Dhilebiwe ni Matewuji

25 “Omwene wodhulu onaladdanihiwa naanamwali* kumi yaparele panti dhewa enodhowa wihina yagumane nnamatela. 2 Atanu yaali oolodhowa, mbwenye atanu yaali ooxaga.* 3 Oolodhowa ale othukula panti dhewa mbwenye kiyathukunle makura, 4 mbwenye anamwali ale ooxaga wathukula makura wapweha mugarafwani mwewa, vamodha ni pantidhiwadha. 5 Woona wihina namatela ole eera othabwa olegela, aatene ofwanyiwa nikove ogonelavo. 6 Vaari vamahiyu eniwa okuwa wawoga wegihina: ‘Namatela ohufiya! Kakumani mmwakele.’ 7 Vano anamwali aatene ovenya ohiddiha panti dhewa. 8 Anamwali ale oolodhowa waloba anamwali ale ooxaga yegihina: ‘Kanivahemoni makura enyu mwaha panti dhehu dhihanle vang’ono nuuthima.’ 9 Anamwali ale ooxaga wakula yegihina: ‘Podi wera makura ninnihuna kinaakwana wihina nuvahemoni. Yeere owomela mudhowe winagulihiwa makura mwagule vang’ono.’ 10 Vano edhowaga wagula makura, namatelaya oofiya. Anamwali ale yamanle wiwegeredha ovolowa nuliye wihina yaajhe mathanga amatelo, vano musiwo ofugiwa. 11 Nuwindo ofiya anamwali amodha ewogaga yegihina: ‘Nabwiya, nabwiya kanifuguleleni!’ 12 Oliye wawakula egihina: ‘Ginowuwaddelani ebaribari: Miyo kagunonneni.’

13 “Mowindala, mukale mento mwaha kamunonne labona ni maworaya.

14 “Mwaha enaligana ni mulobwana anafuna weedda olenddo wolapela, mbwenye ahinamaruwe wawithana adhaari aye wahiyedha dhoreela dhaye. 15 Mmodha onvaha talentu* tanu, mmodha onvaha talentu biili, mmodhaya onvaha talentu modha, mowiwanana ni kadda muthu anafuniye nuwindo omaga olenddo waye ovenyavo. 16 Ole aakenle talentu tanu odhowa weddiha malonddaye, opuramo talentu dhimodha tanu. 17 Nimakalelo mamodhave ole aakenle talentu biili opuramo talentu dhimodha biili. 18 Mbwenye mudhaari ole aakenle talentu emodha baahi odhowa otiba muliddi vati, ovita korowa* ele yanabwiye.

19 “Nuuvira mudhidhi wowinjhiva nabwiya aadhaari ale ohogolowa, okarati naaliwa wihina oone korowa aahiyendhiye. 20 Mowindala ole aakenle talentu tanu odhana talentu dhimodha tanu ni owoga egihina: ‘Nabwiya mwagihiyedhe talentu tanu, mbwenye kasugwani gihipuramo talentu dhimodha tanu.’ 21 Nabwiye omwakula egihina: ‘Gihidhiveliwa vanlubale mudhaari apama ni oororomeleya! Ohuroromeleya naarive okabelelaga dhithu dhing’onove. Ginere wuthikela dhithu dhowinjhiva. Volowa ohagalale nnabwiyo.’ 22 Voharela ole aakenle talentu biili odha owoga egihina: ‘Nabwiya mwagihiyedhe talentu biili, mbwenye kasugwani; gihipuramo talentu dhimodha biili.’ 23 Nabwiye omwakula egihina: ‘Gihidhiveliwa vanlubale mudhaari apama ni oororomeleya! Ohuroromeleya naarive okabelelaga dhithu dhing’onove. Ginere wuthikela dhithu dhowinjhiva. Volowa ohagalale nnabwiyo.’

