Dhilebiwe ni Juwawu
19 Nuwindo, Pilatu omuthukula Yesu ni oruma wihina atxapuliwe. 2 Atoropa oluwa kara yamwinga omuwariha musolo ni omuwariha malaya oofila, 3 teto yowaddamela vaaliye ni yowoga yegihina: “Kivuluse, Mwene amaJudewu!” Ohiya eyo, yonvada wintoni. 4 Pilatu okumela ode dila yanabiili ni owoga ni nlogo egihina: “Nvuruwane! Ginere omudhana vamentoni veenyu, wihina munone wi kaginoona muladduya munamusumelinyu.” 5 Nuwindo, Yesu okumela ode egamuwarihe kara yamwinga ni malaya oofila. Vano, Pilatu owoga egihina: “Muthwinyu ola!” 6 Vano, anddimuwa aanamakutha ni anamasugwera numoona, okuwa yegihina: “Akomeliwe vantxikwani! Akomeliwe vantxikwani!” Pilatu wawaddela egihina: “Mmuthukule mwaannya mwamukomele, mwaha miyo kaginona muladduya munamusumelinyu.” 7 Majudewu omwakula yegihina: “Iyo nihikanna nlamulo, thi nlamulo nenna nnamuthukulele opiwa, mwaha oliye ani mwaana a Mulugu.”
8 Vano Pilatu nuwiwa dhithu yawogiwa, othabwagave woova; 9 ohogolowela mba mwa musadoro ni omukoha Yesu egihina: “We oli a wuuvi?” Mbwenye Yesu kamwakunle ethu. 10 Nuwindo, Pilatu omukohave egihina: “We kunafuna ogaakula? Kunonne wi gihikanna owedha wowutapula obe woruma wihina opiwe?” 11 Yesu omwakula egihina: “Nyu nabwiya kamwakanne owedha wa miyo mwahere mwahivahiwa owedha winadhela odhulu. Bumwahaya, muthu agipelekile wa nyu, ohukanna yotheega enlubale.”
12 Mwaha wa yeyo, Pilatu owasayela makalelo wihina amutapule, mbwenye Majudewu yokuwa yegihina: “Nabwiya, mwamutapula mulobwana oyo, Sezare kahiyo mukwinyu. Mwaha muthu aniithukula egi miyo gili mwene, onomurugunuwela Sezare.” 13 Pilatu nuwawiwa madhu yaala, omuthukulela Yesu ode omukaratina mburo Vazilimiwe ni Mabwe vawogiwesa muladdu ni Ebarayiku enatapulela Gabata. 14 Naali labo Nomwegeredha Paskwa, waali mudhidhi wa 12. Oliye wawaddela maJudewu egihina: “Mweninyu ola!” 15 Nuwindo, aliwa okuwa yegihina: “Apiwe! Apiwe! Akomeliwe vantxikwani!” Pilatu wakoha egihina: “Gimpe mweninyu?” Anddimuwa aanamakutha omwakula yegihina: “Iyo kaninna mwene ahili Sezare.” 16 Mwaha wayeyo, Pilatu wavahedha mmadani mwewa wihina apiwe vantxikwani.
Vano, Yesu okala mmadani mwewa. 17 Numuthukuliha ntxikwa nne na goyi,* aliwa omudhowana mburo dhaala onithaniwa Mburo wa Dhigarigadhi,* ni Ebarayiku onatapulela Golgota. 18 Vano, nufiya mburo yoole, aliwa omukomela vantxikwani ni apanga abiili, mmodha moono woojha mmodhaya moono weemara, Yesu okala vaari. 19 Pilatu othukula tabwa, olebavo, okomela vantxikwani.* Madhuya yawoga yegihina: “Ola di Yesu, Munazarenu, Mwene amaJudewu.” 20 Majudewu owinjhiva yahawileri madhu yaale, mwaha mburo vakomeliwe Yesu wahaddamela musidadi. Teto madhuya yalebiwe ni Ebarayiku, Elatino ni Egerego. 21 Mbwenye, anddimuwa aanamakutha amaJudewu owoga ni Pilatu yegihina: “Kamulebevo: ‘Mwene amaJudewu,’ mbwenye mulebe ninga aawogiliye: ‘Miyo gili Mwene amaJudewu.’” 22 Pilatu wawakula egihina: “Gilebilimi, gihileba.”
