Yehova Ahinvaha Kopolo Sansawu

Amwaana Ezarayeli owinjhiva ohogolowela wawebedha amulugu owoota. Bumwahaya Yehova wenya wihina Mafilistewu yawonihege goyi. Mbwenye amwaana Ezarayeli amodha yomudhivela Yehova. Mmodha waaliwa iithaniwa Manowa. Oliye ni mwariye kiyanna ahima. Labo dhaala, mungero owoga ni mwadha Manowa egi: ‘Yehova aneere wuvaha mwaana anaavuluse amwaana Ezarayeli mmadani mwaafilistewu. Oliye anakale munazirewu.’ Ohumunona munazirewu? Munazirewu Aali muthu amulabela Yehova mohiyana naamodha teto kiyasatha mathithi.

Mwebaribarene Manowa ni mwariye ombala mwaana ni onvaha ndina na Sansawu. Yehova onvaha kopolo Sansawu. Mwaha wa kopolo ndho oliye owanda omwaarula poddogoma ni mada. Labo nimodha, Sansawu waapa Mafilistewu owakwana 30 yeeka. Mafilistewu yoothabwa omwidda, bumwahaya yooganesa ompa. Emahiyu dhaala, Sansawu aagonne luwani dhaala yithaniwa Gaza. Vano Mafilistewu omwipitelela vamusiwoni wihina empe. Mbwenye Sansawu ovenya vaari va mahiyu oddulawo musiwoya wa luwani. Oliye otheba ogwelelana mwango dhaala waali waddamela luwani emodhaya yithaniwa Ebrom!

Mbwenye Mafilistewu kiyaselele omusayela Sansawu. Aliwa odhowa oloba nikavihero na Dalila, mwenddaye Sansawu. Aliwa owoga yegi: ‘Iyo nnafuna nimuhidde Sansawu. Wanaddela ethu enamukavihera Sansawu okanna kopolo, nnere wuvaha korowa dhowinjhiva dha parata.’ Dalila oodhiveliwa korowa. Bumwahaya oliye othoma wakavihera Mafilistewu. Oliye akala omuwaddave Sansawu wihina amwaddele ethu yanvaha kopolo. Vobajhavene, Sansawu kaamwaddenle. Mbwenye mwaha owaddiwa dila dhowinjhivadhene oliye owoga egi: ‘Miyo gili munazirewu, kaginasathege nthithi. Gidha gisathiwave ginere oyelela kopolo.’ Mwaha Sansawu omwaddela Dalila ethu yanvaha kopolo, dhaye dhahimweddela bure! Ohunona ethu Dalila eeriliyena?

Oliye othamaga wihina awaddele Mafilistewu. Vano oliye nuhogolowa weriha wihina Sansawu agone vamweddoni vaye ni omuloba muthu wihina amusathe Sansawu nthithi naye. Vano Mafilistewu numuhidda Sansawu, oliye kandile wiwakihedha ni woona wihina kanna kopolo. Nuwindo, ommaga Sansawu ompudula mento ni onvokedha mukambura.

Labo dhaala Mafilistewu otugumana wihina emwebedhe mulugu ewa ithaniwa Dagom. Aliwa okuwaga yegi: ‘Nihanda ommaga Sansawu mwaha wa Dagom onikavihera.’ Aliwa ommagelela Sansawu vaari va matxikwa menli yalibiha nyumba ele ni wambela omuteya. Mbwenye nthithi naye nahunnuwa. Vano Sansawu omuloba kopolo Yehova egi: ‘Kamwerena givaheni kopolo dila modha baahi!’ Vano Sansawu okanna kopolo ofiyedha waathunya matxikwa ale menli. Mburoya wahidhalamo Mafilistewu. Nyumba ele wamothela athu aatene, aliwa okwa vamodha ni Sansawuya.