Yesu Onowathwanyuwela Anamaharaye

Nuuvira mwana mudhidhi, Peduru ohogolowela oGalileya wihina atotege oba. Teto Tiyagu, Tome, Juwawu ni anamahara amodha omuhara Peduru oGalileya wihina yatotege vamodha. Nuudhowa otota, aliwa ovireliwa emahiyu yantero yahipile newene oba modha.

Vano vati nuusa, aliwa omoona mulobwana dhaala, mulobwana ole wakoha agaali wolapela wene, akala aliwa yahanda otota. Aliwa omwakula wihina kayandile ohidda newene oba modha. Vano mulobwana ole wawaddela wihina evokedhe nthavi moono woojha wa epaddi waali mwanddeya. Aliwa nuwerana ele mulobwana ole awogiliye, aliwa ohidda oba dhowinjhiva ofiyedha ohandaga othukulela mmwanddeyani. Mudhidhi yoole, Juwawu woonelamo wihina mulobwana ole aali Yesu. Nuwindo Juwawu owoga egi: ‘Di Yesu!’ Peduru nuwiwa wi mulobwana ole aali Yesu, olupela muniya ni wambela ohabelela wi adhowe waali Yesu. Mbwenye anamahara amodha yadhowile ni mwanddeya.

Vano aliwa nufiya ode, woona mootho ni oba dhigaali veeko vamodha ni pawuya. Yesu wawaddela wihina edhena oba dhimodha dhahiddihiwa wihina yoose. Nuwindo oliye vamodha ni anamahara aye obajha otakuna oba ndhe dhosiliwa vamodha ni pawu.

Voharela Yesu omukoha Peduru egi: ‘Peduru onothabwa ogidhivela miyo wapitha mabasa awo?’ Peduru waakula egi: ‘Nabwiyani nyu muhunona wihina miyo ginowudhivelani.’ Nuwindo Yesu owoga egi: ‘Wajhihege Mambila aaga.’ Voharela Yesu omukoha Peduru dila yanabili akala oomudhivela. Vano Peduru ohogolowela owoga wihina oomudhivela. Yesu omwaddela Peduru egi: ‘Wakukulege mambila aaga.’ Vano Yesu nuumukoha Peduru dila yanatharu akala oomudhivela, Peduru wukuuwa vanlubale ni wakula egi: ‘Nabwiya nyu muhunona dhaatedhene, teto muhunona wihina miyo ginowudhivelani.’ Nuwindo Yesu omuruma peduru wihina aajhihege Mambila aye ni adidele omuhara.