Makoho Aanamileri
‘Dhowima dha muzimu wotxena’ dhiri va Gálatas 5:22, 23 sidhendha baahi?
Yolebela ela enasoriha dhikalelo tanu nennayi dheekiristawu: ‘Odhivela, ohagalala, Murenddele, ovilela, opama, okala owaddameleya, nroromelo, ohaguva onyanyuwa, wivanya.’ Mbwenye eyo, kinatapulela wi dhowima dha muzimu wotxena sidhendha baahi.
Osugwe ele elebile Pawulo muwari mwa versu dha mundduli: ‘Mabasa oomwilini kinasitheya: Mararuwo, dhego dhamanyazo, mweddelo wabure, webedha dhikwamuthu, wombeeza makanga, widdana, owana, ajhe, owali, ohiwanana, ogawanyeya, okunga webedha wimodha, okalela nrima, olezela, mathanga oohidhuwanyeya ni dhithu dholigana ni dhendha.’ (Gál. 5:19-21) Madhu owi ‘dhithu dholigana ni dhendha’ enatapulela wi Pawulo awoga mogwaddela dhithu dhimodha dha ‘mabasa oomwilini’ dhinafwanyeya va Colossenses 3:5. Ni mukalelo mmodhave, Pawulo numala owoga, dhikalelo dhapama tanu nammodha, oliye ohusoriha egi: “dhahikalawo dhithu ninga dhendha kawo nlamulo.” Madhu ala, kahiyo wera Pawulo awoga agwaddelega ‘dhowima dha muzimu wotxena’, mbwenye agwadela dhikalelo dhapama dhinakosa epaddi ya muzimu wotxena.
Iyo podi wonelamo pama muselu ola, naliganiha ni madhu mamodha a Pawulo eri muwari mwa karta naaye alebelega athu amulogo wo Efezu: ‘Dhowima dhowara, enagana dhatedhene dhiri dhapama, dhowogowa ni dhebaribari.’—(Efé. 5: 8, 9).
Pawulo ahimukongomedha Timotiyu egi wilibihere okale ‘owogowa, oomwebedha Mulugu, oodhivela, anroromelo, oovilela, ni oohaguva onyanyuwa.’ (1 Tim. 6:11) Dhikalelo ndha, tharu baahi dhinafwanyeya va Gálatas 5:22, 23: (nroromelo, odhivela ni ohaguva onyanyuwa), mbwenye kahiyo wera Timotiyu ahowela dhikalelo dhendha baahi, oohowela okaviheriwa ni muzimu wotxena, wihina akanne dhikalelo dhimodha tharu dhapama: ‘Wogowa, omwebedha Mulugu, ni ovilela.’—Omusugwe Colossenses 3:12; 2 Pedro 1:5-7.
Gálatas 5:22, 23 kanawoga dhikalelo dhatedhene dhekiristawu. Muzimu wa Mulugu podi onikavihera okanna dhikalelo ndha tanu nennayi, dhinakosa epaddi ya ‘muzimu wotxena.’ Mbwenye, dhihikalawo dhikalelo dhimodha dhinahoweleya okanna wihina mukiristawu akale owitwelavo ofiyedha ‘owara emuthu exa, epaddusiwe ni efunelo ya Mulugu, enna wogowa webaribari ni yororomeleya.’—Efé. 4:24.