Davidi ni Sawuli

Davidi nuumpa Goliya, okala namasogolela aanyakoddo a Sawuli. Davidi ahigonjhiha koddo dhowinjhiva, mwaha wa yeyo oliye ovuwa. Ahiyana yowiba jhibo ewogaga wi Davidi aali munyakoddo apama ompitha Sawuli. Eyo yomutotela Sawuli nrima. Bumwahaya, othoma ompa Davidi.

Labo dhaala, Davidi amurumihaga bangwe aye wihina amukurumusena Sawuli, Sawuli othukula mwaalago onvokedha Davidi, mbwenye oliye ofintari. Nuwindo Sawuli osayela ompa Davidi mwamakalelo oohiyana-iyana. Bumwahaya, Davidi woona wi yere okala yapama othawela mwiddeddereni.

Sawuli wathukula alobwana owakwana 3000 omuharaga Davidi. Vano Sawuli ovolowa onikunguni wimodhave waali Davidi naalobwana aye. Alobwana a Davidi owoga yegi: ‘Davidi, ola ofuru wihina ompe Sawuli!’ Vano, Davidi wiida odhowa waali Sawuli ni ogwadda yowara yaye. Sawuli koonile wi Davidi ahigwadda yowara yaye, mbwenye mubuwelo wa Davidi womunyemela mwaha kaamuthithimihile mwene aasakuliwe ni Yehova. Davidi keenyile wihina alobwanaye empe Sawuli. Vano nukuma onikunguni wule, Davidi owoga egi: ‘Gahikanna ofuru wowupa, mbwenye kagerilena eyo.’ Nerege Sawuli ahiselela omusayela Davidi wihina ampe?

Naari. Sawuli omuharaharagave Davidi. Emahiyu dhaala, Davidi ni mudhule Abizayi ovolowa mowipiteya mburo wakala Sawuli ni anyakoddo aye, mbwenye athu aatene ni muthuya ambarela mwene Sawuli yeera ogona. Vano Abizayi nuwona eyo, ofunaga ompa Sawuli. Mbwenye Davidi owoga egi: ‘Abizayi, kamuhiye, Yehova anere omusinyusa. Nithukule baahi mwaalago ni manjhe aye nimweddege.’

Davidi ni Abizayi ogwela vamwangoni waddamele mburo waali Sawuli naanyakoddo aye. Agaali vadhulu vamwango, Davidi okuwa egi: ‘Abiner, mwahaya bwaddi odhe ohimbarelege mwene awo? Iyo nihithukula mwaalago ni manjhe aye we ohonagawo.’ Sawuli wiiwa ndhu na Davidi ni owoga egi: ‘Wahikanna ofuru wogipa, mbwenye kugipile. Mwebaribarene onere okala mwene owIzarayeli.’ Nuwindo, Sawuli ohogolowela vaade vaye. Nerege emudhi yaateene ya Sawuli yomwidda Davidi? Nnere woona eyo.