Makoho Aanamileri

Asupayi amutempulu yari aani? Ki yaapara mabasa baani?

Mutempulu yahikalamo mabasa oohiyana-iyana yapariwa ni malevita yahali anamakutha. Alevita ala yowegeredhiwa okala nikuru naasupayi amutempulu, yasugweriwa ni Kapitawu amutempulu. Namaleba oojudeya ithaniwa Fílon onowasoriha mabasa yaapara asupayi: “Amodha anikuru nna [aalevita] yiimela vamusiwo ninga anamasugwera. Amodha yakala muwari [mburo wamutempulu], osogolo wa santuwariyu, aliwa yomusugwera muthu di muthu ahanna ofuru wonyigala osantuwariyu, naari akala muthuya eerana yapudhave obe naari. Amodha yasugwera vamburoni vili tempulu, ala yowakakana amodha mahiyu, amodha mutana.”

Asupayi amutempulu yalabesa o Sinediriyu. Nikuru nna naJudewu biyala yanna ofuru o Roma wowinkeleliwa futhi.

Ninga munawogela maliba ohudheresesa Joachim Jeremias, “Yesu ahasumulula mudhidhi yole yadhiliwa ommaga, oliye malabo amatene aahudhihesa muTempulu, ehimmagaga (Mat. 26:55) ela yoneye pamadhene ahere amagiwa ni asupayi amuTempulu”. Namaleba mmodhave onorumedha wi athu ale yarumiwe mudhidhi yole wi yammage Yesu yaali asupayi amuTempulu. (João 7:32, 45, 46) Ogavinre mudhidhi, o Sinediriyu yahimuruma kapitawu amuTempulu vamodha ni anamasugwera wi yaadhena anamahara a Yesu. Podi wera naali nikuru nimodhave naasupayi amuTempulu yamburulele Pawulo ode waTempulu.​—Atos 4:1-3; 5:17-27; 21:27-30.