Ovuhulela wa Juwawu
6 Miyo gahimoona Mwaana Nimbila atapulaga selu modha ya selu ndhe 7, ni gahimwiwa mungero mmodha wa angero ale annayi awogaga ni ndhu nakopolo egihina: “Kadhawuno!” 2 Nuwindo, miyo omoona kavalo ootxena. Ole aamugwenle ahikanna nthere* ni ahivahiwa kara yomwene, oliye omaruwa wihina aagonjhihe amwiddani aye.
3 Oliye nufugula selu yanabiili, miyo omwiwa mungero anabiili egihina: “Kadhawuno!” 4 Nuwindo, okumelela kavalo mmodhaya oofila ninga mootho. Aamugwenle kavalo ole waddeliwa wihina avenyihevo murenddele elabo yavati wihina athu epananege mmodha ni mukwaye, bumwahaya adhe avahiwege supadda ninlubale.
5 Oliye nufugula selu yanatharu, miyo omwiwa mungero anatharu egihina: “Kadhawuno!” Miyo omoona kavalo ooriba. Aamugwenle kavalo ole ahikanna balansa mmadani. 6 Vano miyo wiwa ethu vaari va angero ale annayi yakala ninga ndhu nawoga negihina: “Kadda lituru* na tirigu, nnakwima denariyu* mmodha teto malituru mararu enakwima denariyu mmodha. Kuwaanonge makura ni vinyu.”
7 Oliye nufugula selu yanennayi, miyo omwiwa mungero anennayi egihina: “Kadhawuno!” 8 Miyo omoona kavalo anddoora. Aamugwenle ithaniwa Okwa wula Mahame* emuharaga vowaddamela. Oliye ovahiwa epaddi yanennayi yeelabo yavati wihina athongege, wi aape athu ni supadda noolapa, dala, mulili wowopiha ni anenyama owoopiha eelabo yavati.
9 Oliye nufugula selu yanetanu, miyo woona musiddo mwa altare nikame* naathu yaapiwe mwaha wa madhu a Mulugu ni mwaha woonamoona yavahiliwa. 10 Aliwa yokuwa ni ndhu nootama yegihina: “Nabwiya Munlubale, oweela ni eebaribari, munaatorihe alini ale enakala elabo yavati ni munadha mwaasinyuse alini mwaha aliwa okuthula nikame nehu?” 11 Vano kadda muthu wa aliwa, ovahiwa malaya oolapa ni ootxena, nuwindo waddeliwa wihina yiithuwe vang’ono ofiyedha wakwanela numero naadhari akwiwa ni naaddibiliwa yayo yafuna opiwa ninga aliwa yapiwiwa.
12 Oliye afugulaga selu yanetanu nammodha miyo gahimoona. Wahikala oddiginyeya weelabo winlubale; nduwa naatene okala nooriba ninga guwo dha muruno,* mweri waatene okala woofila ninga nikame. 13 Nuwindo, thendderi dhodhulu omorela elabo yavati, ninga nfigera othikiwe nnipevo ninlubale ofiyedha omoriha dhowimadha dhikitidhene. 14 Elabo yodhulu osusihiwavo ninga rolu yaakuniwaga teto mwango dhaatedhene ni dhiligadha dhahivenyihiwavo vamburoni vewa. 15 Mowindala, mamwene eelabo yavati, anlubale, anamasogolela aanyakoddo, aliba oreela, athu enna kopolo, adhaari aatene ni athu aatene ootapuwa yahiipita mmakunguni a mmwangoni. 16 Yowoga ni mwango vamodha ni mabwe yegihina: “Munimorele ni munikuneele wihina Ole akiratile vampaddoni vomwene ahinoone ni nihifwanyiwe owali wa Mwana Nimbila, 17 mwaha nihifiya labo ninlubale na owali wewa, ki baani anaande okala owimelene?”