24 “Vogomihedhava mudhaari ole aakenle talentu modha odha ni owoga egihina: ‘Nabwiyani miyo gahinona wi muli muthu ookukusa ni munahadda vego muhudhanlinyu ni munatugumanya vego muhumwadhelinyuvo ethu. 25 Mwaha wowoova miyo othukula talentu yenyu odhowa otibela. Talentwinyuya ela.’ 26 Nabwiye omwakula egihina: ‘Mudhaari abure, mangonya eyo enatapulela wihina wahinona wi ginahadda vego gahalilimivo ni ginatugumanya vego gahimwadhelimivo ethu? 27 Ki odhe wahipwehege korowa* dhaaga mbanku, gahogolowegimi gere okanna mpurelo.

28 “‘Mowindala mmwaake talentu yeyo mmwinke ole anna talentu kumi. 29 Mwaha ole anna aneere ovahiwa ni aneere wenjhedhedhiwa okunamo. Mbwenye ole ahinna naarive nileya anniyena aneere waakiwa. 30 Munvokedhe mudhaari ola ohifwanelela ode ngo oyiihini. Wengo funakale wunla ni watakuna meeno.’

31 “Mwaana Muthu aadhaaga munthithimihoni mwaaye vamodha nangero, aneere okarati mpaddo waye wa nthithimiho. 32 Malogo aamatene aathu enere otugumanyiwa vamentoni vaye wihina aagawemo makuuru menli, ninga namakukula anahiyaniha mambila ni mbuzi. 33 Vano mambila aneere wapweha moono waye woojha, mbwenye mbuzi moono waye weemara.

34 “Mwene aneere owoga naale eli moono waye woojha egihina: ‘Mudhe aatene nyu mureelihiwe ni Ababa, mwakele omwene mwegeredheliwinyu okuma mudhidhi epaddusiwe elabo. 35 Mwaha miyo gahivoliwa mbwenye nyu ogivaha yoojha, gahikanna nthona mbwenye nyu ogivaha manjhe. Miyo gaali munyawedda mbwenye nyu ogaakela vadevinyu; 36 gaali madave* mbwenye nyu ogiwariha. Gahikala muredda mbwenye nyu ogisamalela. Gahifugeliwa mukambura mbwenye nyu mwahidha ogoona.’ 37 Vano athu ale owogowa omwakula yegihina: ‘Nabwiya, munavoliwaga alini iyo nuvahani yoojha, obe munakannaga alini nthona iyo nuvahani manjhe oong’wa? 38 Nuwonileni alini ninga munyawedda nnowuwakelani vaade, obe mugaali madave nuwarihani? 39 Nuwonileni alini mugaali aredda obe mugafugeliwe mukambura nnodha wuwoonani?’ 40 Mwene aneere wawakula egihina: ‘Ginowuwaddelani ebaribari: Yeele mwawerelinyu addibilaga, nimiyowa muhugerela.’

41 “Vano aneere wawerela ale eli moono waye weemara egihina: ‘Kasusavoni vamentoni vaaga owulumeliwanyu; mudhowe mootho wamukalakala eegeredheliwe Ddiyabo vamodha nangero aye. 42 Mwaha gaavoliwa mbwenye kamugivanhe yoojha, gahikanna nthona mbwenye kamwagivanhe manjhe oong’wa. 43 Miyo gaali munyawedda mbwenye nyu kamugakenle vadevinyu; gaali madave mbwenye nyu kamugivanhe yowara; gaali muredda, gahifugeliwa mukambura mbwenye nyu kamudhile ogoona.’ 44 Vano naaliwaya enere wakula yegihina: ‘Nabwiya, nuwonileni alini mugavoliwe dala, muganna nthona, obe mugaali munyawedda, obe mugaali madave, mugaali muredda obe mugavokedhiwe mukambura, nuhusamalelani?’ 45 Oliye aneere wawakula egihina: ‘Ginowuwaddelani ebaribari: Ele muhawerelinyu athu yaala ang’ono, ni miyowa kamugerele.’ 46 Mowindo athu yaala enere otolosiwa nimukalakala,* mbwenye athu owogowa enere wakela egumi yohimala.”