudhiha* dhithu dhowinjhiva alabihedhaga dholaddaniha. Oliye owoga egihina: “Kavuruwanani: Namalima omaruwa wihina amidhe. 4 Amidhaga, thanga dhimodha omorela sere-sere ya dila, vano odha balame oddoddelavo. 5 Thanga dhimodha omorela vamabweni vaali thaya vang’ono, omela mowaguva mwaha thaya kayinjhivilevo. 6 Mbwenye nduwa nuwoba, onyala ni okwa mwaha kadhanna musisi 7 Dhimodha omorela vamwingani, vano mwinga ndhe nuwunnuwa ohoga. 8 Mbwenye dhimodha omorela vathayani yapama ni wambela ovaha dhowima, ovahamo okwaranya 100, dhimodha ovaha 60, dhimodha ovaha 30. 9 Ole anna mabaru owiwa avuruwane.”
10 Nuwindo anamaharaye odha ni omukoha yegihina: “Nabwiyani mwahaya bwaddi mwahudhihaga* mugalabihedha dholaddaniha?” 11 Oliye wawakula egihina: “Nyu muhuvahiwa ofuru wowonelamo dhoviteya dhotaleleya dha Omwene wodhulu, mbwenye aliwa kinna ofuru yoyo. 12 Mwaha ole anna, aneere ovahiwave, ni aneere wenjhedhedhiwa okunamo, mbwenye ole ahinna, naarive nileya anniyena aneere waakiwa. 13 Bumwahaya ngahudhiha* gilabihedhaga dholaddaniha; mwaha enosugwa mbwenye kinoona, ni enowiwa mbwenye eniwela ebewene, kinonelamo. 14 Teto aliwa enna wakwanihedha yovuhulela ya Izayiya enawoga yegihina: ‘Mwebaribarene nyu munerege wiiwa mbwenye kamunonelegemo, munerege osugwa mbwenye kamunonege. 15 Mwaha nlogo nna nihummiha murima dhewa, aliwa ehafuga mabaru ewa ni mento ewa, wihina mento ewa ehonege newene mabaru ewa ehiwege, teto wihina murima dhewa dhahonelegemo ethu, vano aliwa ethwaruwe wi gaavulumuse.’
16 “Mowindala oohagalala bimento enyu mwaha enowoona ni mabaru enyu mwaha enowiwa. 17 Bumwahaya ginowuwaddelani ebaribari: Anamavuhulela owinjhiva vamodha ni athu apama, yofuna woona dhithu ndha munooninyu mbwenye kayonile ni yofuna wiiwa dhithu ndha muniwinyu mbwenye kayiwale.
18 “Vano nvuruwane nladdaniho nanamaala bewu. 19 Muthu iiwa muthenga wa Omwene, mbwenye ahoonelamo pama, anodha Mwiddani oddulamo ele yaliwe mmurimani mwaaye, ela si bewu yaaliwe sere-sere ya dila. 20 Ele yaliwe vanibweni vili thaya vang’ono enatapulela ole anawiwa madhu anowarumedha mowaguva nuuhagalala. 21 Mwaha oliye kanna musisi mbwenye onolegela vang’onove teto afwanyiwa makathamiho obe oharahariwa mwaha wa madhu, kanaliba okwakwathuwa. 22 Ele yaliwe vaari va mwinga, enatapulela ole anawiwa madhu mbwenye munigwa wa elabo* ela vamodha ni kopolo dhowoota dhinna dhoreela, wabibiddela madhuya, vano okala muthu ahinavaha dhowima. 23 Bewu yaliwe thaya yapama, enatapulela muthu aniwa muthenga wonelamo enatapuleliwa, amala ovaha dhowima dhimodha 100, dhimodha 60 ni dhimodha 30.”
24 Wawaddela yoladdaniha emodha egihina: “Omwene wodhulu podi oladdanihiwa ni muthu aalile bewu dhapama mmunddani mwaaye. 25 Athu aatene egonaga odha mwiddani aye, waala ntaajhe vaari va tirigu ni odhowaga. 26 Vano tirigu nuwunnuwa, nuuvaha dhowima, ni ntaajhena okumelela. 27 Nuwindo adhaari a mwinnya a vaadeva odha ni omukoha yegihina: ‘Nabwiya mmunddani mweenyu kamwalile bewu yapama? Kito ntaajhe nne nidhele wuuvi?’ 28 Oliye wawakula egihina: ‘Mwiddani aaga derilena ndhodha.’ Adharaaye omukoha yegihina: ‘Nabwiya munafuna wihina naddulemo ntaajhe nne?’ 29 Oliye wakula egihina: ‘Naari, mwaha mwaddulaga ntaajhena munere omuddula vamodha ni tiriguya. 30 Muhiye yunnuwe vamodha ofiyedha mudhidhi wohadda, mudhidhi wohadda ginere wawerela anamahadda: Mwambele ogwadda nthaajhe ni mmage mapithika-mapithika wihina nipahiwe; mwamala mmuhadde tirigu mumpwehe vasasarani vaaga.’”
