Ruti ni Nowemi

Mudhidhi dhaala, wIzarayeli okalawo dala. Vano, muhiyana dhaala ithaniwa Nowemi ni mamune vamodha naaniya abiili otamela oMowabe. Nuuvira mudhidhi, mamune Nowemi okwa, teto anaaye watela ahiyana ooMowabe, yithaniwa Ruti ni Orpa. Mowukuula, nuuvira mwanamudhidhi anaaye Nowemi okwa.

Nowemi nunona wihina dala yahimala wIzarayeli oliye othoma ohogolowelawo. Ruti ni Orpa omuhara. Mbwenye egaali mudila, Nowemi owoga naaliwa egi: ‘Nyu muhawerela dhithu dhapama anaaga vamodha ni miyoya. Ginafuna wihina muteliwe. Bumwahaya, muhogolowele elabo ya makolo enyu.’ Mbwenye Ruti owoga egi: ‘Nowemi, iyo nnothabwa wudhivela. Kanidha nuhiya.’ Nowemi owogave wihina Ruti ni Orpa ehogolowe. Vano, Orpa ohogolowela elabwaaye ni wahogolowela amulugu aye. Nowemi owoga wi Ruti ahogolowe ni Orpa. Mbwenye Ruti oomudhivela vanlubale Nowemi. Bumwahaya owoga egi: ‘Miyo kagidha guhiya. Nlogo naawo nnakale nlogo naaga, Mulugu awo anaakele Mulugu aaga.’

Vano Ruti nNowemi ofiya wIzarayeli. Labo dhaala, Ruti odhowa oddoddela dhoojha mmunddani mwa Bowaji aali mwaana a Rahabe. Bowaji wiiwa wihina Ruti oothabwa omudhivela Nowemi ni oomukavihera. Bumwahaya, adhe awogege ni anamalaba aye wihina emuhiye Ruti addoddelege dhoojha mmunddani mwaaye.

Ruti nufiya vaade mahiyu, Nowemi omukoha egi: ‘Oddoddenle wuuvi peeno?’ Ruti omwakula eegi: ‘Giddoddenle mmunddani mwa mulobwana dhaala anithaniwa Bowaji.’ Vano Nowemi owoga egi: ‘Bowaji mmudhi a marafula mamunaga. Odidele oddoddela mwemwene naanamwali amodha, kaavo anunyonye.’

Ruti odidelave oddoddela mmunddani mwa Bowaji ofiyedha omakuthulo wa ohadda. Bowaji ahoona wi Ruti aali muhiyana apama ni ooviheyana mabasa. Bumwahaya Bowaji omutela. Aliwa ombala mwaana iithaniwa Obedi. Vasogolova Obedi okala avwaye Davidi. Akwaye Nowemi yahithabwa ohagalala ofiyedha owoga yegi: ‘Vobajha, Yehova wuvaha Ruti uukavihenre vanlubale. Vano-to ohukanna mudhulo. Yehova dinafwanelela otamaleliwa mwa dhaatedhene ndha!’