Yesu Onoojhiha Muthithi Waathu

Nlabo dhaala Yesu ni anamaharaye yaheedda olenddo elaleyaga ni yahogolowe egaali oogomeene. Vano Yesu othoma waathukula anamahara aye wihina edhowe luwani yoBetizayida wihina yithuwe vang’ono. Aliwa ogwela mwanddeya wihina edhowe mburo yoole. Mbwenye yaddamelaga luwani yeele, Yesu woona muthithi waathu emujhehaga, athuya yamujheha yahithabwa winjhiva. Ethu Yesu afuniye mudhidhi yoole, yaali okala ni anamahara aye wihina yithuwe, mbwenye oliye ahithoma osamalela pama muthithi ole waathu wamuhara. Yesu ahavulumusa aredda ni ahivireliwa nlabo nantero aahudhihaga athu ale wodhela Omwene wa Mulugu. Mbwenye vati viribaga anamahara aye odhowa owoga ni Yesu yegi: ‘Podi wera muthithi ola waathu ohukanna dala, bumwahaya mwarume wihina edhowe wi kadda muthu asayele yojha yaye.’

Vano Yesu owoga naanamaharaye wihina muthithi ole waathu kayahowela ohogolowela mmavademwiwa, mbwenye aatene enajhe vevala. Anamahara aye omukoha yegi: ‘Nabwiya munafuna naagulele pawu athu aatene ala?’ Nuwindo Filipi, owoga egi: ‘Naarive nahakanne korowa dhowinjhiva kadhaakwane wi nagule pawu wihina athu aatene ala ejhe.’

Yesu wakoha egi: ‘Munna pawu ngasi?’ Andire wakula eegi: ‘Ninna pawu tanu ni oba biili. Mbwenye kadhinakwane wihina athu aatene ejhe!’ Vano Yesu oloba wi aathu aatene ekarati vati ni waloba kadda nikuru okarati athu owakwana 50 obe 100. Nuwindo Yesu othukula pawu ni oba, osugwa odhulu ni olobela. Voharela oliye wavaha namahara aye wihina yagawele muthithi ole waathu. Alobwana owakwana 5000 vamodha nahiyana ni ahimaya yahijha ofiyedha orubala. Vano wihina dhihirahiliwe dhoojha dhaahanle, Yesu waloba anamahara aye wihina eddoddele pawu dhaahale. Nuddoddeliwa pawu dhaatedhene dhaahanle, dhahidhaala muddanga 12! Ela yaali ethu yootikiniha kunoonelamo?

Muthithi ole waathu wahihagalala vanlubale ofiyedha osayela makalelo wihina Yesu akale mweniwa. Mbwenye Yesu ahinona wi Yehova kafuna wi oliye akale mwene mudhidhi yoole. Bumwahaya Yesu adhe arumege muthithi ole waathu wihina ehogolowele mmavademwiwa. Nuwindo waruma anamahara aye wabuwa niya yoGalileya, mbwenye Yesu ogwela omwangoni yekaye. Mwahaya bwaddi Yesu adhe adhowege omwangoni? Mwaha oliye afuna alobele wa Yehova. Teto Yesu apinyaminyeya ni mabasa, oliye osayela mudhidhi wihina alobele wa Yehova.