31 Oliye wawaddela yoladdaniha emodha egihina: “Omwene wodhulu onaligana ni thanga ya mostarda, muthu aathukunliye anowala mmunddani mwaaye. 32 Mwebaribarene naarive thanga ela egaali eng’ono okwaranya thanga dhimodha, yamela enowunnuwa ofiyedha okala muthanko munlubale, mommo balame dhinamagiwamo dhithunjhi dhewa.”
33 Wawaddela yoladdaniha emodha: “Omwene wodhulu onaligana ni emela athukunle muhiyana ataganyihedha ni mpimo miraru dhoothu, ofiyedha othu waatene onyakuwa.”
34 Yesu ahiwoga ni muthithi waathu, awaddelaga dhaatedhene ndha alabihedhaga dholaddaniha. Mwebaribarene kaavo ethu awogiye ahiladdanihe, 35 wihina yakwanele madhu anamavuhulela enawoga yegihina: “Ginere owoga gilabihedhaga dholaddaniha; ginere olaleya dhithu dhoviteya wambela labo epaddusiwe elabo.”
36 Vano Yesu nuumala opaganya muthithi ole waathu, oliye ovolowa mba. Anamahara aye omwaddamela ni omukoha yegihina: “Kanaaddelemoni yoladdaniha ya nthaajhe na mmuddani enatapulela ddi?” 37 Oliye wawakula egihina: “Namaala bewu dhapama di Mwaana Muthu; 38 mundda siilabo, mmidho wapama bahima oOmwene, mbwenye ntaajhe bahima a Mwiddani,* 39 mwiddani ole aalile ntaajhe di Ddiyabo. Mudhidhi wohadda fumakuthulo wa dhithu dhaatedhene,* anamahadda baangero. 40 Mowindo, ninga ntaajhe nnugeliwa nnopahiwa, emodhave enereye omakuthulo wa dhithu dhaatedhene.* 41 Mwaana Muthu aneere waruma angero aye, enere otugumana dhithu dhaatedhene Mumweneni mwaaye dhinakwakwathusa naaleya enaalupa malamulo, 42 ni yaavokedhe othukuthani ya mootho. Wengo funakale wunla nuutakuna meeno. 43 Mudhidhi yoyo athu apama enerege waara ninga nduwa, Mumweneni wa Baabiwa. Ole anna mabaru owiwa avuruwane.
44 “Omwene wodhulu onaladdanihiwa ni dhoreela dhitibeliwe omundda, vano mulobwana dhaala ofwanya ni otibela dila biili, mwaha wothabwa ohagalala, oliye odhowa oguliha dhaatedhene anniyena wihina agule mundda yoole.
45 “Ohiya eyo, Omwene wodhulu onaligana ni maliba weddiha malondda aneedda olenddo asayelaga nibwe noojerimela ni nookwima. 46 Nufwanya nibwe* noojerimela oliye odhowa mowaguva oguliha dhithu dhaatedhene aanniyena ni ogula nibwe nne noojerimela.
47 “Ohiya eyo, Omwene wodhulu onaligana ni nthavi nireyiwe muniya ni omaga oba dhohiyana-iyana. 48 Mbwenye nthavina nuudhala aliwa oburulela ode, okarati, osakulelamo oba dhapamadha opweha muyoboni, mbwenye dhaburedha aliwa orahilela okwibi. 49 Emodhave enereye omakuthulo wa dhithu dhaatedhene.* Angero enere odha wihina yasakulele athu abure ni athu owogowa, 50 ni yavokedhe othukuthani ya mootho. Wengo funakale wunla nuutakuna meeno.
51 “Muhonelamo dhithu dhaatedhene dhendha dhinatapuleliwa?” Aliwa wakula yegihina: “Hee.” 52 Vano oliye wawaddela egihina: “Mowindo, namahudhiha aatene anahudhihiwa* Omwene wodhulu analigana ni muthu, mwanamurala a vaade, anakumiha dhithu dhixa ni dhithu dhakale veringwini* vaye.”
53 Yesu nuumala owoga dholaddaniha ndhe, ovenyavo. 54 Nufiya sidadi aabaliwiye, oliye wambela wahudhiha* athu musinagoga mwewa, aliwa wambela otikina yegihina: “Mulobwana yola adhilena waani thotho ni kopolo dhowawerana matikiniho manlubale ninga yaala? 55 Ola kahi mwaana karapintero? Amayeya kahiyo ale enithaniwa Mariya, addibile kahi Tiyago, Juze, Simawu ni Judasi? 56 Arogoliyeya aatene kahiyo yaala eli vamodha ni iyo? Ki thotho dhandha adhilena waani?” 57 Nuwindo aliwa wambela okwakwathuwa mwaha wa oliye. Mbwenye Yesu wawaddela egihina: “Namavuhulela kanathithimihiwa elabwaaye newene vaade vaye.” 58 Kawerilena matikiniho manlubale mwaha aliwa kayanna nroromelo.