Ddiyabo Onoomweha Yesu

Nubaddiziwa, Yesu odhowa mwiddeddereni. Oliye omala malabo 40 ahijhile ethu nuwindo oliye ovoliwa. Vano Ddiyabo odha wihina amwehe. Ddiyabo owoga egi: ‘Akala we oli Mwaana a Mulugu, kaasaddule mabwe ala wihina ekale pawu.’Yesu omwaakula aalabihedhaga malamulo a Mulugu: ‘Muthu kanakalelawo ni yoojhave baahi, mbwenye anakalawo mwaha wa madhu enakuma muwano mwa Yehova.’

Nuwindo Ddiyabo omweha dila yanabiili: ‘Akala we oli Mwaana a Mulugu kivokedhe vati, mwaha dholebela dhinawoga: Mulugu anere waruma angero aye, edhe yukapule.’ Mbwenye Yesu ohogolowela omwaakula aalabihedhaga malamulo a Mulugu egi: ‘Kumwehe Yehova, Mulugu awo.’

Nuwindo, Saddana omweha dila yanatharu. Nuumoniha Yesu omwene waaye wamwilaboni, owoga egi: ‘Ginere wuvaha dhaatedhene ndha wagikokorela ni wagebedha vang’ono.’ Yesu omwakulave aalabihedhaga malamulo a Mulugu egi: ‘Ogivenyelevo Saddana! Dhihilebiwa: Omwebedhege baahi Mulugu awo Yehova.’

Ddiyabo ovenyavo, nuwindo angero odhana yoojha onvaha Yesu. Vano, Yesu obajha wapara mabasa Yehova anvahiliye: owoga naathu amodha wodhela Omwene wa Mulugu. Athu yodhiveliwa dhithu Yesu ahudhiye. Teto athu yomuhara mburo dhaatedhene Yesu adhowiye.