Mabasa ehu olaleya enakaviheriwa addi?

Nikuru nehu nnowaleba ni nnowagawa matxikwi ni matxikwi a Bibliya ni malivuru nihikukuse ethu. Nnoomaga ni nnosamalela Nyumba Dhomwene ni Filiyale. Nnowasamalela abetelita ni amisiyonariyu owinjhivene ni nnokavihera yapadduwa ngovi. Podi wera onowikoha: ‘Ki dhinandeya addi?’

Mwaha wa mabasihu kannakukusa korowa, neekumi, newene kanneddana togwa. Naari nnongaga korowa dhowinjhiva naaparaga mabasihu, kannakukusa korowa. Ninga nnawoga revista nehu na nabili A Sentinela, nlebiwe yaka zana dhivinre, nnorumedha wi ananikavihera di Yehova, ‘kanidha naloba athu korowa wi ekavihere mabasa ala’ — newene kannakukusege korowa. — Mateus 10:8.

Mabasa ehu enakaviheriwa ni yovelela yodhifunela. Athu owinjhiva enoovaha thima mabasa ehu omuhudhiha Bibliya ni enokavihera ni dhovelela dhiwa dhodhifunela. Iyo nannya nnokavihera nuuhagalala nlabihedhaga mudhidhi wehu, kopolo dhehu, korowa dhehu ndhithu dhimodha wi nikavihere wakwanela efunelo ya Mulugu elabo yatene yavati. (1 Crónicas 29:9) Mu Nyumba Yomwene, vamusonkano, ni vamusonkano wa malabo mararu, athu atene podi ovaha dhovelela dhiwa dhodhifunela mukaxani dhinafwanyeya mburo dhendho. Enowandeya ovaha korowa muthu alabihedhaga site, jw.org. Malabo owinjhiva enavaha athu ohawa, ninga maamukwele amutamalenle Yesu mwaha wa ohela korowa bili dhahanna thima mu kofirini ya mu tempulu. (Lucas 21:1-4) Bu mwahaya kadda muthu podi okanna elemelelo ya ‘ologolela ethu si ethu nikukuru’, wi avahe ‘yele ubuweleye mmurimani mwaye’. — 1 Coríntios 16:2; 2 Coríntios 9:7.

Kannanganyedha wi Yehova anerege wavahave efunelo ale enafuna ‘Omuthithimiha Yehova ni dhithu dha thima enniwana’ yokavihera mabasa Omwene wi efunelo ya Mulugu yakwanele. — Provérbios 3:9.

• Makalelo baani nikuru nehu nnahiyaniwa ni gereja dhimodha?

• Dhovelela dhehu dhodhifunela dhinalabihedhiwa addi?