Yehova Ahasinyusa Aliba Ohiwelela

Nuuvira mudhidhi, amwaana Ezarayeli egaali mwiddeddereni, athu amodha okala oohiwelela. Aliwa kayafuna omwiwelela Moyizeji. Aliwa yithaniwa Kora, Data ni Abirawu. Teto yahikalawo amodha 250 yaakavihera. Aliwa owoga ni Moyizeji yegi: ‘Iyo nihuugomana! Baani uthomile weya wihina onisogolelege? Ki mwahaya bwaddi Arawu baahi adhe akalege namakutha munlubale? Yehova kanawoga ni nyu baahi, mbwenye onowoga nihiyoya.’ Dhithu dhawogiliwa kadhamuhagalase Yehova. Vamentoni va Yehova alobwana ale yamurugunuwela Oliye!

Moyizeji omwaakula Kora ni amodhaya egi: ‘Mangwaana mudhe otabernakulu, mwadhaaga mudhena insensu wihina mpahe. Yehova anere omutonya muthu amusakunliye.’

Labo noharela, Kora ni alobwana owakwana 250 odhowa ogumana ni Moyizeji otabernakulu wihina epahe insensu. Mbwenye afwanelela opaha insensu aali namakutha baahi. Vano Yehova owoga ni Moyizeji vamodha ni Arawu egi: ‘Mususevo mburo oyo vili Kora vamodha ni akwaye.’

Mudhidhi yole, Data ni Abirawu yaali mmusasani mwewa. Aliwa kiyamwiwelele Moyizeji bumwahaya kiyadhowile otabernakulu. Vano, Yehova owoga naathu aatene wihina ehaddamele musasa wa Kora, Data ni Abirawu. Athu aatene wiwelela. Mbwenye Data, Abirawu ni murala dhewa kayiwelele. Morurumusa, thaya ofuguwa vano athu ale oohiwelela omothelamo! Teto Yehova omothiha mootho ompaha Kora ni alobwana aye 250 yaali mutabernakulu!

Numala, Yehova owoga ni Moyizeji egi: ‘Wathukule mikogodho 12, kadda nihimo naamwaana Ezarayeli othukulege mukogodho mmodha. Olebevo ndina na namasogolela a kadda nihimo. Mbwenye mukogodho wa nihimo na Levi olebevo ndina na Arawu, windo odhowe wapwehe mutabernakulu. Mukogodho wa muthu ginaamusakulimi wi akale namakutha munlubale onere okuma folori.’

Labo noharela, Moyizeji odhowa othukula mikogodho ndhe. Ohunona yapadduwile? Mukogodho wa Arawu wahikuma folori. Moyizeji wawoniha mukogodho ndhe anamasogolela a kadda nihimo. Mwaha wa yeyo, aatene okanna ebaribari wihina Yehova ahimusakula Arawu wihina akale namakutha munlubale.