Nlobelo na Ana

Mulobwana dhaala ithaniwa Elkana oodhowesa omwebedha Yehova otabernakulu yaali oSilo. Oliye aanna ahiyana abiili, Ana ni Penina. Mbwenye athabwa omudhivela Ana. Penina ahikanna ahima owinjhiva, mbwenye Ana kaanna newene mmodha. Mwaha wa yeyo Penina oothabwa omutaabusa. Labo dhaala egaali oSilo, Elkana woona wi Ana ahithabwa wukuuwa. Mwaha wa yeyo Elkana othuwathuwa ni odhowa omuwogana, mbwenye kandile omukavihera.

Nuuvira mwanamudhidhi, Ana odhowa olobela. Unlaga oliye owoga egi: — ‘Yehova, ginaloba mugivahe mwaana, miyo ginoolibela wihina ginere omudhana otabernakulu wihina ulabelegeni egumaye yaatene.’

Vano namakutha munlubale Eli ubuwela wihina Ana keera olobela, mbwenye eere olezela. Vano, Ana owoga nuliye egi: ‘Naari, miyo ginoolibela wihina kagilezele. Mbwenye geere othabwa wukuuwa, bumwahaya gidhe giwogege ni Yehova.’Eli woona wihina Ana kaalezenle, vano owoga wi Yehova eere onvaha Ana dhithu alobiye. Vano Ana ohogolowela vaade oohagalalene. Nuuvira mwanamudhidhi Ana ombala mwaana a mwanamulobwana ni onvaha ndina na Samuweli. Oliye ahihagalala! Kunonelamo?

Nerege Ana ahidduwala mpaganyo eeriliyena? Naari! Samuweli nuhiya waamwa, omuthukulela otabernakulu. Oliye onvahedha namakutha munlubale Eli ni owoga egi: ‘Munowubuwela wihina gahimuloba ethu Yehova? Oliye ohugivuruwana ni ogivaha mwaana ola. Mwaana ola anamulabelege Yehova wewuno, egumaye yaatene.’ Yaka dhaatedhene, Ana ni Elkana yodhowa omwaredhela ni yothukula dhowara dhixa wihina yanvahe. Nuwindo Yehova onvaha Ana ahima aanalobwana araru ni anahiyana abiili.