Mulugu Ohupaddusa Odhulu ni Elabo Yavati

Mpaddusi ehu di Yehova Mulugu. Oliye dipaddusile dhithu dhaatedhene dhiliwo. Yehova dipaddusile dhithu nnandihu woona ni ndhe nihinandihu woona. Vobajha, Yehova opaddusa mbwabwadda ni mbwabwadda wa angero. We ohumunona mungero? Mungero muthu analigana ni Mulugu anakala odhulu. Iyo kannanda wawoona angero ndala ninga nihinandihu omoona Mulugu. Mungero oobajha Yehova ampaddusiliye aali namakavihera aye. Mungero oyo ohumukavihera Yehova opaddusa thendderi, palaneta ni dhithu dhimodha. Palaneta modha silabo yavati.

Yehova wegeredha elabo wihina athu vamodha naanenyama ekalegemo. Oliye aheriha wihina waara wa nduwa wifiyege mwilaboni yavati. Numala, oliye opaddusa mwango, niya ni muhinjhe.

Ki voharela? Yehova owoga egi: ‘Ginere wapaddusa manyahi, makupu ni mithanko.’ Numala, Yehova wapaddusa matakuru, folori, dhowima ni dhoojha dhohiyana-iyana. Numala Yehova wapaddusa anenyama. Anenyama enowudhivela? Mwanenyama baani anathabwa wudhivela? Yehova daapadduse anenyama aatene eneedda, enavava, eniburula ni enaraba. Yehova wapaddusa anenyama ang’ono ninga anamarogolo ni anlubale ninga thebo.

Nuwindo, Yehova owoga ni mungero oobajha ampaddusiliye egi: ‘Kabe napadduse athu.’ Athu ayo yere ohiyana ni anenyama. Aliwa yerege wanda osasanya dhithu, owoga, oteya ni othapanya ni Mulugu. Teto yerege osamalela elabo yavati ni yerege wasamalela anenyama. Ohunona ndina na mulobwana oobajha opaddusiwa? Kabe noone.