Mabasa baani adhari ookavihera enapariwa?

Bibliya anowaawoga makuru menli a makiristawu enna mutholo mmulogoni: ‘anamaholela mulogo vamodha ni adhari okavihera’. (Filipenses 1:1) Mwebaribarene kadda mulogo ehikalamo addibila ala. Adhari ookavihera enantxova addi?

Aliwa enokavihera nikuru nanamaholela Mulogo. Adhari ookavihera, azombwe obe owunnuwelavo, aliwa athu owithwa omuzimuni, athu ororomeleya ni enowilibihera. Aliwa enowapara mabasa oofuneya a munikuruni, mbwenye malabo owinjhiva enakala mabasa ammulogoni enahoweleya okanna kopolo. Eyo enowakavihera anamaholela mulogo weddiha mabasiwa osuziha ni ookukula.

Aliwa enowapara mabasa ofuneya. Adhari ookavihera amodha enothomiwa okala anamatonyedha wi yawakelege athu enadhela woona mutugumano. Amodha enomusamalela radiyu, amodha enaagawa malivuru , amodha enasamalela korowa dha mmulogoni, amodha murudda dholaleya dha mmulogoni ni murudda wa kadda namalaleya. Enokavihera owomihedha Nyumba Yomwene. Anamaholela mulogo enowaloba wi yakaviherege addibila owunnuwelavo. Mabasa atene adhari ookavihera enawakeliwa, enowapara ni murima watene, yaparaga mabasa yala addibila enowariha. — 1 Timóteo 3:13.

Aliwa yotajhiha yapama ya makiristawu. Adhari ookavihera enathomiwa mwaha wa dhikalelo dhiwa dhapama dhomuzimuni. Yahudhihaga mmulogoni, enolibiha nroromelo nehu. Aliwa enowilibihera oya mmalaleyelo, eyo enowenjhedhedha oviheya wehu wi nilaleye. Wiwelela wewa, winowenjhedhedha okalawo murenddele ni wiwanana. (Efésios 4:16) Wavira mudhidhi aliwa podi openddiwa wi ekale anamaholela mulogo.

• Adhari ookavihera munyaathu baani?

• Enakavihera addi wi mulogo weddege pama?