Thalako ya Jo

Nerege muthu apama kanafwanyiwa makathamiho? Kasugwa epadduwile ni Jo. Oliye akala elabo yithaniwa Uz. Aali mulobwana ooreela ni ahikanna emudhi yinlubale. Jo aali muthu apama teto aali mukwaye Mulugu. Oliye owakavihera athu oohawa, amaamukwele ni anakwadhuni.

Jo kaanonne wihina Saddana aanna omusugwera. Mbwenye Yehova ahinona, bumwahaya adhe amukohege Saddana egi: ‘Mwahaya bwaddi ogamusugwa Jo? Mwilaboni kaawo muthu analigana nuliye. Oliye anogiwelela teto dhithu aneriyena sapamave.’ Vano Saddana wakula egi: ‘Gihinona, mwaha nyu munombarela ni kamunamuhiya wihina dhimpadduwele dhithu dhabure. Ohiya eyo, munonvaha dhithu dhathima ninga mundda ni anenyama. Kamwakeni dhithu dhaatedhene anniyena, noone akala anere odidela okala oororomeleya.’

Yehova owoga egi: ‘Dhihikala. Ginowuhiya wihina omwerena onafuniwe. Mbwenye kumpe.’ Mwahaya bwaddi Yehova adhe amwenyege Saddana omwerela dhithu dhabure Jo? Mwaha oomuroromela. Yehova ahinona wihina naarive Jo afwanyiwaga makathamiho eere odidela okala oororomeleya.

Vano Saddana obajha omweha Jo. Vobajha, waapa anenyama aatene, amodha yere wiyiwa amodha yere oja teto anamalaba yaasamalela anenyamaya okwa. Nuwindo, oliye omwerela ethu emodha yothabwa opiha mbani. Waapa anaaye aatene mudhidhi ejhaga mathanga vaade va ddibiliwa munlubaleya. Aliwa yaali vamodhave ejhaga mathanga, vano nyumba wamothela. Mwebaribarene dhithu ndha dhahithabwa omuukula Jo, mbwenye oliye kaaselele okala oororomeleya. Saddana oofunave wi Jo atabuwe. Bumwahaya, oliye omutatamulela oredda mmwiilini mwaaye, Jo okala makwaddave. Jo kaanonne mwahaya bwaddi dhithu ndhe dhidhe dhimpadduwelege. Naarive dhigaali ndo, Jo kaahile okala oororomeleya. Bumwahaya adhe amuhagalasege Yehova.

Vasogolova, Saddana wathukulela akwaye araru a Jo owoga dhithu dhaamukwerebeyihe. Aliwa owoga wihina Jo eera osinyusiwa ni Mulugu mwaha aherana ethu yabure. Jo owoga wihina kagineregena ethu yabure. Vano oliye obajha wubuwela wi Yehova daatatamula makathamiho ale. Ahifiyedha owoga wi Mulugu kaamweddiha nuwogowa.

Mulobwana dhaala iithaniwa Eliyu aali vevale avuruwanaga dhowoga dhaatedhene. Vano oliye owoga egi: — ‘Dhithu dhaatedhene munawoginyu kahi ebaribari. Iyo podi ohonelamo mwahaya bwaddi adhe enyege dhithu ndha opadduwa. Mbwenye, Yehova kanadha eerana ethu yabure. Oliye onowoona dhithu dhaatedhene ni onowakavihera athu yaafwanyiwaga makathamiho.’

Nuwindo, Yehova omukoha Jo egi: ‘Enuthukulela wubuwela wi anatota makathamiho di miyo ddi? Si we kunonne makalelo gipaddusilimi elabo yavati ni yodhulu, onere wanda wonelamo mwahaya bwaddi dhithu ndha dhigapadduwa?’ Jo waakula egi:

— ‘Gawogimi kagonelamo, gileveleleni. Vano gihinona wi muli a kopolo dhaatedhene. Miyo kagili ethu newene kaginonne ethu.’ Numala, Yehova omariha oredda aanniyena teto onvaha dhithu dhowinjhiva okwaranya ndhe aanniyena. Jo okalawo mudhidhi wowinjhiva oohagalalene. Yehova ahimureeliha mwaha Jo oomuroromela naarive dhirusaga. Ki we? Onofuna omuhagalasa Yehova ninga Jo? Akala onofuna odidele okala oororomeleya naarive epadduwaga ethu-siithu.