23 Numala omukomela Yesu vantxikwani, atoropa othukula dhowara dhaye otala vaari okumamo dhipaddi nayi aliwa ogawana vaakaleliwa ni wathukula malayayeya. Mbwenye malaya ale kiyaali owasona, mwaha yaali guwo emodhave okuma odhulu ofiyedha vati. 24 Bumwahaya edhe ewogege vikaleliwa yegihina: “Kanaatale, mbwenye nivokedhane gari wihina nimoone baani anahalena.” Eyo yahereya wihina yakwanele Yolebela enihina: “Ehigawana ni ehivokedhana gari dhowara dhaaga.” Mwebaribarene, siyeyo atoropa yeriliwana.
25 Mburo ole vakomeliwe Yesu yahikalavo amaye, amaye ddibiliwa; Mariya mwaadha Kolopa ni Mariya Madalena. 26 Nuwindo, nuwawoona amaye ni namahara ole amudhivelesiye egamwaaddamele, Yesu wawaddela amaye egihina: “Mmani, oyo dimwaninyu!” 27 Voharela, oliye owoga nnamaharaye ole egihina: “Ayo bammawo!” Obajha labo nenne, namahara ole wathukulela owaniwa.
28 Nuwindo, Yesu nunona wihina dhithu dhaatedhene dhahimala wereya, wi dholebela dhakwanele, oliye owoga egihina: “Gihikanna nthona.” 29 Vevale, vahikala jaru yadhaale vinyu oowawa. Nuwindo, othukula esponja, obwiniha nvinyuni oowawa omagelela ommirini wa izopu* ni onvahedha wihina amung’we. 30 Numulawiha vinyu ole oowawa, Yesu owoga egihina: “Dhihakwanela!” nuworomiha muru vati, opeleka muzimu* waye.
31 Woona wi naali labo Nowegeredha, wihina muruthu ndhe dhahikaleve vantxikwani labo na Sabadu (mwaha Sabadu yoole naali labo ninlubale), maJudewu omuloba Pilatu wihina dhikotholiwe moddo dhaalobwana ale ni evenyihevo muruthu ndhe. 32 Nuwindo, atoropa odhowa okothola moddo dha mulobwana oobajha ni dha mulobwana mmodhaya akomeliwe epaddi emodha. 33 Mbwenye, aliwa nunfwanya Yesu, woona wihina ahimala okwa; bumwahaya, edhe yahikotholege moddo dhaye. 34 Vano mutoropa mmodha omulata mbararuni ni mwaalago, mohulegela okuma nikame ni manjhe. 35 Ole oonile dhithu ndho dhereyaga onovaha onamoona, teto onamoona waye bwebaribari ni ohunona wi anawoga ebaribari, wihina ni nyunwa murumedhe. 36 Mwebaribarene dhithu ndha dhaapadduwe wihina yakwanele epaddi ya Yolebela enihina: “Newene nikuva nimodha naye kannakotholiwe.”* 37 Teto, epaddi emodha ya Yolebela enawoga yegihina: “Enerege omusugwa ole emulatiliwa.”
38 Numala opadduwa dhithu ndha, Juze a elabo yo Armateya (aali namahara a Yesu, mbwenye mowipiteya, mwaha wawoova maJudewu) odhowa omukoha Pilatu akala oomweenyiha othukula muruthu wa Yesu, Pilatu omweenya. Vano oliye odhowa othukula muruthu wa Yesu. 39 Nikodemu, mulobwana adhowilege ogumana ni Yesu dila yobajha mahiyu, nuliyeya odhowa, agathukule makura ootaganyihedhiwa ni mira ni dhonukwela dhimodha, yanyemela kilu dhowakwana 33.* 40 Aliwa othukula muruthu wa Yesu opotha ni guwo dha linyu, vamodha ni dhonukweladha, mowiwanana ni elemelelo ya maJudewu yaafunaga wegeredha muruthu wihina wavitiwe mmahame. 41 Teto, mburo yoole vapiwe Yesu ahikalavo jardi, mujardi mune yahikalamo mahame maxa, muhunavitiwege muthu. 42 Woona wihina labo nenne maJudewu yeera Wiwegeredha teto mahame* ale yahawaddamela, aliwa othukula muruthu wa Yesu, odhowa ovita mwemmo.