Davidi ni Goliya

Nuuvira mudhidhi, Yehova owoga ni Samuweli wihina adhowe vaade va mulobwana dhaala iithaniwa Jese, woona wihina mwanaye mmodha eere othomiwa wihina akale mwene owIzarayeli. Samuweli nuufiya vaadeva omoona mwaana a Jese. Nuumona oliye wambela wubuwela wihina di yoole aathomiwe wihina akale mwene. Vano Yehova owoga egi: ‘Kahiyo oliye gimuthomilimi. Miyo kaginapwatha ekalelo ya muthuya, mbwenye enlubaleya sowihina akanne murima wapama.’

Nuwindo, Jese wadhana anaaye owakwana 6. Mbwenye kaavo aasakuliwevo ni Yehova, newene mmodha wa aliwa. Samuweli omukoha Jese akala ahikanna ahima amodha. Jese wakula egi: ‘Gihikanna mwaana mmodhaya amung’onoya anithaniwa Davidi. Oliye anaasamalela mambila.’ Vano, Jese omuruma muthu wihina amudhowele Davidi. Davidi nuufiya, Yehova omwaddela Samuweli wihina diyole aamuthomiliye! Samuweli wathukula makura mang’onove wawithela vamuru va Davidi, oonihaga wihina oliye daakale mwene owIzarayeli.

Nuuvira mudhidhi, mafilistewu odha owana naamwaana Ezarayeli. Mmodha wa mafilistewu aali munyakoddo munlubale. Oliye iithaniwa Goliya. Eera ovireliwa labo nantero aateyaga ni aanyemulaga amwaana Ezarayeli egi: ‘Mmusayele muthu wi adhe awane ni miyo, moone akala munere onfwanya! Oliye agigonjhiha, nnere okala adhaari enyu. Mbwenye miyo gamugonjhiha munaakale adhaari ehu.’

Labo dhaala, Davidi odhowa wavaha yoojha addibile yaali okoddoni. Vano oliye omwiwa Goliya aateyaga amwaana Ezarayeli, nuwindo wivahedha wihina awane ni Goliya. Mbwenye Sawuli owoga wihina kadhenyeye mwaha Davidi aali mwana muzombwe. Davidi omwakula egi: ‘Kahi muladdu. Yehova aneere ogikavihera.’

Vano Sawuli onvaha Davidi dhipano dhowanana koddo, mbwenye oliye ohogolosa mwaha dhothabwa onyemela. Davidi waddodda mabwe matanu ni wapweha mbudduni mwaaye. Teto othukula fisgaye othamagela waali Goliya. Goliya owoga egi: ‘Kadhaga wuno namasebwaniwe, ginere wupa, gurahilele ngo wihina anenyama yutakune.’ Mbwenye Davidi koovile. Oliye waakula egi: ‘We onawoga ndo mwaha onaroromela supadda nawo ni mwaalago. Mbwenye miyo ginamuroromela Yehova. Onubuwela wihina onawana ni iyo? We onawana ni Yehova. Peeno athu aatene enere onona wihina Yehova dithambwe okanna kopolo opitha ethu-siithu enawaniwana koddo. Oliye aneere onikavihera wugonjhihani!’

Davidi othukula nibwe opweha mfisgani, nuwindo ovoka nikopolo dhaye dhaatedhene. Yehova weriha wihina nibwe nne nimpwese Goliya vakoveni. Vano Goliya omotha ni okwa. Mafilistewu nuwona ele yapadduwile, aatene othawa. Uhoona makalelo Davidi amuroromeliye Yehova? We onomuroromela Yehova?