Naama ni Mwana namwali OwIzarayeli

Mburo dhaala wolapela ni wIzarayeli, withaniwa Siriya wahikala mwana namwali dhaala owIzarayeli. Oliye aathukuliwe naanyakoddo ooSiriya. Mwana namwali ole obajha olaba vaade va namasogolela dhaala aanyakoddo ooSiriya ithaniwa Naama. Mburo yoole kaaliwo muthu amulabelawo Yehova.

Naama ahikanna oredda wowopiha wa maranya. Mwana namwali ole oofuna vanlubale omukavihera. Bumwahaya oliye owoga ni mwariye Naama egi: ‘Miyo gihimunona muthu anaande onvulumusa mamuninyu. Wizarayeli ohukalawo namavuhulela a Yehova anithaniwa Elizewu. Oliye podi onvulumusa mamuninyu.’

Mwariye Naama omwaaddela mamune. Naama oofuna ovulumuwa. Bumwahaya oliye odhowa vaade va Elizewu Wizarayeli. Woona wi Naama owithithimiha vanlubale, oliye ubuwela wi Elizewu eere odha wi awoge nuliye. Mbwenye Elizewu aamurumile mudhaari aye wi awoge ni Naama egi: ‘Odhowe muhinjhe woJordawu wabwine dila 7. Werana ndo onere ovulumuwa.’

Naama kaadhiveliwe. Bumwahaya oliye owoga egi: ‘Miyo gubuwela wi eere okuma wi amulobe Mulugu eenyu Yehova wula aavirihaga madaye wintoniwaga wihina agivulumuse oredda ola wa maranya. Ohiya eyo, oliye anagiruma odhowa muhinjhe wo wIzarayeli. Muhinjhe dhoSiriya sowoma. Mwahaya bwaddi oliye adhe ahigirumege odhowa wengo?’ Naama otakaleliwa vanlubale ni ovenyavo vaade va Elizewu.

Vano adhaari a Naama owoga nuliye yegi: ‘Nyu mwahiwoga wi mweere werana dhaatedhene wihina nvulumuwe. Mwahaya bwaddi kamunerana ethu mwaddeliwinyu nnamavuhulela? Enakala ninga sookweya.’ Naama werana ele adhaari aye yawogiliwa. Oliye odhowa muhinjhe Jordawu ni obwina dila dhowakwana 7. Nukuma mmanjheni dila yanetanu nabiili Naama woona wi ahivulumuwa! Oliye ohagalala ni ohogolowa wihina amutamalele Elizewu. Naama owoga egi: ‘Vano gihinona wi Yehova, Mulugu eebaribari. Kubuwela makalelo mwana namwali ole ahagalaliye numoona Naama ahogolowelaga vaade agavulumuwile!’