Jonata Aali Muthu Ooliba Murima ni Oororomeleya

Mwaana oobajha a Sawuli, Jonata, aali munyakoddo ooliba murima. Davidi ahifiyedha owoga wihina oliye owaguva ompitha pangwe teto aali akopolo ompitha poddogoma. Labo dhaala, Jonata nnamakavihera aye wawoona mafilistewu vamwangoni. Jonata owoga nnamakavihera aye egi: ‘Mafilistewu yanithana wihina nigwele vamwangoni wi nawane naaliwa, enooniha wihina Yehova aneere onikavihera ogonjhiha.’ Siyeyo yapadduwile. Mafilistewu omwithana Jonata nnamakavihera aye wihina egwele vamwangoni. Aabilene owana ni wanda wagonjhiha mafilistewu owakwana 20.

Woona wi Jonata aali mwaana oobajha a Sawuli, ahikanna ofuru wokala mwene. Mbwenye oliye ahinona wi Yehova aamusakunle Davidi wihina amuhabe mpaddo mwene Sawuli. Naarive dhigaali ndo, Jonata kamukalela nrima Davidi. Ohiya eyo, aliwa wandana vanlubale. Jonata ni Davidi opangana wihina yerege okaviherana mmodha ni mukwaye. Wihina Jonata oonihe wandana waye, onvaha Davidi malaya, supadda, munra ni sintu naye.

Mudhidhi Davidi amuthawaga Sawuli, Jonata odhowa ogumana nuliye ni owoga egi: ‘Davidi, okale akopolo ni ooliba murima! Yehova ohusakula wihina okale mwene. Ababa ehinona eyo.’ Kiyakale yapama okanna mukwawo ninga Jonata?

Jonata ahipweha egumaye vang’ovini dila dhowinjhivadhene wihina amukavihere mukwaye. Nunona wihina Sawuli afuna ampe Davidi, Jonata werana dhaatedhene andiye wihina Sawuli asaddule mubuwelo waaye. Mbwenye Sawuli otakaleliwa vanlubale ni Jonata. Nuuvira mudhidhi, Jonata okwa vamodha ni Sawuli okoddoni.

Jonata nuukwa, Davidi omusayela Mefibozeti, mwaana Jonata, ni owoga egi: ‘Miyo gahithabwa wandana ni ababo. Bumwahaya ginere wusamalela egumawo yaatene. Onerege okala ni miyo ni onerege ojha dhoojha ginajhimi.’ Mwebaribarene Davidi kanamudduwalege mukwaaye Jonata.