Mpaganyo wa Jefite

Amwaana Ezarayeli ohogolowelave wawebedha amulugu amodha ohiya omwebedha Yehova. Mbwenye amulugu ayo kiyakavihere amwaana Ezarayeli, akudda amonita nudhowa owana naaliwa. Muwari mwa yakadhene dhewa kadhaweddela pama. Vano labo dhaala aliwa owoga yegi: ‘Yehova, ethu nerilihuna sabure. Kamwerena, nikavihereni!’ Vano, amwaana Ezarayeli opwesa dhikwamuthu dhaamulugu owoota, ohogolowela omwebedha Yehova. Vano Yehova wakavihera.

Wihina amwaana Ezarayeli yagonjihe aamonita, aliwa omusakula namasogolela ithaniwa Jefite. Ehinathi odhowa okoddoni, oliye ompaganya Yehova egi: ‘Yehova, naagonjhiha aamonita, muthu anaakale oobajha ogaakela gafiya vaade, aneere wulabelani otabernakulu egumi yaye yaatene.’ Amwaana Ezarayeli ogonjhiha koddo ele nnikavihero na Yehova.

Vano Jefite ahogolowelaga vaade vaye, muthu oobajha okuma aali mwanaye a mwanamuhiyana. Oliye eera wiina oobaga ng’oma. Jefite wubuwela mpaganyo waye ni wukuwa vanlubale mwaha anna mwaana mmodha. Ki vano? Eere ddi? Oliye owoga ni mwanaye egi: ‘Mwanaga, gihimpaganya Yehova wihina muthu oobajha ogaakela gafiya vaade anere odhowa wihina amulabelege Yehova mutabernakulu. Bumwahaya, ginere wuvelela wihina wakaviherege wapara mabasa otabernakulu, oSilo.’ Vano mwanaye wakula egi: ‘Babani, akala nyu muhumpaganya Yehova ndo, mwakwanelihe mpaganyoya. Mbwenye ginaloba wihina gidhowe omwangoni naakwaga wihina gakalewo mweri minli.’ Mwaana Jefite ahilaba otabernakulu egumaye yaatene. Kadda yaka, akwaye yodhowesa wihina yampaade.