Yehova Ahimbarela Jeyozafa

Jeyozafa aali mwene ooJuda. Oliye ahimariha webedha waatene wa Bahali. Jeyozafa afuna wihina athu aatene emwiwelelege Yehova. Bumwahaya, wasakula alobwana yanonne pamadhene malamulo a Yehova wihina ehudhihege nlogo.

Malogo yaaddamenle oJuda yowoova owana naaliwa mwaha yahinona wihina Yehova anna wabarela. Malogo yodhesana mukono wihina envahe mwene Jeyozafa. Mbwenye amowabita, aamonita ni athu amodha yakala murudda woSeyir, odhowa owana naakudda Juda. Jeyozafa ahinona wi ohowela nikavihero na Yehova. Bumwahaya Jeyozafa waloba alobwana, ahiyana ni anamwani wihina edhowe oJeruzale. Nuwindo, olobela vaari vaathu aatene egi: ‘Yehova, mwahinikavihera kannande ogonjhiha. Kamwerena, kawogani dhithu nnahowelihu werana.’

Vano, Yehova waakula egi: ‘Kamoove. Miyo gili ni nyu. Kamunahowela owana. Moone ethu ginafunimi werana.’ Ethu baani Yehova afuniye werana wihina avuluse nlogo naye?

Labo noharela, Jeyozafa wasakula alobwana yaali anamiiba. Anamiiba ale yohowela odhowa osogolo wa anyakoddo emwibelaga Yehova nuuhagalala. Aliwa weedda okuma oJeruzale ofiyedha mburo wadhowiwa owana, withaniwa Tekowa.

Mudhidhi aliwa yibaga, Yehova werana ethu yootikiniha. Oliye weriha wihina aamonita ni amowabita ewanege vaakaleliwa. Vano aatene okwa. Mbwenye Yehova obarela nlogo naye, ndala ninga aapaganyiliye. Malogo yaddamele oJuda, onona ethu Yehova eriliyena ni okanna ebaribari wihina Yehova aannave obarela nlogo naye. Ohoona? Yehova onosayela makalelo oovulusa nlogo naye. Teto kanahowela nikavihero na muthu wihina eerena eyo!