MWILABONI MUNA MUDHAANLE MAKATHAMIHO MWAHAYA BWADDI EKALA YOOFUNEYA?

1 | Osamalele egumawo

ONERE DDI?

Makathamiho obe ngovi enoopatha egumi yaathu mwamakalelo ohiyana-iyana.

Ofwanyiwa makathamiho onowathukulela athu okala osimweleene, teto omala mudhidhi wowinjhivene muthu agaali osimweleene podi omuthukulela muthuya okala muredda.
Ngovi podi wudhelana makathamiho mwigumini ni okala ethu yorusa ofwanya murombwe ni dhithu dhimodha dhinahoweleya.
Mwaha wa ngovi athu enofwanyiwa makathamiho ofiyedha ohukanna dhithu dha kadda labo ninga dhoojha dhofwanelela ni murombwe.

Dhithu onafwaneleliwe onona

Oredda winlubale ni othuwathuwa podi okwerebeyiha mubuwelo wawo ofiyedha we ohiya werana dhithu dhakavihere egumi yawo. Mwaha wa yeyo we podi othabwiha oredda wawo.
Muthu ahisayela murombwe oredda waye podi othabwa obe podi ofiyedha okwa.
Wasamalelaga egumi yawo onerege wanda werana dhoothoma dhapama mudhidhi worusa.
Naarive akala oli ohawa dhihikalawo dhithu dhofwanelela werana wi osamalele egumi yawo.

Dhithu onahoweliwe werana

Malabo mamodha, muthu athotho anorajhiha wubuwela dhithu dhaamuthukulele vang’ovini ni anowerana ethu-siithu. Mwamakalelo mamodhave monelo ola podi olabihedhiwa muthu asamalelaga egumi yaye. Bumwahaya okanna oyesa podi omukavihera muthu ohufwanyiwa oredda obe ohuthabwiha oredda anniyena. Sapama orabela oredda ohiya okanna oredda nuwindo iyo osayelaga makalelo ovulumuwa.

“Nakala athu oyesa, nnovugula korowa nnanongihu mwaha odhowana ospitale ni ogulana murombwe.” — Andere.a

a Mandina mamodha a revista nna ehisadduliwa

ETHU YOWERANA Dhithu dhinakavihera

Wafwanyiwaga makathamiho ohara thalo ndha dhinere wukavihera obarela egumi yawo

OKALE OOYESA

Okale ooyesa

Bibiliya anihina: “Muthu athotho anowoona yowoopiha ni orabela.” — (Provérbios 22:3) Orabele dhithu dhaapwehe egumi yawo vang’ovini.

Kadda labo onawege dila dhowinjhivadhene ni sabawu, thabwa-thabwa ohunahidde yojha obe wahogolowa okasadibanyo.
Kadda labo oxelege vaade vawo ni ofufuthege dhithu dhinathabwa ohiddiwa.
Dhandeyaga, onaawaddamele athu enna oredda onavaliwa.

OJHEGE DHOJHA DHINAKAVIHERA MWIILI

Ojhege dhojha dhinakavihere mwiili

Bibiliya anihina: “Mwaha kawo muthu aniidda mwiili waye, mbwenye onojhiha ni onoosamalela ninga Kiristu aneriyena mulogo.” (Efeziyu 5:29) Nnowoniha wihina nnodhivela mwiili wehu nasugweraga ni dhithu nnajhihu.

Wang’wege manjhe owinjhiva.
Ojhege furuta ni mataba oohiyana-iyana.
Kujhege dhithu dhithambwe okanna makura, mwinnyu ni dhithambwe okanna asukari.
Kufumarigi, kulabihedhege murombwe dhinaviriganiha ogoogo ni kuthabwege ong’wa.

“Wihina nihithabwege ofwanyiwa oredda nnoxixa ojha dhithu dhinakavihera mwiili. Mwaha nahera ndo, nnerege omala korowa nnakelihu nigulaga murombwe. Bumwahaya nihithoma olabihedha korowa yehu wihina nigulena dhoojha dhinakavihera mwiili.” — Carlos.

WEREGENA EZERSISIYU NI OGONEGE PAMA

Weregena ezersisiyu

Bibiliya anihina: “Sapama withuwa vang’ono, ohiya watandanyihedha mabasa, ngo futhamagiha nipevo.” (Eclesiastes 4:6) Ebaribari wihina nnohowela olaba mbwenye sapama withuwa.

Mweregena dhithu dhinakavihera mwiili. Podi obajha werana ethu yokweya ninga weedda. Werana ezersisiyu podi wukavihera okanna egumi yapama naarive oguluvale, ogaali ooragala obe oganna oredda.
Ogonege pama

Ogonege mudhidhi wowinjhivene. Ogona mudhidhi mung’onove podi wuthukulela okanna stress obe ohukala oopwaseya. Wavira mudhidhi eyo podi wuthukulela okanna oredda munlubale.
Osakule mudhidhi wofwanelela wihina ogonege ni wilibihedhe wihina ogonege mudhidhi yoyo malabo aamateene. Wilibihedhege ogona ni ovenya mudhidhi mmodhave.
Kumusugwege TV newene kumulabihedhege telefoni wafunaga ogona.
Mwafunaga ogona kamuthabwege ojha, kamung’wege dhithu dhinna kafeyina ni dhoog’wa dhinalezeliha.

“Miyo gihonelamo wihina kove dhinovolowela emuthu yaga yaateene. Gagona mudhidhi vang’ono musolo onogipa teto ginakala oogomene. Mbwenye gagona mudhidhi wowinjhivene, ginakala owiwegeredhene wihina gerena ethu-siithu! Ginokanna kopolo ni kaginathabwa okala muredda.” — Justin.