Korneliyu Onohudhera Wodhela Yehova

Luwani yoSezareya ahikalawo mulobwana dhaala ithaniwa Korneliyu aali namasogolela anyakoddo aaRomanu. Oliye kaali muJudewu, mbwenye oorihiwa vanlubale ni maJudewu. Mwaha aali muthu oovaha ni owakavihera athu ohaawa. Labo dhaala mungero omuthwanyuwela ni owoga nuliye egi: ‘Mulugu onowavuruwana malobelo awo. Vano kaarume alobwana wihina emudhowele Peduru oJope.’ Mohilegela, Korneliyu waruma alobwana araru wihina edhowe oJope.

Mudhidhi Peduru agaali oJope ahikanna yowoona. Oliye wawoona anenyama maJudewu yahajhiwa ni wiwa ndhu niwogaga wihina Peduru aajhe anenyama ale. Mbwenye Peduru okoodda wajha anenyama ale ni owoga egi: ‘Miyo kaginajhege anenyama enakoddihiwa ni nlamulo, mwaha wihina boonyakavala.’ Mulugu owogave egi: ‘Kuwoge wi anenyama ala boonyakavala, mwaha wi Mulugu ohaweeliha.’ Voharela Mulugu owoga ni Peduru egi: ‘Ehikalawo alobwana araru yimenle vamulago ni enujheha wihina odhowe naliwa.’ Nuwindo Peduru wakoha egi: ‘Mwadhela ddi?’ Aliwa omwakula yegi: ‘Korneliyu namasogolela aanyakoddo aaRomanu dinirumile wi nidhe wuno, oliye analoba wi mudhowe vaade vaye oSezareya.’ Vano alobwana ale okalave ni Peduru oJope. Labo noharela Peduru naalobwana ale vamodha ni addibila amodha ooJope odhowa oSezareya.

Vano Peduru nufiya, Korneliyu omukokorela. Mbwenye Peduru owoga egi: ‘Kavenyani! Ni miyoya gili muthu ninga nyu. Naarive akala maJudewu kinafiya vaade va muthu ahili muJudewu Mulugu digirumile wihina gidhe vaade veenyu. Kamwerena, kawogani mwahaya bwaddi mudhe mugithanege?’

Korneliyu wakula egi: ‘Ngamanle malabo mannayi gilobelaga ogithwanyuwela mungero ni owoga wi guwithaneni. Kamwerena kanihudhiheni wodhela Yehova.’ Vano Peduru owoga egi: ‘Mwebaribarene vano ginowonelamo wi Mulugu kanapwatha akala muthuya muJudewu obe naari, oliye onowarumedha athu aatene wihina emwebedhege.’ Nuwindo Peduru wahudhiha dhithu dhowinjhiva wodhela Yesu. Vano Korneliyu ni athu aatene yaali vaade vaye wakela muzimu wotxena ni obaddiziwa.