Ogaweya wa Omwene

Mudhidhi Salomawu amwiweleliye Yehova, omwene wo wIzarayeli wokanna murenddele. Mbwenye Salomawu watela ahiyana owinjhiva yahaali amwaana Ezarayeli ni yahamulabela Yehova. Vang’ono vang’ono, Salomawu obajha wawebedha amulugu owoota, ahiyanaaye yawebedhiwa. Yehova otakaleliwa vanlubale. Oliye owoga ni Salomawu egi: ‘Ginere wavenyihamo amwaana Ezarayeli mmadani mwawo ni mwaamudhawo. Omwene onere ogawiwa makuuru menli. Epaddi enlubaleya enaakale ni mudhaari awo, vano eng’onoya enaakale namudhawo.’

Labo dhaala, mudhaari mmodha a Salomawu, iithaniwa Jerobowawu, eeddaga olenddo, ogumana nnamavuhulela Ayiyaji. Ayiyaji ohisa yowara yaye ni otala dhipaddi dhowakwana 12. Nuwindo, owoga ni Jerobowawu egi: ‘Yehova aneere ohisa omwene wo wIzarayeli wa emudhi ya Salomawu wi agawemo dhipaddi biili. Othukule dhipaddi kumi dha yowara ela mwaha onere okala mwene a mahimo kumi.’ Salomawu nuunona ofunaga ompa Jerobowawu. Vano Jerobowawu othawela Wijipitu. Nuuvira yakadhene, Salomawu okwa vano mwanaye iithaniwa Robowawu okala mwene. Nuwindo, Jerobowawu ohogolowela Wizarayeli.

Alobwana owunnuwelavo owIzarayeli owoga ni Robowawu yegi: ‘Waweddiha pama amwaana Ezarayeli, enaakale ni we.’ Mbwenye azombwe akwaye a Robowawu owoga yegi: ‘Kubebedhege nlogo. Wawenjhedhedhe mabasa aamwaana Ezarayeli!’ Robowawu werana ele akwaye yawogiliwa. Bumwahaya amwaana Ezarayeli omurugunuwela. Vano, mahimo kumi owIzarayeli omusakula Jerobowawu wihina akale mwene ewa, mbwenye mahimo menli okala ni Robowawu. Ndo, mahimo 12 owIzarayeli ogaweya. Nikuru na mahimo kumi niithaniwa omwene wowIzarayeli, vano nikuru na mahimo menli niithaniwa omwene woJuda.

Jerobowawu kafuna wihina nlogo ndhowege luwani yoJeruzale yakala epaddi ya omwene wa Robowawu wihina namwebedhe Yehova. Ohunona mwahaya bwaddi? Mwaha oova wihina nlogo nnakale epaddi ya Robowawu. Bumwahaya osasanya dhikwamuthu biili dha oru ni owoga ni nlogo egi: ‘Ojeruzale wihithabwa olapela mmwebedhege Mulugu wewuno.’ Vano, nlogo obajha webedha ekwamuthu ya oru. Aliwa omuddiwala Yehova.