NWILABONI MUNA MUDHAANLE MAKATHAMIHO MWAHAYA BWADDI EKALA YOOFUNEYA?

3 | Obarele wandana onniwena naathu amodha

Onere ddi?

Mwilaboni muna mudhaanle makathamiho, dhothuwathuwiha dhinowinjhiva. Bumwahaya athu owinjhiva naarive ehifunaga enohiya wi dhothuwathuwiha ndho dhinonge wandana enniwana naathu amodha.

Athu amodha enolapelana naakwiwa.
Anamatelana ennave othabwa okangana.
Abaabi kinaapwatha makathamiho enaafwanya aniiwa.

Dhithu onafwaneleliwe onona

Okanna akwihu apama sathima mwaha eyo enokavihera okanna egumi yapama ni enonikavihera thabwa-thabwa mudhidhi worusa.
Stress enadha mwaha wa makathamiho a elabo ela podi opatha emudhihu mwamakalelo nahubuwelihu.
Notisiya abure podi wavolowela anaawo mwamakalelo wahubuweliwe.

Dhithu onahoweliwe werana

Bibiliya anihina: “Mukwawo eebaribari anuudhivela mudhidhi wamutene, onokala ddibilo wafwanyiwa makathamiho.” — Provérbios 17:17.

Omubuwele muthu anuukavihera ni anonne ovaha dholaga dhapama. Onona wihina ohukala muthu ananithuwathuwela winonivaha kopolo wihina niwanena makathamiho ni dhoweha dhinanifwanya.

ETHU YOWERANA Dhithu dhinakavihera

Mudhidhi wa makathamiho dhithu ndha dhinere wukaviherani obarela wandana munninyuna naathu amodha

OLIBIHE MATELO AWO

Walibihe matelo awo

Bibiliya anihina: “Weedda abili sapama opitha muthu mmodha. . . Muthu mmodha amotha, mukwaye anonvenyiha.” (Eclesiastes 4:9, 10) Anamatelana ekalege ninga piloto aaviyawu enalaba vamodha wihina efiye mburo mmodhave. Kikalege ninga apiloto enawanela omweeddiha aviyawu mmodhave. Moone dhithu dhinakavihere anamatelana:

Kumweeddihege mwariyo obe mamuno mwamakalelo abure mwaha wa makathamiho enufwanyani. Okala ovilela ni wonelamo dhithudha winokavihera.
Sumana dhaatedhene muthapanyedhege dhithu munahowelinyu otxokotxela. Muthapanyedhege museluya ohiya okangana mmodha nimukwaaye.
Musayelege mudhidhi wihina mweregena dhithu dhinudhivelani nyu aabiili.
Mubuwelege mudhidhi mweresinyuna dhithu dhuhagalasani, podi okala ninga osugwa fotu dha matelo enyu obe fotu dha dhithu dhimodha.

“Anamatelana podi ohukanna moonelo mmodhave wa dhithu dhaatedhene, mbwenye eyo kinatapulela wihina kadhinenyeya okala owiwanana. Mulobwana ni muhiyana podi werana dhothoma vamodha ni wilibihedha wihina yakwanelihe.” — David.

OLIBIHEGE WANDANA WAWO

Olibihege wandana wawo

Ohiya wubuwelaga okaviheriwa baahi, wubuwelege wakavihera akwaawo. Wakaviheraga athu amodha onna onna wikavihera.
Malabo aamateene othapanyege naakwawo wihina onone akala enohowela nikavihero.
Wakohe akwawo makalelo yawaniliwana makathamiho enuufwanya.

“Wafwanyiwaga makathamiho mwigumini akwawo podi wuukavihera nerive dhithu dhinawogiwa nihimala onona. Akwihu enonthuwathuwela teto aliwa ehinoona wi ni iyoya nnowathuwathuwela.” — Nicole.

WAKAVIHEREGE ANAAWO

Wakaviherege anaawo

Bibiliya anihina: “Kadda muthu aaguvelege wiwa, mbwenye kaaguvelege owoga.” (Tiyago 1:19) Podi wera omabajhowene anawo kinafunege owoga wodhela dhithu dhinapadduwela. Mbwenye wapwasedha wavuruwana nuuvilela enere wakavihera wufugulela murima wewa.

Wakavihere okala otapuwene wihina ewoge dhithu dhinaapadduwela mwaha ahima amodha kinanda owoga dhithu dhinapadduwela ni makolo ewa. Podi wera enere okala yokweya othapanya naaliwa mwaredhaga ninga motajhiha, mwakala mukaroni obe mweddaga.
Okale pasope wihina anaawo enanvuruwane obe enamoone notisiya abure.
Wawaddele anawo ethu baani oneriwena wihina obarele murala wawo.
Ompandde porogarama naanawo ni waxagihe werana ethu sithu yapadduwa ethu moorurumusa.

“Othapanyege naanawo ni wahiyege aliwa wi ekalege otapuwene wihina ewoge dhithu dhinaapadduwela. Podi wera aliwa enowova, enokala owukuwene obe enokanna rayiva ni kinafuna wuwaddela. Kukanne manyazo owoga naaliwa wihina dhithu dhinaapadduwela ni weya dhinowupadduwela, teto wawaddele dhithu oneriwena wihina wandde owanana.” — Bethany