MWILABONI MUNA MUDHAANLE MAKATHAMIHO MWAHAYA BWADDI EKALA YOOFUNEYA?

2 | Mulabihedhege pama korowa

Onere ddi?

Athu owinjhiva enowilibihedha olaba malabo amateene wihina efwanye dhithu enahoweliwa kadda labo. Mowukuliha makathamiho a elabo ela enoweriha wihina ekale ethu yorusa. Mwahaya bwaddi?

Yakalawo makathamiho, dhithu ninga dhoojha ni nyumba dhinokwima vanlubale.
Makathamiho yinjhiva athu enoyelela mabasa obe korowa yakeliwa podi ovuguliwa.
Ngovi enotota makathamiho owinjhiva ninga ononga malondda, nyumba ni dhithu dhimodha. Mwaha wa yeyo athu owinjhiva enoohawa.

Dhithu onafwaneleliwe onona

Wanona olabihedha pama korowa, wafwanyiwa makathamiho onere okala owiwegeredhene.
Onone wihina korowa kadhinaroromeleya; onofiya mudhidhi korowa ni dhokanna dhimodha kuhukanna thima.
Dhihikalawo dhithu korowa dhihinandiwa ogula, ohagala ni murala wowiwanana.

Dhithu onahoweliwe werana

Bibiliya onihina: “Nakanna ethu yoojha ni yowara, nnere ohagalala.” — 1 Timotiyu 6:8.

Ohagalala enovolowelavo ohuthabwa wubuwela dhithu nnunlelihu ni ohagalala ni dhithu nnahowelihu. Thabwa-thabwa akala kaninna korowo dhowinjhiva.

Wihina nihagalale podi wera enohoweleya ojajaliha egumi yehu. Akala nnofuna dhithu dhowinjiva dhinakwaranya korowa nnakannihuna, dhithudha dhinerege othabwave.

ONAHOWELA WERE DDI Thalo dhinukavihere

Mudhidhi wamakathamiho dhithu ndha dhinere wukavihera olabihedha pama korowa yawo

OVUGULE DHITHU ONAGULIWE

Omukosege palanu

Akala onowubuwela ogula dhithu dha vaade orajhihe ojheha vang’ono. Wikohe: ‘Neerege ginohowela ogula karo? Ohiya wagula mataba omerkado, miyo podi olima ndabo naaga?’
Ohunagule ethu orajhihe wikoha: ‘Mwebaribarene ginohowela ogula ethu ela? Ginere wanda opagari?’
Dhenyeyaga walobe anamathonga wihina yukaviherege ndithu dhinahoweleya dhinukaavihere.

“Iyo ninga emudhi nihithoma otxokotxela makalelo nnafunihu olabihedha korowa. Nihivugula obe nihihiya ogula dhithu dhowaredhana. Teto iyo obajha ogula dhoojha dhihinathabwa okwima.” — Gift

OMUKOSEGE PALANU

Ovugule dhithu onaguliwe

Bibiliya anihina: ‘Muthu anerana dhithudha nupwaseya dhaye dhinomweddela pama, mbwenye muthu amarulu dhaye kadhinamweddela pama.’ (Provérbios 21:5) Ompandda porogarama winere wukavihera ohunonga korowa dhinakeliwe.

Obajhe olebela korowa onakeliwe kadda mweri.
Olebele dhithu onaguliwe vamwerini ni opendde korowa onanongiwe.
Oliganihe korowa onanongiwe ni ndhe onakeliwe. Windo woone akala onohowela ovugulela obe ohiya ogula dhithu dhimodha wihina omuharihege porogarama awo.

“Mweri dhaatedhene nnoleba lista na korowa nnakelihu ndhithu nnanongihu. Nnoxixa okoya korowa wihina nlabihedhe yapadhuwa ethu morurumusa ni wihina nlabihedhe osogolo. Mwaha wa yeyo, kannathabwa wukuwa mwaha nihinona mutaneene makalelo nnalabihedhihu korowaya.” — Carlos.

KUBOLIHEGE KOROWA/OKOYEGE KOROWA

Kubolihege korowa/Okoyege korowa

Ompamdde porogarama wihina ovugulele okanna mangawu akala ohukanna ni dhenyeyaga wilibihedhe ohukanna mangawu. Ohiya eyo, orajhihe okoya korowa onahoweliwe uhunathi ohugula ethu.
Kadda mweri okoyege korowa vang’ono vang’ono wihina olabihedhe osogolo obe olabihedhe yapadduwa ethu morurumusa.

MUVIHEYEGENA MABASA

Bibiliya anihina: “Wapara mabasa nuuviheya winodhana mareeliho.” — Provérbios 14:23.

Muviheyegena mabasa

Okanne moonelo wapama wodhela mabasa aawo. Narive akala mabasaya kahi yayo wafunesiwe, enowuvaha korowa.
Olabege nuuviheya ni okale oororomeleya. Eyo enere wukavihera ohayelela mabasa aawo obe osogolo we podi wafwanya mabasa mwamakalelo ookweya.

“Ginowaarumedha mabasa bi mabasa, narive ehigidhivelaga narive korowaya ginaakelimi ehili yapamene. Ginoxixa okala namalaba oororomeleya ni wapara mabasa ni murimaaga wamutene ekalaga ninga ethuya ginasasanyimi saaga.” — Dmitriy

Akala onna wasayela mabasa . . .

Okale oobajha. Owoge ni empereza onafuniwe olaba, naarive aliwaya ehasayelaga athu wi elabege. Wawaddele akwawo ni amudhawo wihina onna wasayela mabasa.
Wisaddulege mowaguva. Podi wera mabasaya onafwanyiwe kahi yayo onaafuniwe.